ກຸ່ມຕໍ່ຕ້ານການສໍ້ລາດບັງຫລວງລະຫວ່າງຊາດກ່າວວ່າ ມຽນມາພາຍໃຕ້ການປົກຄອງ
ຂອງທະຫານ ເປັນ 1 ໃນຈໍານວນ 3 ປະເທດທີ່ມີການສໍ້ລາດບັງຫລວງຫລາຍທີ່ສຸດ
ໃນໂລກ.
ລາຍງານສະບັບນຶ່ງທີ່ອົງການ Transparency Internationalນໍາອອກເປີດເຜີຍໃນວັນ
ອັງຄານຜ່ານມາ ເວົ້າວ່າ ມຽນມາກັບອັຟການິສ ຖານ ເປັນປະເທດທີ່ມີການສໍ້ລາດບັງ
ຫລວງຫລາຍອັນດັບສອງຂອງໂລກ ຂະນະທີ່ໂຊມາເລຍເປັນປະເທດທີ່ມີການສໍ້ລາດບັງ
ຫລວງຫລາຍທີ່ສຸດ ໃນຈໍານວນ 178 ປະເທດ ຢູ່ໃນບັນຊີນັ້ນ. ປີແລ້ວນີ້ ກຸ່ມ Trans-
parency International ທີ່ມີຫ້ອງການຕັ້ງຢູ່ໃນ ກຸງ Berlin ຈັດມຽນມາຢູ່ໃນອັນດັບ 3.
Papua New Guinea ຢູ່ໃນອັນດັບທີ 154 ເທົ່າກັນກັບ ສປປ ລາວ ແລະກໍາປູເຈຍ
ສ່ວນຟີລິບປິນຢູ່ໃນອັນດັບ 134 ແລະຕີມໍຕາເວັນອອກຢູ່ໃນອັນດັບ 127. ທັງໝົດທີ່
ກ່າວມານັ້ນ ແມ່ນຮວມຢູ່ໃນພວກປະເທດ ທີ່ໄດ້ຄະແນນຕໍ່າສຸດໃນບັນຊີຂອງປີນີ້.ພວກ
ປະເທດທີ່ຢູ່ໃນອັນດັບຕໍ່າຫລືຢູ່ທາງລຸ່ມຂອງບັນຊີ ຖືວ່າມີການສໍ້ລາດບັງຫລວງຫລາຍ
ກວ່າພວກປະເທດຢູ່ໃນຂ້າງເທິງຂອງບັນຊີ.
ອອສເຕຣເລຍຖືກຈັດຢູ່ໃນອັນດັບ 8 ທີ່ມີການສໍ້ລາດບັງຫລວງໜ້ອຍກວ່າໝູ່ໃນໂລກ
ໃນປີນີ້ ໃນຂະນະທີ່ ສິງກະໂປ ນີວຊີແລນ ແລະເດັນມາກ ແມ່ນຢູ່ໃນອັນດັບນຶ່ງ ຊຶ່ງ
ໝາຍຄວາມວ່າມີການສໍ້ລາດບັງຫລວງໜ້ອຍທີ່ສຸດຂອງໂລກ.
ຫວຽດນາມມາໃນອັນດັບ 116 ອິນໂດເນເຊຍອັນດັບ 110 ໄທອັນດັບ 78 ເທົ່າກັນກັບຈີນ, ມາເລເຊຍ ຕິດອັນດັບທີ 56 ເກົາຫລີໃຕ້ອັນດັບທີ 39 ບຣູໄນອັນດັບທີ 38 Bhutan ທີ 36 ໄຕ້ຫວັນທີ 33 ຍີ່ປຸ່ນ ທີ 17 ແລະຮອງກົງທີ 13 ແມ່ນໂຮມຢູ່ໃນບັນດາປະເທດທີ່ຢູ່ໃນລະດັບກາງ ຂອງບັນຊີ.
ກຸ່ມ Transparency International ໃຫ້ຂໍ້ສັງເກດວ່າ ປະເທດທີ່ໄດ້ຄະແນນດີຂຶ້ນໃນ
ປີນີ້ ແມ່ນປະເທດ Bhutan ຊຶ່ງຫຍັບຂຶ້ນມາຢູ່ໃນອັນດັບທີ 36 ຈາກອັນດັບທີ 49 ຂອງປີແລ້ວນີ້.