ຈີນ ໃນວັນພະຫັດມື້ນີ້ ໄດ້ກ່າວວ່າ ການຮັບຮອງເອົາຮ່າງກົດໝາຍສະບັບນຶ່ງຂອງສະພາຕ່ຳ ສະຫະລັດ ທີ່ຈະບັງຄັບໃຫ້ແອັບພລີເຄຊັ້ນ TikTok ຕັດສາຍພົວພັນກັບບໍລິສັດແມ່ໃນ ຈີນ ຂອງເຂົາເຈົ້າ ຫຼື ຖືກຫ້າມໃນ ສະຫະລັດ ນັ້ນແມ່ນ “ຄວາມຄິດຂອງໂຈນຢ່າງສິ້ນເຊີງ.”
ແອັບພລີເຄຊັ້ນວິດີໂອສັ້ນດັ່ງກ່າວ ໄດ້ຮັບຄວາມນິຍົມໄປທົ່ວໂລກ ແຕ່ ບໍລິສັດຍັກໃຫຍ່ດ້ານເທັກໂນໂລຈີຂອງ ຈີນ ຊື່ວ່າ ByteDance ເປັນເຈົ້າຂອງ ແລະ ຖືກກ່າວຫາວ່າ ເປັນຜູ້ສົ່ງເສີມພັກຄອມມູນິສຂອງ ປັກກິ່ງ ທີ່ກຳລັງປົກຄອງປະເທດຢູ່ນັ້ນ, ໄດ້ກໍ່ໃຫ້ມີຄວາມເປັນຫ່ວງໃນບັນດາເມືອງຫຼວງຂອງປະເທດຕາເວັນຕົກ.
ໃນວັນພຸດວານນີ້, ສະພາຕ່ຳ ສະຫະລັດ ໄດ້ຮັບຮອງເອົາຮ່າງກົດໝາຍສະບັບນຶ່ງຢ່າງຖ້ວມລົ້ນທີ່ຈະບັງຄັບໃຫ້ TikTok ຖອນການລົງທຶນຂອງຕົນອອກຈາກບໍລິສັດແມ່ຂອງເຂົາເຈົ້າ ຫຼື ປະເຊີນກັບການຫ້າມໃນທົ່ວປະເທດ.
ຮ່າງກົດໝາຍດັ່ງກ່າວແມ່ນຍັງບໍ່ໄດ້ຖືກຜ່ານໃນສະພາສູງເທື່ອ, ບ່ອນທີ່ມີການຄາດວ່າຈະປະເຊີນກັບການທົດສອບທີ່ຍາກກວ່າ ເມື່ອເວົ້າເຖິງກົດໝາຍ.
ໂຄສົກກະຊວງການຕ່າງປະເທດ ຈີນ ທ່ານ ຫວັງ ເວັນບິນ ໄດ້ກ່າວຕໍ່ກອງປະຊຸມຖະແຫຼງຂ່າວປົກກະຕິວ່າ “ຮ່າງກົດໝາຍທີ່ຖືກຮັບຜ່ານໂດຍສະພາຕ່ຳ ສະຫະລັດ ຈະເຮັດໃຫ້ ສະຫະລັດ ຢູ່ຝ່າຍກົງກັນຂ້າມກັບກົດເກນຂອງການແຂ່ງຂັນທີ່ເປັນທຳ ແລະ ເສດຖະກິດສາກົນ ແລະ ກົດລະບຽບການຄ້າ.”
ທ່ານໄດ້ກ່າວວ່າ “ຖ້າອັນທີ່ວ່າເຫດຜົນ ກ່ຽວກັບ ຄວາມໝັ້ນຄົງແຫ່ງຊາດສາມາດຖືກໃຊ້ເພື່ອທຳການກົດຂີ່ຕາມອຳເພີໃຈ ຕໍ່ບັນດາບໍລິສັດທີ່ດີເລີດຈາກປະເທດອື່ນໆນັ້ນ, ແລ້ວມັນກໍຈະບໍ່ມີຄວາມເປັນທຳ ແລະ ຢຸດຕິທຳເລີຍ.”
ທ່ານກ່າວວ່າ “ເວລາທີ່ຄົນໃດຄົນນຶ່ງເຫັນຄົນອື່ນມີສິ່ງທີ່ດີ ແລະ ພະຍາຍາມຈະເອົາມັນມາເປັນຂອງຕົນເອງ, ນີ້ແມ່ນຄວາມຄິດຂອງໂຈນຢ່າງສິ້ນເຊີງ.”
ທ່ານກ່າວອີກວ່າ “ການຮັບມືຂອງ ສະຫະລັດ ກ່ຽວກັບ ເຫດການຂອງ TikTok ຈະເຮັດໃຫ້ໂລກໄດ້ເຫັນຢ່າງຈະແຈ້ງກວ່າເກົ່າວ່າ ສິ່ງທີ່ເອີ້ນວ່າກົດເກນ ແລະ ຄວາມເປັນລະບຽບຂອງ ສະຫະລັດ ແມ່ນເປັນປະໂຫຍດຕໍ່ໂລກຫຼືບໍ່, ຫຼື ມັນໃຊ້ໄດ້ກັບແຕ່ ສະຫະລັດ ພຽງເທົ່ານັ້ນ.”
ອ່ານຂ່າວນີ້ເປັນພາສາອັງກິດ
Your browser doesn’t support HTML5
US House Passes Bill Forcing TikTok to Separate From Chinese Parent Company