ກຸ່ມບໍລິສັດຈີນທີ່ລົງທຶນ ໃນເຂດເສດຖະກິດສະເພາະ ບໍ່ເຕັນ
ແດນງາມ ໄດ້ມຸ້ງການພັດທະນາ ທາງທຸລະກິດ ໃນ 6 ດ້ານ
ໂດຍຄາດຫວັງວ່າ ຈະສາມາດດຶງເອົາ ການລົງທຶນຈາກຈີນ
ແລະ ຕ່າງປະເທດໄດ້ຫຼາຍຂຶ້ນ.
Your browser doesn’t support HTML5
ຟັງລາຍງານ ກຸ່ມບໍລິສັດຈີນ ລົງທຶນ ໃນເຂດ ເສດຖະກິດ ສະເພາະ ບໍ່ເຕັນແດນງາມ ໃນລາວ
ທ່ານນາງເຈິ້ນ ສົງ ຜູ້ອຳນວຍການ ກຸ່ມບໍລິສັດພັດທະນາ ເຂດເສດຖະກິດສະເພາະ ບໍ່ເຕັນ
ແດນງາມ ຢູ່ທີ່ດ່ານຊາຍແດນລາວກັບຈີນ ໃນເຂດແຂວງຫລວງນ້ຳທາ ໃຫ້ການຢືນຢັນວ່າ
ກຸ່ມບໍລິສັດຈີນ ໄດ້ເນັ້ນໜັກ ການລົງທຶນເພື່ອການພັດທະນາທາງທຸລະກິດໃນ 6 ດ້ານຄື
ສູນການຄ້າ ສູນການເງິນ-ການທະນາຄານ ສູນຂໍ້ມູນ-ຂ່າວສານດ້ານການທ່ອງທ່ຽວ ແລະ
ບໍລິການ ບ້ານວັດທະນະທຳ ສາງພັກ ແລະ ການຂົນຖ່າຍສິນຄ້າ ອ່າງເກັບນ້ຳທຳມະຊາດ
ສວນປ່າທຳມະຊາດ ແລະ ສະໜາມກັອຟ.
ການພັດທະນາເຂດເສດຖະກິດສະເພາະ ບໍ່ເຕ່ນແດນງາມ ເປັນການລົງທຶນ 100 ເປີເຊັນ
ຂອງກຸ່ມບໍລິສັດຈີນ ທີ່ມີອາຍຸ ສຳປະທານ 50 ປີ ໃນເນື້ອທີ່ 1,641 ເຮັກຕາ ໂດຍໄດ້ເລີ້ມ
ການຈັດຕັ້ງປະຕິບັດ ນັບຕັ້ງແຕ່ປີ 2012 ເປັນຕົ້ນມາ ແລະ ມາເຖິງປັດຈຸບັນນີ້ ປາກົດວ່າ
ກຸ່ມບໍລິສັດຈີນ ໄດ້ກໍ່ສ້າງພື້ນຖານໂຄງລ່າງສຳເລັດແລ້ວ ໃນຫຼາຍດ້ານ ເຊັ່ນຮ້ານຄ້າປອດ
ພາສີ ຖະໜົນທີ່ເຊື່ອມຕໍ່ໄປສວນປ່າທຳມະຊາດ ລະຍະທາງຍາວ 28 ກິໂລແມັດ ລະບົບ
ໄຟຟ້າ ສະຖານທີ່ພັກຜ່ອນ ຢູ່ອ່າງນ້ຳທຳມະຊາດ ແລະ ສິ່ງອຳນວຍຄວາມສະດວກຕ່າງໆ
ຢູ່ພາຍໃນເຂດເສດຖະກິດສະເພາະ ເປັນຕົ້ນ.
ກອງປະຊຸມ ປຶກສາຫາລື ກ່ຽວກັບ ການສ້າງເຂດຮ່ວມມືເສດຖະກິດ ບໍ່ເຕັນ ສປປ ລາວ - ບໍ່ຫານ ສປປ ຈີນ
ທ່ານນາງເຈິ້ນ ສົງ ໄດ້ສະແດງຄວາມເຊື່ອໝັ້ນວ່າ ເຂດເສດຖະ
ກິດສະເພາະ ບໍ່ເຕັນແດນງາມ ຈະສາມາດດຶງດູດເອົາການລົງທຶນ
ຈາກຈີນ ແລະ ຕ່າງປະເທດໄດ້ເພີ້ມຂຶ້ນນັບມື້ ເພາະເປັນເຂດ ທີ່
ມີຄວາມສຳຄັນ ຂອງການເຊື່ອມຕໍ່ທາງເສດຖະກິດ ລະຫວ່າງຈີນ
ກັບປະເທດ ໃນລຸ່ມແມ່ນ້ຳຂອງ ແລະ ອາຊຽນ ທັງກໍຍັງເປັນເຂດ
ເສດຖະກິດສະເພາະ ທີ່ສາມາດ ຕໍ່ສຳປະທານໄດ້ເຖິງ 20 ຄັ້ງ
ຫລັງຈາກສິ້ນສັນຍາສຳປະທານ 50 ປີ ແລະ ການຕໍ່ສັນຍາສຳ
ປະທານ ໃນແຕ່ລະຄັ້ງນັ້ນ ກໍມີອາຍຸເຖິງ 20 ປີ ອີກດ້ວຍ ສະນັ້ນ
ຈຶ່ງຖືເປັນການຮັບປະກັນຜົນປະໂຫຍດລະຍະຍາວ ໃຫ້ກັບບັນດາ
ນັກລົງທຶນໄດ້ເປັນຢ່າງດີ.
