ທ່ານ Liu Jianchao ເອກອັກຄະລັດຖະທູດຈີນ ກ່າວວ່າ ຂົງເຂດທະເລຈີນໃຕ້ຈະເປັນນຶ່ງ
ໃນຫລາຍໆບັນຫາ ທີ່ຈະຍົກຂຶ້ນມາປຶກສາຫາລືກັນ ໃນລະຫວ່າງການຢ້ຽມຢາມຈີນເປັນ
ເວລາຫ້າວັນຂອງປະທານາທິບໍດີຟິລິບປິນ ທ່ານ ເບນິກໂນ ອາຄີໂນ ທີ່ຈະເລິ່ມຕົ້ນໃນວັນ
ທີ 30 ເດືອນ ສິງຫາ ມື້ອື່ນນີ້. ເອກອັກຄະລັດຖະທູດ ຫລິວ ກ່າວວ່າ:
“ເນຶ່ອງຈາກວ່າບັນຫາດັ່ງກ່າວນີ້ ໄດ້ຍືດເຍື້ອມາເປັນເວລາຫລາຍສິບປີແລ້ວແລະ
ພວກເຮົາກໍ່ບໍ່ສາມາດຈະຄາດຫວັງວ່າ ຈະແກ້ໄຂຕົກລົງກັນໄດ້ໂດຍຜ່ານການຢ້ຽມ
ຢາມຄັ້ງນີ້ເທົ່ານັ້ນ. ແຕ່ຂ້າພະເຈົ້າກໍຮູ້ວ່າ ການຢ້ຽມຢາມຄັ້ງນີ້ຈະສົ່ງເສີມແລະຍົກ
ລະດັບຄວາມເຂົ້າໃຈຊຶ່ງກັນແລະກັນ ຂອງຜູ້ນໍາທັງສອງຂອງທັງສອງລັດຖະບານ ໃຫ້ສູງຂຶ້ນ.”
ການອ້າງເອົາກໍາມະສິດຕ່າງໆໃນຂົງເຂດທະເລຈີນໃຕ້ນັ້ນ ໄດ້ເປັນຈຸດແຫ່ງຄວາມບາດ
ໝາງຜິດຂ້ອງໝອງໃຈກັນ ລະຫວ່າງປະເທດທັງສອງມາຕະຫລອດປີນີ້. ພວກເຈົ້າໜ້າທີ່ຟິ
ລິບປິນລາຍງານວ່າ ມີຢ່າງໜ້ອຍເຈັດຄັ້ງ ທີ່ໄດ້ມີການປະເຊີນໜ້າກັບກໍ່າປັ່ນຂອງຈີນຢູ່ໃນ
ອານາເຂດ ທີ່ມະນິລາອ້າງເອົາເປັນເຂດເສດຖະກິດຂອງຕົນໂດຍສະເພາະນັ້ນ. ເຂດແດນ
ຂອງແຕ່ລະປະເທດ ທີ່ກໍານົດໃຫ້ໂດຍອົງການສະຫະປະຊາຊາດນັ້ນ ແມ່ນຍື່ນກາຍເຂດ
ແນວຝັ່ງຂອງປະເທດອອກໄປ 370 ກິໂລແມດ. ແຕ່ຈີນກ່າວວ່າ ຕົນບໍ່ໄດ້ລ່ວງລໍ້າຫຍັງ
ເນຶ່ອງຈາກວ່າຈີນໄດ້ອ້າງເອົາເຂດດັ່ງກ່າວມາ ໄດ້ນຶ່ງສັດຕະວັດແລ້ວ ຊຶ່ງຈີນເວົ້າວ່າ
ອໍານວຍໃຫ້ຈີນມີອະທິປະໄຕໃນຂົງເຂດທະເລຈີນໃຕ້ທັງໝົດ.
ເຂດທະເລດັ່ງກ່າວມີເສັ້ນທາງເດີນເຮືອທີ່ສໍາຄັນໆຫລາຍເສັ້ນ ແລະເຊື່ອວ່າເປັນເຂດທີ່
ອຸດົມສົມບູນໄປດ້ວຍບໍ່ແກສທໍາມະຊາດແລະນໍ້າມັນ. ນອກຈາກຈີນ ແລະຟິລິບປິນແລ້ວ
ກໍມີຫວຽດນາມ ມາເລເຊຍ ບຣູໄນ ແລະໄຕ້ຫວັນ ທີ່ພາກັນອ້າງເອົາກໍາມະສິດຊ້ອນກັນ ໃນຂົງເຂດນີ້.
