ຜູ້ຊ່ຽວຊານດ້ານສາທາລະນະສຸກ ແລະ ການແພດ ໄດ້ພົບປະກັນ
ໃນທຳນຽບຂາວສຳລັບກອງປະຊຸມສຸດຍອດ ກ່ຽວກັບ ການປ່ຽນ
ແປງຂອງສະພາບອາກາດ ແລະ ສາທາລະນະສຸກ. ກອງປະຊຸມ
ດັ່ງກ່າວ ໄດ້ໄຂຂຶ້ນ ຫຼັງຈາກການອອກລາຍງານ ໃນວັນທີ 22
ມິຖຸນາ ຜ່ານມາ ໂດຍອົງການປົກປ້ອງສິ່ງແວດລ້ອມ ສະຫະລັດ ໃນ
ການວິເຄາະທີ່ສຳຄັນ ກ່ຽວກັບຜົນປະໂຫຍດດ້ານສຸຂະພາບ ແລະ
ເສດຖະກິດ ຂອງການປ່ອຍຄວັນພິດໜ້ອຍລົງທີ່ເຮັດໃຫ້ສະພາບດິນ
ຟ້າອາກາດປ່ຽນແປງ. ການຄົ້ນພົບກ່ຽວກັບໂລກທີ່ຄ້າຍຄືກັນ ທີ່ຫາກໍເປີດເຜີຍໂດຍກຸ່ມນັກຄົ້ນຄວ້າ ຄະນະກຳມະທິການ Lancet
ກ່ຽວກັບ ສຸຂະພາບ ແລະສະພາບອາກາດ, ຊຶ່ງເປັນກຸ່ມອິດສະຫຼະ,
ສາກົນ ແລະ ມີລະບຽບວິໄນຫຼາຍຝ່າຍ. ນັກຂ່າວ ວີໂອເອ Rosanne
Skirble ມີຂໍ້ມູນກ່ຽວກັບຂ່າວນີ້ ເຊິ່ງ ພຸດທະສອນ ຈະນຳເອົາລາຍ
ລະອຽດມາສະເໜີທ່ານ.
Your browser doesn’t support HTML5
ຟັງລາຍງານ ສະພາບອາກາດ ປ່ຽນແປງ ເຮັດໃຫ້ການແພດ ທົ່ວໂລກ ເຂົ້າຂັ້ນສຸກເສີນ
ລາຍງານຂອງຄະນະກຳມະທິການ Lancet ກ່າວວ່າ ຜົນກະທົບຂອງສະພາບອາກາດປ່ຽນແປງແມ່ນໃຫຍ່ຫຼວງ ເຊິ່ງມັນສາມາດເຮັດໃຫ້ຄວາມກ້າວໜ້າດ້ານສາທາລະນະສຸກຂອງໂລກ ທີ່ໄດ້ມາເມື່ອ 50 ປີກ່ອນເສື່ອມເສຍລົງໄດ້. ຫົວໜ້າກຳມະທິການ ທ່ານ Nicolas Watts ໄດ້ກ່າວກັບ
ວີໂອເອ ຜ່ານທາງ Skype ວ່າ ດິນຟ້າອາກາດຮຸນແຮງໄດ້ເຮັດໃຫ້ຮ້າຍແຮງກວ່າເກົ່າໂດຍການປ່ຽນແປງຂອງສະພາບອາກາດ ແມ່ນມີໂອກາດທີ່ຈະເຮັດໃຫ້ມີຄວາມເສຍຫາຍທີ່ສຸດ ແລະບໍ່ສາມາດຮັບໄດ້.
ທ່ານ Nicolas Watts ເວົ້າວ່າ “ໃນກໍລະນີຂອງໄພແຫ້ງແລ້ງ, ຫຼາຍຄັ້ງ ພວກເຮົາມັກຈະ ເຫັນ ກ່ຽວກັບຜະລິດດ້ານການກະເສດຫຼຸດລົງ, ເຊິ່ງບາດແລ້ວຜົນຕອບກັບກໍແມ່ນຜົນກະທົບຕໍ່ການຂາດອາຫານທີ່ໜັກຂຶ້ນກວ່າເກົ່າ, ໂດຍສະເພາະກັບເດັກນ້ອຍ. ສຳລັບໄພນ້ຳຖ້ວມ, ພວກເຮົາມັກຈະພົບເຫັນອັດຕາເພີ່ມຂຶ້ນຂອງບັນດາໂຣກຕິດຕໍ່ເຊັ່ນ ໂຣກອະຫິວາ ແລະ ຖອກທ້ອງ ທີ່ເກີດຂຶ້ນຈາກຄວາມລົ້ມເຫຼວຂອງສຸຂະອະນາໄມ.”
ແລະ ຍິ່ງຂຶ້ນກວ່ານັ້ນ, ມັນມີແຕ່ຈະຮ້ອນຂຶ້ນ ເຊິ່ງອາດເປັນອັນຕະລາຍເຖິງຕາຍ. ຄື້ນຄວາມຮ້ອນແຮງຈັດໃນປີ 2003 ໄດ້ເຮັດໃຫ້ມີຄົນເສຍຊີວິດ 70000 ຄົນໃນທົ່ວທະວີບ ຢູໂຣບ.
ທ່ານ Nicolas Watts ກ່າວວ່າ “ເຫດການທຸກຮູບແບບດັ່ງກ່າວນັ້ນແມ່ນຄາດວ່າຈະເພີ່ມຂຶ້ນຢ່າງຮຸນແຮງ ແລະ ໜັກໜ່ວງໄປຕາມກາລະເວລາ.”
