ເສດຖະກິດຂອງ ຈີນ ໄດ້ເໜັງຕີງຢ່າງຊັກຊ້າໃນ 3 ເດືອນສຸດທ້າຍຂອງປີ 2015, ແລະ ເຕີບໂຕຂຶ້ນພຽງແຕ່ 6.9 ເປີເຊັນ. ມັນເປັນໄລຍະທີ່ອ່ອນແອທີ່ສຸດສຳລັບປະເທດທີ່ມີເສດຖະກິດໃຫຍ່ເປັນອັນດັບສອງຂອງໂລກ ຕັ້ງແຕ່ເສດຖະກິດໂລກໄດ້ຂະຫຍາຍຕົວຊ້າລົງເປັນຕົ້ນມາ.
ຕົວເລກທີ່ໄດ້ເປີດເຜີຍໃນວັນຈັນມື້ນີ້ໂດຍສຳນັກງານສະຖິຕິແຫ່ງຊາດຂອງ ຈີນ ໄດ້ໝາຍເປັນຄັ້ງທຳອິດ ອັດຕາການຂະຫຍາຍຕົວ ສຳລັບຍອດຜະລິດຕະພັນພາຍໃນຂອງ ຈີນ ທີ່ໄດ້ຕົກລົງຕ່ຳກວ່າ 7 ເປີເຊັນຕັ້ງແຕ່ໄຕມາດທີ 2 ຂອງປີ 2009, ເມື່ອມັນຕົກລົງເຖິງ 6.2 ເປີເຊັນ. ທາງສຳນັກງານໄດ້ກ່າວວ່າ ປະລິມານການຜະລິດຂອງໂຮງຈັກໂຮງງານເພີ່ມຂຶ້ນພຽງ 5.7 ເປີເຊັນໃນເດືອນກັນຍາທີ່ຜ່ານມາ, ເປັນສັນຍານຂອງເສດຖະກິດຝືດເຄືອງຕື່ມອີກ.
ເສດຖະກິດຂອງ ຈີນ ໄດ້ເຕີບໂຕຂຶ້ນໃນລະດັບທີ່ຊ້າທີ່ສຸດໃນ 25 ປີ, ຍ້ອນຄວາມຮຽກຮ້ອງຕ້ອງການສຳລັບການສົ່ງອອກທີ່ອ່ອນລົງ, ແລະ ທັງທີ່ວ່າ ມີການຕັດອັດຕາດອກເບ້ຍ 5 ຄັ້ງ ຕັ້ງແຕ່ເດືອນພະຈິກທີ່ຜ່ານມາ ແລະ ໄດ້ເພີ່ມການໃຊ້ຈ່າຍໃນພື້ນຖານໂຄງລ່າງ. ການຕົກຕ່ຳຂອງຕະຫຼາດຫຼັກຊັບເມື່ອບໍ່ດົນມານີ້ ແລະ ການຫຼຸດຄ່າເງິນຢວນຂອງ ປັກກິ່ງ ໄດ້ເພີ່ມ ບັນຫາຂຶ້ນຕື່ມ.
ໂຄສົກສຳລັບສຳນັກງານສະຖິຕິໄດ້ກ່າວຕໍ່ບັນດານັກຂ່າວໃນ ປັກກິ່ງ ວ່າເສດຖະກິດກຳລັງປະເຊີນໜ້າກັບ “ຄວາມກົດດັນໃນທາງລົບ” ໃນຂະນະທີ່ປະເທດປ່ຽນແປງຈາກເສດຖະກິດ ການສົ່ງອອກ ຫາ ເສດຖະກິດຕາມຄວາມຮຽກຮ້ອງຕ້ອງການຂອງຜູ້ບໍລິໂພກ.
ການຂາຍຍ່ອຍໄດ້ເພີ່ມຂຶ້ນໃນອັດຕາສະເລ່ຍປະຈຳປີ 10.9 ເປີເຊັນ ໃນເດືອນສິງຫາທີ່ຜ່ານມາ. ການລົງທຶນອະສັງຫາລິມະຊັບ, ເຊິ່ງວັດແທກຄ່າໃຊ້ຈ່າຍຂອງລັດຖະບານໃນພື້ນຖານໂຄງລ່າງ, ໄດ້ຂະຫຍາຍ ອອກ 10.3 ເປີເຊັນ ໃນລະຫວ່າງ ເດືອນມັງກອນ ຫາ ກັນຍາ ຂອງປີນີ້.