ຟິລິບປິນໄດ້ພະຍາຍາມຜັກດັນ ໃຫ້ມີການແກ້ໄຂຕົກລົງກັນໃນເລຶ່ອງນີ້ ໂດຍຜ່ານສານຂອງ
ອົງການສະຫະປະຊາຊາດ ແຕ່ຈີນໄດ້ເວົ້າຊໍ້າແລ້ວຊໍ້າອີກວ່າ ຕົນຢາກໃຫ້ມີການເຈລະຈາກັນ
ສອງຕໍ່ສອງເທົ່ານັ້ນ ກັບແຕ່ລະປະເທດ ປາດສະຈາກການຫຍຸ້ງກ່ຽວໃດໆຈາກມືທີ່ສາມ. ຕະຫລອດໄລຍະແຫ່ງການຖົກຖຽງກັນມານີ້ ຟິລິບປິນໄດ້ເວົ້າຢູ່ຕະຫລອດມາວ່າ ການຮ່ວມມື ແລະການສໍາຫລວດຮ່ວມກັນໃນຂົງເຂດທີ່ເປັນກໍລະນີພິພາດນັ້ນ ຄວນຈະເປັນວິທີທາງທີ່ຈະດໍາເນີນໄປໜ້າໄດ້.
ໃນລະຫວ່າງການຖະແຫລງຕໍ່ພວກນັກຂ່າວທ້ອງຖິ່ນແລະຕ່າງປະເທດ ທີ່ນະຄອນຫລວງ
ມະນິລາ ໃນວັນພຸດອາທິດແລ້ວນີ້ ທ່ານເອກອັກຄະລັດຖະທູດ ຫລິວ ຍັງໄດ້ຮຽກຮ້ອງໃຫ້ມີ
ການດໍາເນີນຄວາມພະຍາຍາມຮ່ວມກັນ ແລະກ່າວວ່າ ຈີນແມ່ນຕ້ອງການຄວາມພະຍາ
ຍາມທໍານອງນັ້ນ ມາຕັ້ງແຕ່ປີ 1985. ເອກອັກຄະລັດຖະທູດ ຫລິວ ເວົ້າວ່າ:
“ພວກເຮົາຕຽມພ້ອມທີ່ຈະມີການສໍາຫລວດແລະ ທໍາການພັດທະນາຮ່ວມກັນ
ກັບພວກປະເທດອື່ນໆທີ່ອ້າງເອົາກໍາມະສິດໃນຂົງເຂດທັງໝົດ ຄືກັນນັ້ນ.
ແນ່ນອນທີ່ສຸດ ພວກເຮົາຈະຕ້ອງບັນລຸການເຫັນພ້ອງຕ້ອງກັນ ແລະຕ້ອງໄດ້
ມີຂໍ້ຕົກລົງກັນຢ່າງໃດຢ່າງນຶ່ງ ກ່ຽວກັບວ່າພວກເຮົາຈະສາມາດຮ່ວມໄມ້ຮ່ວມມື
ກັນເຊັ່ນນັ້ນໄດ້ ຢູ່ບ່ອນໃດ ແລະ ແບບໃດ.”
ເອກອັກຄະລັດຖະທູດຫລິວ ກ່າວຕໍ່ໄປວ່າ ຈີນແມ່ນຈະຕ້ອງໄດ້ສຶກສາເພີ່ມຕື່ມ ໃນເລື່ອງ
ແນວຄິດຂອງຟິລິບປິນ ກ່ຽວກັບການເປັນພາຄີກັນນັ້ນວ່າ ຈະເປັນແບບໃດກັນແທ້.
ເມື່ອຕົ້ນອາທິດແລ້ວນີ້ ກ່ອນໜ້າການອອກມາຖະແຫລງຕໍ່ນັກຂ່າວຂອງເອກອັກຄະລັດຖະ
ທູດຈີນນັ້ນ ກໍ່າປັ່ນທະຫານລໍາໃຫຍ່ທີ່ສຸດແລະໃໝ່ທີ່ສຸດຂອງຟິລິບປິນ ໄດ້ເຂົ້າຈອດທີ່ທ່າ
ກໍາປັ່ນນະຄອນຫລວງມະນິລາ. ກໍ່າປັ່ນດັ່ງກ່າວ ມີຄວາມຍາວ 115 ແມດ ແລະມີຊື່ວ່າ
BSP Gergorio Del Pilar. ພາລະກິດຫລັກຂອງກໍາປັ່ນລໍານີ້ ກໍຄືປົກປ້ອງຄຸ້ມຄອງເຂດ
ນໍ້າແດນດິນ ທີ່ຟິລິບປິນອ້າງເອົາກໍາມະສິດ ໃນຂົງເຂດທະເລຈີນໃຕ້ນັ້ນ.
