ອົງການຂ່າວທາງການຊິນຫົວລາຍງານວ່າ ກອງທັບເຮືອຂອງ ຈີນ ແລະ ຣັດເຊຍ ໄດ້ເລີ້ມດໍາເນີນການຊ້ອມລົບຮ່ວມກັນ ຢູ່ທ່າກຳປັ່ນພາກໃຕ້ຂອງຈີນໃນວັນອາທິດແລ້ວນີ້, ເປັນເວລາພຽງບໍ່ເທົ່າໃດມື້ລຸນຫຼັງບັນດາປະເທດພັນທະມິດອົງ ການ NATO ຮ້ອງປັກກິ່ງວ່າເປັນ “ຜູ້ສະໜັບສະໜູນທີ່ເດັດຂາດ” ຂອງສົງຄາມຢູ່ໃນ ຢູເຄຣນ, ອີງຕາມລາຍງານຂອງອົງການຂ່າວ AP.
ກະຊວງປ້ອງກັນປະເທດຈີນກ່າວໃນຖະແຫຼງການໂດຍຫຍໍ້ເມື່ອບໍ່ດົນມານີ້ວ່າ ກອງກຳລັງຂອງທັງສອງຝ່າຍ ໄດ້ພາກັນລາດຕະເວນຢູ່ພາກຕາເວັນຕົກ ແລະພາກເໜືອຂອງມະຫາສະໝຸດປາຊີຟິກ, ພ້ອມທັງກ່າວວ່າ ການປະຕິບັດງານດັ່ງກ່າວ ບໍ່ມີຫຍັງກ່ຽວຂ້ອງກັບສະຖານະການສາກົນ ຫຼື ສະຖານະການທີ່ເກີດຂຶ້ນ ຢູ່ໃນພາກພື້ນ ແລະບໍ່ໄດ້ແນເປົ້າໝາຍໃສ່ຝ່າຍທີສາມໃດໆ.
ໂທລະພາບຂອງລັດຖະບານ CCTV ລາຍງານໃນວັນເສົາແລ້ວນີ້ວ່າ ການຊ້ອມລົບດັ່ງກ່າວ ເຊິ່ງເລີ້ມຂຶ້ນຢູ່ແຂວງກວາງຕຸ້ງໃນວັນອາທິດແລ້ວນີ້ ແລະຄາດວ່າຈະແກ່ຍາວຈົນຮອດກາງເດືອນກໍລະກົດ, ໂດຍແນໃສ່ເພື່ອສະແດງໃຫ້ເຫັນ ເຖິງຄວາມສາມາດຂອງກອງທັບເຮືອ ທີ່ເນັ້ນໜັກເຖິງໄພຂົ່ມຂູ່ດ້ານຄວາມໝັ້ນ ຄົງ ແລະເພື່ອປົກປັກຮັກສາສັນຕິພາບ ພ້ອມທັງສະຖຽນລະພາບຢູ່ໃນທົ່ວໂລກ ແລະໃນພາກພື້ນ. ແລະກ່າວຕື່ມວ່າ ໃນການຊ້ອມລົບຄັ້ງນີ້ລວມມີການຊ້ອມລົບຕ້ານລູກສອນໄຟ, ການຊ້ອມລົບຕ້ານການໂຈມຕີທາງທະເລ ແລະ ການປ້ອງກັນທາງອາກາດ.
ອົງການຂ່າວຊິນຫົວລາຍງານວ່າ ກອງທັບເຮືອຂອງ ຈີນ ແລະ ຣັດເຊຍ ໄດ້ທໍາການຊ້ອມລົບດ້ວຍການຈຳລອງທາງທະຫານຢູ່ເທິງແຜນທີ່ ແລະຍຸດທະ ສາດການຊ້ອມລົບຮ່ວມ ພາຍຫຼັງເປີດພິທີຢູ່ທີ່ເມືອງຊານຈຽງ.
ການຊ້ອມລົບຮ່ວມດັ່ງກ່າວນີ້ ມີຂຶ້ນຍ້ອນຄວາມເຄັ່ງຕຶງຄັ້ງຫຼ້າສຸດຂອງຈີນ ກັບບັນດາປະເທດພັນທະມິດອົງການ NATO ໃນອາທິດແລ້ວນີ້.