ກະຊວງປ້ອງກັນປະເທດຂອງຈີນລາຍງານໃນວັນພຸດມື້ນີ້ວ່າ ຈີນ ໄດ້ຍິງລູກສອນໄຟຂີປະນາວຸດຂ້າມທະວີບທີ່ມີຫົວລະເບີດຈຳລອງເຂົ້າໄປໃນເຂດທະເລເປີດຂອງມະຫາສະໝຸດປາຊີຟິກ.
ກະຊວງກ່າວໃນຖະແຫຼງຂ່າວທີ່ເຜີຍແຜ່ລົງໃນເວັບໄຊທ໌ຂອງຕົນວ່າ “ລູກສອນໄຟ ໄດ້ຕົກລົງໃສ່ຂົງເຂດທະເລທີ່ໄດ້ຄາດການໄວ້. ການທົດສອບຄັ້ງນີ້ ແມ່ນການຈັດຕັ້ງທີ່ເປັນປົກກະຕິໃນແຜນການຝຶກອົບຮົມປະຈໍາປີຂອງພວກເຮົາ. ມັນເປັນການທົດລອງທີ່ສອດຄ່ອງກັບກົດໝາຍສາກົນ ແລະການປະຕິບັດສາກົນ ໂດຍບໍ່ໄດ້ແນໃສ່ປະເທດໃດນຶ່ງ ຫຼື ເປົ້າໝາຍໃດໆ.”
ຈີນ “ໄດ້ອອກມາແຈ້ງໃຫ້ບັນດາປະເທດທີ່ກ່ຽວຂ້ອງຮັບຮູ້ລ່ວງໜ້າແລ້ວ,” ອີງຕາມການລາຍງານຕ່າງຫາກຂອງອົງການຂ່າວຊິວຫົວ, ເຊິ່ງບໍ່ໄດ້ລະບຸເສັ້ນທາງຂອງລູກສອນໄຟ ຫຼື ສະຖານທີ່ ທີ່ມັນຕົກລົງຢູ່ຂົງເຂດມະຫາສະໝຸດປາຊີຟິກ.
ການຍິງລູກສອນໄຟຄັ້ງນີ້ “ເປັນການທົດສອບການປະຕິບັດງານຂອງອາວຸດ ແລະອຸປະກອນຕ່າງໆ ພ້ອມທັງເປັນການຝຶກອົບຮົມລະດັບກອງກໍາລັງຢ່າງມີປະສິດທິຜົນ, ແລະບັນລຸເປົ້າໝາຍທີ່ໄດ້ຄາດການເອົາໄວ້.”
ໃນປີ 1980, ຈີນ ໄດ້ທໍາການຍິງລູກສອນໄຟ ICBM ເຂົ້າສູ່ມະຫາສະໝຸດປາຊີຟິກຕອນໃຕ້, ອີງຕາມການລາຍງານຂອງຂ່າວ AP, ໂດຍສັງເກດວ່າ ແຜນທີ່ທີ່ພິມລົງໃນໜັງສືພິມຂອງຈີນເວລານັ້ນ ໄດ້ສະແດງໃຫ້ເຫັນເຂດເປົ້າໝາຍທີ່ມີລັກສະນະເປັນວົງມົນຢູ່ກາງວົງແຫວນທີ່ປະກອບດ້ວຍ ໝູ່ເກາະ ໂຊໂລມອນ, ໝູ່ເກາະ ນາວລູ (Nauru). ໝູ່ເກາະ ກີລເບີດທ໌ (Gilbert), ໝູ່ເກາະ ຕູວາລູ (Tuvalu), ໝູ່ເກາະ ຊາວມົວ ຕາເວັນຕົກ (Western Samoa), ໝູ່ເກາະ ຟີຈິ (Fiji) ແລະ ໝູ່ເກາະ ນິວ ເຮບຣີດີສ (New Hebrides).
ນັກວິເຄາະຄົນນຶ່ງກ່າວຕໍ່ອົງການຂ່າວ AFP ວ່າ ໂດຍປົກກະຕິແລ້ວ ຈີນ ດຳເນີນການທົດລອງຕ່າງໆຢູ່ໃນຂົງເຂດທີ່ເປັນນ່ານຟ້າຂອງຕົນ.
ທ່ານ ແອນຄິດ ປານດາ (Ankit Panda), ສະມາຊິກອາວຸໂສຂອງສູນກາງ Stanton ຢູ່ທີ່ອົງການ Carnegie Endowment ເພື່ອສັນຕິພາບລະຫວ່າງ ປະເທດກ່າວວ່າ “ນີ້ແມ່ນຜິດປົກກະຕິທີ່ສຸດ ແລະອາດຈະເປັນຄັ້ງທຳອິດໃນຮອບ ຫຼາຍສິບປີທີ່ພວກເຮົາໄດ້ເຫັນການທົດລອງແບບນີ້.”