ເຈົ້າໜ້າທີ່ຂັ້ນສູງກ່ຽວກັບວຽກງານຮົງກົງຂອງຈີນກ່າວວ່າ ເມືອງແຫ່ງນີ້ ຄວນ “ຢຶດໝັ້ນ” ບົນພື້ນຖານຂອງຄວາມໝັ້ນຄົງແຫ່ງຊາດ ເພື່ອປົກປ້ອງການພັດທະນາ, ໃນຄຳປາໄສທີ່ກໍາລັງຈະມີຂຶ້ນໃນອີກບໍ່ເທົ່າໃດອາທິດ ຫຼັງຈາກມີການປະກາດໃຊ້ກົດໝາຍວ່າດ້ວຍຄວາມໝັ້ນຄົງສະບັບໃໝ່ ໃນທັນທີ.
ທ່ານເຊຍ ບາວຫຼົງ (Xia Baolong) ຜູ້ອຳນວຍການກ່ຽວກັບວຽກງານກິດຈະການຢູ່ໃນ ມາເກົ້າ ແລະ ຮົງກົງ ຂອງປັກກິ່ງ ກ່າວຢູ່ຄໍາປາໄສ ໃນວັນຄວາມໝັ້ນຄົງແຫ່ງຊາດປະຈໍາປີວ່າ “ເພື່ອກ້າວໄປສູ່ການປົກຄອງ ແລະຄວາມຈະເລີນຮຸ່ງເຮືອງ, ພວກເຮົາຈໍາເປັນຕ້ອງຢຶດໝັ້ນບົນພື້ນຖານດ້ານຄວາມໝັ້ນຄົງແຫ່ງຊາດຢ່າງໜັກແໜ້ນ ເພື່ອປົກປັກຮັກສາການພັດທະນາທີ່ມີຄຸນນະພາບສູງຂອງຮົງກົງ.”
ຮົງກົງ, ໄດ້ປະກາດໃຊ້ກົດໝາຍວ່າດ້ວຍຄວາມໝັ້ນຄົງແຫ່ງຊາດສະບັບໃໝ່ ໃນເດືອນມີນາ, ເຊິ່ງຮ້ອງໃນອີກຊື່ນຶ່ງວ່າ ມາດຕາ 23, ເຊິ່ງເປັນກົດໝາຍທີ່ໄດ້ຮັບການປັບປຸງ ຫຼື ນຳສະເໜີກົດໝາຍສະບັບໃໝ່ ທີ່ມີຂໍ້ຫ້າມບໍ່ໃຫ້ ທໍລະຍົດຊາດ, ກໍ່ວິນາດສະກໍາ, ການປຸກລະດົມ, ການລັກ ລວມທັງການຈາລະກໍາຄວາມລັບ ແລະການສອດແນມ, ໂດຍມີໂທດຈຳຄຸກສູງສຸດຕະຫຼອດຊີວິດ.
ແນວໃດກໍ່ຕາມ, ທ່ານ ເຊຍ ພະຍາຍາມເນັ້ນຢໍ້າວ່າ ກົດໝາຍດັ່ງກ່າວບໍ່ໄດ້ຖືກວາງອອກມາເພື່ອເປັນໄພຂົ່ມຂູ່ຕໍ່ນັກລົງທຶນ, ເຊິ່ງເປັນຊ່ວງໄລຍະເວລາທີ່ເມືອງດັ່ງກ່າວ ໄດ້ປະເຊີນກັບການຕໍາໜິວິຈານຂອງບັນດາປະເທດຕາເວັນຕົກ ກ່ຽວກັບການປາບປາມຜູ້ຄັດຄ້ານທີ່ຍືດເຍື້ອຍາວນານ, ແລະໄດ້ພົບກັບຄວາມຫຍຸ້ງຍາກທາງດ້ານການເງິນ ແລະດ້ານເສດຖະກິດ.
ທ່ານ ເຊຍ ກ່າວວ່າ “ສໍາລັບປະຊາຊົນທົ່ວໄປໃນຮົງກົງ ແລະບັນດານັກລົງທຶນຕ່າງປະເທດ, ກົດຫມາຍສະບັບນີ້ ແມ່ນການປົກປ້ອງສິດທິ, ສິດເສລີພາບ, ຊັບສິນ ແລະການລົງທຶນຂອງພວກເຂົາເຈົ້າ.”
ທ່ານກ່າວຕື່ມວ່າ “ບັນດານັກລົງທຶນຈາກທົ່ວໂລກ ສາມາດເຂົ້າມາຮົງກົງເພື່ອທໍາການລົງທຶນໃນດ້ານທຸລະກິດໃຫມ່ໆຢ່າງກ້າຫານ ແລະບໍ່ຕ້ອງກັງວົນໃດໆ. ຮົງກົງ ຍັງຄົງເປັນສະຖານທີ່ທີ່ດີທີ່ສຸດໃນໂລກ ເພື່ອດໍາເນີນທຸລະກິດ ພ້ອມທັງສ້າງລາຍຮັບ ແລະບັນລຸຕາມຄວາມຝັນຂອງພວກເຂົາເຈົ້າ.”