ຈີນທີ່ມີຄວາມໂກດແຄ້ນບໍ່ພໍໃຈ ແລະຟີລິບປິນທີ່ມີຄວາມດີອົກດີໃຈ ກຳລັງຊອກ ຫາຊ່ອງທາງເພື່ອເປີດການເຈລະຈາຢ່າງເປັນທາງການ ຊຶ່ງເປັນການເຄື່ອນໄຫວ ທາງດ້ານການເມືອງ ທີ່ໄດ້ຮັບຄວາມສະໜັບສະໜຸນຈາກປະຊາຊົນ ໃນຂະນະທີ່ມັນອາດຈະຊ່ອຍບໍ່ໃຫ້ເກີດການຂັດແຍ້ງດ້ວຍອາວຸດຫລັງຈາກສານຂອງອົງການ ສະຫະປະຊາຊາດ ໄດ້ປະຕິເສດໃນວັນອັງຄານວານນີ້ ຕໍ່ພື້ນຖານທາງກົດໝາຍທີ່ປັກກິ່ງຈະອ້າງເອົາກຳມະສິດຢູ່ໃນ ທະເລຈີນໃຕ້ ທີ່ມີການຂັດແຍ້ງກັນນັ້ນ.
ລັດຖະມົນຕີການຕ່າງປະເທດຈີນ ທ່ານ Wang Yi ໄດ້ກ່າວເຍາະເຍີ້ຍຕໍ່ການຕັດສິນຂອງສານສະຫະປະຊາຊາດ ທີ່ໄດ້ປະຕິເສດເຖິງຄວາມສົມບູນ ກ່ຽວກັບ ພື້ນຖານທາງກົດໝາຍຂອງຈີນ ພາຍໃຕ້ອັນທີ່ເອີ້ນວ່າ “nine-dash-line” ທີ່ໄດ້ອ້າງເອົາກຳມະສິດຂອງພື້ນທີ່3 ລ້ານ 5 ແສນກິໂລແມັດມົນທົນ ຂອງທະເລທີ່ເຕັມໄປດ້ວຍປູປານານ້ຳ ນ້ຳມັນ ແກັສທຳ
ມະຊາດ ແລະເສັ້ນທາງເດີນເຮືອ ທີ່ສຳຄັນຂອງໂລກ. ແຕ່ໃນຂະນະດຽວກັນ ທ່ານກໍໃຫ້ຮ່ອງຮອຍ ທີ່ວ່າຈີນຕ້ອງການເປີດການຫາລືກັນ.
ເວລານີ້ ລະຄອນຕະລົກໄດ້ສິ້ນສຸດລົງແລ້ວ ແລະມັນເປັນເວລາທີ່ຈະກັບຄືນໄປສູ່ເສັ້ນ ທາງທີ່ຖືກຕ້ອງ ທ່ານກ່າວໃນຕອນແລງຂອງວັນອັງຄານວານນີ້. ຝ່າຍຈີນໄດ້ສັງເກດເຫັນ ວ່າ ລັດຖະບານໃໝ່ຂອງຟີລິບປິນຫວ່າງບໍ່ດົນມານີ້ ໄດ້ອອກຖະແຫລງຂ່າວເປັນລຳດັບ ມາ ສະແດງໃຫ້ເຫັນວ່າ ຕົນເຕັມໃຈທີ່ຈະເລີ້ມການເຈລະຈາຄືນອີກກັບຈີນ ກ່ຽວກັບບັນ ຫາໃນທະເລຈີນໃຕ້.
ປັກກິ່ງໄດ້ກ່າວມາເປັນເວລາດົນນານແລ້ວວ່າ ຕົນຕ້ອງການຢາກໃຫ້ມີການເຈລະຈາສອງ ຝ່າຍເພື່ອແກ້ໄຂບັນຫາຂັດແຍ້ງທາງທະເລແທນທີ່ຈະໃຊ້ການເຈລະຈາຫລາຍຝ່າຍ.
ຊາວຟິລິບປີນ ພາກັນສະຫລອງຫລັງຈາກ ສານສະຫະປະຊາຊາດ ທີ່ນະຄອນ Hague ຕັດສິນເຫັນພ້ອມກັບຟິລິບປີນ ໃນຄະດີຕ້ານຈີນ ທີ່ໂຕ້ຖຽງກັນ ກ່ຽວກັນນ່ານນໍ້າທະເລຈີນໃຕ້.
ທີ່ນະຄອນຫລວງມະນີລາໃນວັນອັງຄານວານນີ້ ລັດຖະມົນຕີການຕ່າງປະເທດຟີລິບປິນ ທ່ານ Perfecto Yasay ເອີ້ນການຕັດສິນນີ້ວ່າ ເປັນການຕັດສິນທີ່ສຳຄັນ ໂດຍເວົ້າວ່າ ການຕັດສິນນີ້ ແມ່ນໄດ້ປະກອບສ່ວນຢ່າງສຳຄັນເຂົ້າໃນການ ແກ້ໄຂບັນຫາຂັດແຍ້ງທາງທະເລທີ່ພວມດຳເນີນຢູ່ແລະຮຽກຮ້ອງໃຫ້ທຸກພັກຝ່າຍ ໃຊ້ຄວາມຢັບຢັ້ງ.
ຮູບພາບຈາກດາວທຽມ ສະແດງໃຫ້ເຫັນນ່ານນໍ້າເອເຊຍ ຈາກສູນກາງຍຸດທະສາດ ທີ່ນະຄອນຫລວງ ວໍຊິງຕັນ.
ສ່ວນປະທານາທິບໍດີຟີລິບປິນ ທ່ານ Rodrigo Duterte ທີ່ຫາກໍເຂົ້າຮັບຕຳ ແໜ່ງເມື່ອ ວັນທີ 30 ມີຖຸນາຜ່ານມານີ້ ກ່າວວ່າ ທ່ານຕ້ອງການຢາກເຈລະຈາ ແບບສອງຕໍ່ສອງກັບ ຈີນ ເຖິງແມ່ນວ່າທ່ານໄດ້ສະແດງທ່າທາງຢ່າງແຂງຂັນກວ່ານີ້ ໃນລະຫວ່າງການໂຄສະນາ ຫາສຽງ ທີ່ເຕັມໄປດ້ວຍການໃຊ້ຄຳເວົ້າທີ່ບໍ່ສຸພາບ ແລະການໃຫ້ຄຳໝັ້ນສັນຍາຕ່າງໆນັ້ນ.
Your browser doesn’t support HTML5
UN Arbitration Court Rules Against China's South Sea Claims
v