ປະທານາທິບໍດີ Benigno Aquino III ຂຶ້ນໄປເບິ່ງກໍາປັ່ນ BRP Gregorio Del Pilar (PF15) ໃນພິທີຕ້ອນ ຮັບກໍາປັ່ນລໍາໃໝ່ສຸດແລະໃຫຍ່ສຸດ ຂອງຟີລິບປີນ ຢູ່ທ່າເຮືອນະຄອນ ຫລວງມະນີລາ, ວັນທີ 23 ສິງຫາ 2011.
ໃນການກ່າວຄໍາປາໃສເມື່ອວັນອັງຄານອາ
ທິດແລ້ວນີ້ ໃນໂອກາດຕ້ອນຮັບກໍາປັ່ນລົບ
cutter ລຸ້ນ Hamilton ອາຍຸ 46 ປີ ທີ່ຊື້
ຈາກສະຫະລັດນັ້ນ ປະທານາທິບໍດີອາຄິໂນ
ໄດ້ເນັ້ນຍໍ້າເຖິງຄວາມຕັ້ງໃຈຂອງປະເທດ
ຂອງທ່ານໃນການເສີມສ້າງສະມັດທະພາບ
ທາງດ້ານທະຫານຂອງຕົນ ເພື່ອປ້ອງກັນ ຕົນເອງນັ້ນ.
ປະທານາທິບໍດີ ອາຄິໂນ ກ່າວວ່າ ກໍ່າປັ່ນທີ່
ທັນສະໄໝລໍານີ້ ເປັນສັນຍາລັກຂອງຄວາມ
ສາມາດທີ່ຟິລິບປິນໄດ້ມາໃໝ່ໆ ເພື່ອພິທັກ
ປົກປ້ອງ ປ້ອງກັນ ແລະ ຖ້າຈໍາເປັນ ກໍຕໍ່ສູ້
ເພື່ອຜົນປະໂຫຍດຂອງປະເທດຂອງທ່ານ.
ຢ່າງໃດກໍຕາມ ພວກເຈົ້າໜ້າທີ່ຟິລິບປິນກ່າວ
ວ່າ ການຢ້ຽມຢາມຈີນຂອງປະທານາທິບໍດີ
ອາຄິໂນໃນຄັ້ງນີ້ ແມ່ນຈະເນັ້ນໜັກເປັນສ່ວນ
ໃຫຍ່ໃສ່ການຊຸກຍູ້ສົ່ງເສີມການຄ້າ ການ
ຮ່ວມມືດ້ານເສດຖະກິດ ແລະການທ່ອງທ່ຽວ ລະຫວ່າງປະເທດທັງສອງ.
ທ່ານນາງ Christine Ortega ລັດຖະມົນຕີຊ່ວຍວ່າການຕ່າງປະເທດຟີລິບປິນໄດ້ບອກ
ພວກຜູ້ສື່ຂ່າວເມື່ອວັນພຸດອາທິດແລ້ວນີ້ວ່າ ພວກເຈົ້າໜ້າທີ່ຟິລິບປິນບໍ່ຄາດວ່າ ຈະມີການ
ປະຊຸມແບບປະເຊີນໜ້າກັນ ກ່ຽວກັບອານາເຂດທີ່ເປັນກໍລະນີພິພາດກັນນັ້ນແຕ່ຢ່າງໃດ.
ແຕ່ທ່ານນາງ Ortega ກໍໄດ້ເວົ້າວ່າ ທ່ານອາຄິໂນຈະຍົກຂຶ້ນມາປຶກສາກັນ ບັນຫາຂົງເຂດ
ທະເລຟິລິບປິນຕາເວັນຕົກ ຊຶ່ງເປັນຊື່ທີ່ລັດຖະບານຟິລິບປິນເອີ້ນ ຂົງເຂດທະເລີຈີນໃຕ້ນັ້ນ.