ເຈົ້າໜ້າທີ່ຈີນກ່າວວ່າ ຕົນໄດ້ທັບມ້າງໜ່ວຍກໍ່ການຮ້າຍ
ໜ່ວຍນື່ງ ທີ່ປະຕິບັດ ການຢູ່ໃນເຂດຊິນຈຽງ ທາງພາກ
ຕາເວັນຕົກຂອງຈີນ.
ໂຄສົກຂອງກະຊວງຮັກສາຄວາມໝັ້ນຄົງແຫ່ງຊາດຂອງຈີນ
ທ່ານ WU HE-PING ກ່າວຕໍ່ພວກນັກຂ່າວທີ່ນະຄອນ
ຫຼວງປັກກິ່ງ ໃນວັນພະຫັດມື້ນີ້ວ່າ ຕຳຫຼວດໄດ້ຈັບ
ຢ່າງນ້ອຍ 10 ຄົນແລະຢຶດໄດ້ບ່ອນເຊື່ອງວັດຖຸລະເບີດ
ແລະອາວຸດ ຂະໜາດໃຫຍ່ແຫ່ງນຶ່ງ. ການປະກາດຂ່າວ
ການຈັບກຸມດັ່ງກ່າວ ມີຂຶ້ນບໍ່ເທົ່າໃດມື້ ກ່ອນວັນຄົບຮອບປີ
ທຳອິດ ຂອງການກໍ່ຄວາມຮຸນແຮງທາງດ້ານຊົນເຜົ່າ ທີ່ເຂດ ຊິນຈຽງ ທີ່ເຮັດໃຫ້ມີ
ຜູ້ເສຍຊີວິດເກືອບ 200 ຄົນ.
ທ່ານ WU ເວົ້າວ່າ ພວກກໍ່ການຮ້າຍບາງຄົນມີຄວາມສຳພັນກັບຂະບວນການ
ອິສະລາມໃນ TURKESTAN ທີ່ປັກກິ່ງກ່າວຫາວ່າ ພວມຊອກຫາຊ່ອງທາງ
ເພື່ອສ້າງຕັ້ງລັດເອກກະຣາດໃນເຂດຊິນຈຽງ.
ກຸ່ມດັ່ງກ່າວຖືກກ່າວຫາວ່າ ໄດ້ວາງແຜນທຳການໂຈມຕີຈຳນວນນຶ່ງຢູ່ໃນພາກໃຕ້
ເຂດຊິນຈຽງ. ມີສະມາຊິກຂອງກຸ່ມຢ່າງນ້ອຍ 2 ຄົນສາມາດຫຼົບໜີການຈັບກຸມ
ຂອງທາງການໄປໄດ້. ທ່ານ WU ເວົ້າວ່າ ພວກກ່ຽວຖືກຈັບແລະໄດ້ຖືກສົ່ງໃຫ້ ຈີນ
ໃນເດືອນທັນວາປີກາຍນີ້ ແຕ່ບໍ່ໄດ້ບອກວ່າ ພວກຜູ້ຊາຍກຸ່ມນີ້ໄດ້ຖືກເນລະເທດ
ມາແຕ່ປະເທດໃດ. ໃນເດືອນດຽວກັນນີ້ ກຳປູເຈຍໄດ້ສົ່ງຊາວວີເກີ້ ຈຳນວນ 20 ຄົນ
ໃຫ້ແກ່ຈີນ ທີ່ກຳປູເຈຍເວົ້າວ່າ ໄດ້ເດີນທາງເຂົ້າປະເທດຢ່າງຜິດກົດ ໝາຍ.