ຍີ່ປຸ່ນຍົກເລີກແຜນການທີ່ຈະສ້າງລົດໄຟທີ່ຊ່ອຍການເດີນທາງຂຶ້ນພູໄຟຟູຈິເອງ ແລະກຳລັງພິຈາລະນາວ່າ ຈະໃຊ້ລະບົບຂອງຈີນ ທີ່ປະສົມປະສານລົດຂົນສົ່ງຫຼາຍຕູ້ໂດຍສານແບບ ‘ແທຣມ (tram)’ ກັບລົດບັສແທນຫຼືບໍ່ ອີງຕາມລາຍງານຂອງອົງການຂ່າວເອແອັຟພີ.
ລະບົບຊອງຈີນ ທີ່ກຳລັງໄດ້ຮັລການພິຈາລະນາຢູ່ນັ້ນ ໃຊ້ພະລັງງານໄຮໂດຣເຈັນ ທີ່ພັດທະນາໂດຍລັດວິສາຫະກິດຈີນ ‘CRRC’ ນອກຈາກນີ້ ຍັງມີບໍລິສັດຍີ່ປຸ່ນອື່ນໆອີກ ທີ່ເປັນທາງເລືອກໃນໂຄງການນີ້.
ລະບົບທີ່ເອີ້ນວ່າ Autonomous Rail Rapid Transit ຫຼື ART ຂອງຈີນ ມີຄວາມຄ້າຍຄືກັບລົດແທຣມ ບ່ອນທີ່ມີຫຼາຍຕູ້ໂດຍສານ ແຕ່ກໍມີຄວາມຄ້າຍຄືລົດບັສບ່ອນທີ່ໃຊ້ລໍ້ຢາງໃນການແລ່ນ ແທນທີ່ຈະເປັນການເຄື່ອນທີ່ເທິງລາງລົດໄຟ.
ເຈົ້າແຂວງຢາມານາຊິ ທ່ານໂຄທາໂຣະ ນາງາຊາກິ ກ່າວທີ່ກອງປະຊຸມຖະແຫລງຂ່າວ ຫາກທາງການເລືອກແນວທາງ “ຟູຈິ ແທຣມ” ນີ້ ກໍຈະສາມາດຫລຸດຄ່າກໍ່ສ້າງໄດ້ຢ່າງຫຼວງຫຼາຍ.
ທ່ານກ່າວວ່າ ວິທີນີ້ ອາດຊ່ອຍຫລຸດການປ່ອຍແກັສຄາຣບອນໄດອອກໄຊດ໌ ທັງຍັງຊ່ອຍບໍລິຫານບໍ່ໃຫ້ມີນັກທ່ອງທ່ຽວຂຶ້ນໄປພູໄຟຟູຈິຫຼາຍເກີນໄປອີກດ້ວຍ.
“ຂະນະທີ່ເຮົາເຄົາລົບບໍລິສັດຜູ້ນຳໃນໂຄງການນີ້ ຂ້າພະເຈົ້າຫວັງວ່າ ບໍລິສັດຍີ່ປຸ່ນຈະຮັບງານນີ້ ແລະຈະຍິ່ງດີກວ່ານີ້ ຖ້າມີການຜະລິດພາກໃນຢາມານາຊິ” ເຈົ້າແຂວງທ່ານນີ້ ໄດ້ກ່າວ.
ໃນຊ່ວງບໍ່ເທົ່າໃດປີຜ່ານມາ ນັກທ່ອງທ່ຽວທີ່ເດີນທາງມາຍັງພູໄຟທີ່ນິຍົມຊົມຊອບແຫ່ງນີ້ ກໍເພີ້ມຂຶ້ນມະຫາສານ ແລະສ້າງຄວາມກັງວົນຕໍ່ເຈົ້າໜ້າທີ່ໃນເລື້ອງຜົນກະທົບຕໍ່ສະພາບແວດລ້ອມ.
ທາງການໃຊ້ມາດຕະການບໍລິຫານບໍ່ໃຫ້ຈຳນວນນັກທ່ອງທ່ຽວຫຼາຍເກີນໄປ ແລະການເກັບຄ່າທຳນຽມ 2,000 ເຢນ ເທົ່າກັບ 13 ໂດລາ ຊ່ອຍເຮັດໃຫ້ນັກປີນພູໄຟຟູຈິ ໃນຊ່ວງລະດູຮ້ອນທີ່ຜ່ານມາ ຫລຸດລົງມາຢູ່ທີ່ 178,000 ຄົນ ເມື່ອທຽບກັບ ກວ່າ 200,000 ຄົນໃນປີກາຍນີ້.
ເຈົ້າໜ້າທີ່ໃນຢາມານາຊິ ເຊິ່ງຢູ່ໃນດ້ານຍອດນິຍົມຂອງພູໄຟ ປະກາດແຜນການເມື່ອ 3 ປີກ່ອນ ທີ່ຈະສ້າງລະບົບຂົນສົ່ງລາງ ໄປທີ່ລະດັບຄວາມສູງ 2,305 ແມັດ.
ໃນເວລານີ້ ຜູ້ທີ່ມາຢ້ຽມຢາມສາມາດຂັບລົດຂຶ້ນໄປທີ່ລະດັບດັ່ງກ່າວໄດ້ ຈາກນັ້ນຕ້ອງຍ່າງຂຶ້ນຕໍ່ໄປທີ່ຍອດພູໄຟແຫ່ງນີ້ ທີ່ລະດັບຄວາມສູງ 3,776 ແມັດ.
ຄາດວ່າ ມູນຄ່າໂຄງການລະບົບຂົນສົ່ງດັ່ງກ່າວ ຈະຢູ່ທີ່ 140,000 ລ້ານເຢນ ເຊິ່ງໂຄງການນີ້ ຈະເຊື່ອມກັບສະຖານີຂົນສົ່ງລະດັບພູມິພາກ ແລະໜ້າຈະເປີດໃຫ້ບໍລິການໄດ້ຢ່າງໄວສຸດ ແມ່ນອີກ 10 ປີຈາກນີ້ໄປ.
ການສຶກສາຄວາມເປັນໄປໄດ້ ຈະຖືກເປີດເຜີຍໃຫ້ປະຊາຊົນໃນພື້ນທີ່ພິຈາລະນານຳດ້ວຍ.
ທັງນີ້ ຍີ່ປຸ່ນຕັ້ງເປົ້າໝາຍຈະຮັບເອົານັກທ່ອງທ່ຽວ 60 ລ້ານຄົນຕໍ່ປີ ພາຍໃນປີ 2030 ຫຼືເພີ້ມຂຶ້ນ 2 ເທົ່າຈາກປີ 2019.