ອົງການອະນາໄມໂລກ ໄດ້ເຕືອນວ່າ ນອກຈາກວ່າຈະມີການເອົາມາດ ຕະການຢ່າງເຄັ່ງຄັດ ເພື່ອຫຼຸດຜ່ອນການປ່ອຍຄວັນພິດ ທີ່ເຮັດໃຫ້ໂລກຮ້ອນພາຍໃນປີ 2030 ແລ້ວ ປະມານ 250,000 ຄົນຈະເສຍຊີວິດໃນແຕ່ລະປີ ຈາກຜົນກະທົບຂອງສະພາບອາກາດປ່ຽນແປງ. ຄວັນພິດຢູ່ນອກອາຄານແມ່ນມີການເຊື່ອມຕໍ່ກັບການຕາຍຂອງຄົນ 3 ລ້ານຄົນໃນທົ່ວໂລກ, ແລະ 1 ລ້ານ 2 ແສນຄົນໃນປະເທດ ຈີນ ພຽງບ່ອນດຽວ ເທົ່ານັ້ນ.
ທ່ານ Nicolas Watts ກ່າວວ່າ ການຫັນປ່ຽນຈາກໂຮງໄຟຟ້າ ພະລັງງານ ຖ່ານຫີນໄປເປັນ ພະລັງງານທົດແທນ ຈະສາມາດ ຫຼຸດຜ່ອນໄພອັນຕະລາຍນັ້ນໄດ້.
ທ່ານ Nicolas Watts ເວົ້າວ່າ “ພວກເຮົາເຫັນການຫຼຸດລົງຢ່າງທັນທີ ທັນໃດ ໃນຄ່າເຂົ້າ ປິ່ນປົວຢູ່ໂຮງໝໍ ແລະ ຄ່າປິ່ນປົວສຸຂະພາບ, ເຊິ່ງໄດ້ຫຼຸດຜ່ອນພາລະງົບປະມານການ ປິ່ນປົວ ສຸຂະພາບ ທີ່ແພງ ຢູ່ແລ້ວ. ແຕ່ວ່າຜົນປະໂຫຍດຕ່າງໆ ກໍສາມາດພົບເຫັນໄດ້ ຢູ່ນອກເໜືອຈາກ ພາກສ່ວນ ພະລັງງານເຊັ່ນກັນ. ຖ້າວ່າເຮົາສາມາດຫຼຸດຜ່ອນການເພິ່ງ ພາອາໄສລົດລາ ແລະ ຍານພາຫະນະອື່ນໆ ແລະ ພະຍາຍາມສົ່ງ ເສີມການຄົມມະນາ ຄົມແບບການ ເຄື່ອນ ໄຫວເຊັ່ນ ການຂີ່ລົດຖີບ ແລະ ຍ່າງ ເຈົ້າສາມາດ ຫຼຸດຜ່ອນການ ປ່ອຍ ທາດຄາບອນ ຈາກການເຄື່ອນ ໄຫວດັ່ງກ່າວ, ແຕ່ເຈົ້າກໍຍັງຈະຫຼຸດຜ່ອນອັດຕາ ຂອງໂຣກ ເບົາຫວານ ແລະ ໂຣກອ້ວນໄດ້ອີກ.”
ໃນບັນດາຂໍ້ແນະນຳທີ່ກ່າວມານັ້ນ, ຄະນະກຳມະການແມ່ນສົ່ງເສີມໃຫ້ ຢຸດຕິໂຮງໄຟຟ້າ ພະລັງງານຖ່ານຫີນ, ມາຂະຫຍາຍການຜະລິດພະລັງ ງານທົດແທນ, ລົງທຶນໃນລະບົບ ດ້ານສາທາລະນະສຸກ ແລະ ການໃຫ້ ຄຳໝັ້ນໝາຍຕໍ່ສົນທິສັນຍາວ່າດ້ວຍ ສະພາບອາກາດ ໂລກທີ່ເຂັ້ມແຂງ. ທ່ານ Watts ກ່າວວ່າ ດ້ານສາທາລະນະສຸກແມ່ນ ປັດໄຈທີ່ສຳຄັນທີ່ ສຸດຂອງຂໍ້ຕົກລົງອັນໃໝ່ຂອງໂລກ.
ທ່ານ Nicolas Watts ເວົ້າວ່າ “ສິ່ງທີ່ເຈົ້າຢາກເຮັດສ່ວນຫຼາຍເພື່ອ ຮັບມືກັບສະພາບ ອາກາດປ່ຽນແປງ ແມ່ນດີສຳລັບພາກສ່ວນສາທາລະນະສຸກ ແລະ ທີ່ແທ້ຈິງແລ້ວ ມັນແມ່ນ ອະນາຄົດທີ່ສົດໃສຫຼາຍ.”
ບັນດາຜູ້ຊ່ຽວຊານດ້ານການເບິ່ງແຍງສຸຂະພາບສາມາດເປັນຜູ້ສະໜັບສະໜູນການຕໍ່ສູ້ກັບ ສະພາບອາກາດປ່ຽນແປງ, ທ່ານ Watts ເວົ້າວ່າ “ແມ່ນຫຍັງທີ່ດີຕໍ່ໂລກ,” ຊຶ່ງທ່ານກ່າວ ເພີ່ມວ່າ, “ແມ່ນດີຕໍ່ການເບິ່ງແຍງຄົນໄຂ້.”