ທາງດ້ານຄະນະຄຸ້ມຄອງເຂດເສດຖະກິດສະເພາະ ບຶງທາດຫລວງ ໃນນະຄອນຫຼວງວຽງຈັນ ໄດ້ລາຍງານວ່າ ກຸ່ມບໍລິສັດ Wan Feng Shanghai ຈາກຈີນ ໄດ້ໃຊ້ເງິນທຶນ ໄປແລ້ວຫຼາຍກວ່າ 100 ລ້ານໂດລາ ເພື່ອການພັດທະນາເຂດເສດຖະກິດສະເພາະ ບຶງທາດຫລວງ ເຊັ່ນກໍ່ສ້າງຖະໜົນຍາວ 400 ແມັດ ແລະ ກວ້າງ 36 ແມັດ ເຊື່ອມຕໍ່ຈາກສາມແຍກໂພນທັນເຂົ້າມາໃນໂຄງການ ການວາງແນວສາຍສົ່ງກະແສໄຟຟ້າ ລະບົບນ້ຳປະປາ ລະບົບກຳຈັດນ້ຳເປື້ອນ ການວາງແນວຖະໜົນຢູ່ພາຍໃນໂຄງການ ການຂຸດສວນນ້ຳຂະໜາດໃຫຍ່ ບົນເນື້ອທີ່ກວ້າງ 50 ເຮັກຕາ ແລະ ການກໍ່ສ້າງ ຫໍພັກ Condominium ສູງ 19 ຊັ້ນ ຈຳນວນ 12 ຕຶກ.
ໂດຍສຳຫລັບ Condominium ດັ່ງກ່າວ ກໍຄາດໝາຍວ່າ ຈະດຳເນີນການກໍ່ສ້າງແລ້ວເສັດຢ່າງສົມບູນທັງ 12 ຕຶກ ພາຍໃນເດືອນຕຸລາ 2016 ດັ່ງນັ້ນ ກຸ່ມບໍລິສັດຜູ້ລົງທຶນ ໃນໂຄງການ ຈຶ່ງໄດ້ເລີ້ມເປີດໃຫ້ທັງຄົນລາວ ແລະ ຊາວຕ່າງຊາດເຂົ້າໄປຈອງຊື້ຫ້ອງພັກອາໄສ ຫຼື ສຳນັກງານຢູ່ ຄອນໂດ ທັງ 12 ຕຶກດັ່ງກ່າວ ໄດ້ແລ້ວນັບແຕ່ເດືອນມີນານີ້ ເປັນຕົ້ນໄປ ໂດຍມີລາຄາເລີ້ມຕົ້ນທີ່ 400,000 ໂດລາ ສຳຫລັບ ຫ້ອງຂະໜາດ 4 ຫ້ອງນອນ ແລະ 4 ຫ້ອງນ້ຳ.
ແຕ່ຢ່າງໃດກໍຕາມ ການພັດທະນາດັ່ງກ່າວ ກໍໄດ້ມີຂຶ້ນໃນທ່າມກາງສະພາບການ ທີ່ກຸ່ມບໍລິສັດຈີນ ກໍຍັງບໍ່ສາມາດຕົກລົງກັບປະຊາຊົນລາວ ທີ່ພັກອາໄສຢູ່ໃນເຂດບຶງທາດຫລວງໄດ້ທັງໝົດ ໂດຍທີ່ມີສາເຫດມາຈາກການທີ່ກຸ່ມບໍລິສັດຈີນນັ້ນ ຈະຊົດເຊຍຄ່າທີ່ດິນ ໃນອັດຕາທີ່ຕ່ຳກວ່າຄວາມເປັນຈິງ ດັ່ງທີ່ເຈົ້າໜ້າທີ່ຂັ້ນສູງ ຂອງລາວ ໄດ້ໃຫ້ການຢືນຢັນວ່າ:
“ຜ່ານມານີ້ກະຖືວ່າມັນບໍ່ໄປຕາມລະບົບ ເລີຍເກີດມີບັນຫາຫຍຸ້ງຍາກ ເພາະວ່າ ບໍລິສັດນີ້ ໄປກວມເອົາດິນປະຊາຊົນ ໂຕນີ້ນິ ຄັນວ່າມັນໄປກວມດິນປະຊາຊົນແລ້ວ ກໍຕ້ອງໄດ້ແກ້ ໃຫ້ບໍລິສັດເປັນຜູ້ທົດແທນຫຼືວ່າ ຄັນປະຊາຊົນບໍ່ໃຫ້ ບາງເທື່ອນີ້ ກະບໍ່ໄດ້ ເພາະວ່າມັນບ່ອນທຳມາຫາກິນຂອງເຂົາເດ້.”
ທັງນີ້ໂດຍໂຄງການພັດທະນາເມືອງໃໝ່ ຢູ່ບຶງທາດຫລວງ ມີເນື້ອທີ່ສຳປະທານ 365 ເຮັກຕາ ຊຶ່ງເຮັດໃຫ້ຈະຕ້ອງມີການເວນຄືນທີ່ດິນ ຂອງປະຊາຊົນລາວຈຳນວນທັງໝົດ 480 ຕອນ ໂດຍຫລ້າສຸດກຸ່ມລົງທຶນຈາກຈີນ ໄດ້ລາຍງານວ່າ ສາມາດຕົກລົງ ແລະ ຈ່າຍຄ່າຊົດເຊີຍ ໃຫ້ກັບປະຊາຊົນລາວໄປແລ້ວ 98 ເປີເຊັນ ຄິດເປັນມູນຄ່າຫຼາຍກວ່າ 10 ລ້ານໂດລາ ຈຶ່ງຍັງເຫຼືອອີກພຽງ 2 ເປີເຊັນ ເທົ່ານັ້ນ ທີ່ຍັງບໍ່ສາມາດຕົກລົງໄດ້.