ສື່ມວນຊົນຂອງທາງການຈີນລາຍງານໃນວັນເສົາມື້ນີ້ວ່າ ເຈົ້າໜ້າທີ່ທ້ອງຖິ່ນ 6 ຄົນໄດ້ຖືກ
ລົງໂທດ ຫຼັງຈາກນັກທ່ອງທ່ຽວຄົນນຶ່ງ ໄດ້ຖືກລາກໂຕອອກໄປຈາກໂຮງແຮມ ທີ່ລາວພັກ ເຊົາຢູ່ໃນນະຄອນຫຼວງປັກກິ່ງ ຖືກທຸບຕີ ແລ້ວກໍໂຍນຖິ້ມປະໄວ້ຂ້າງທາງ ລຸນຫຼັງທີ່ມີການ ເຂົ້າໃຈຜິດຄິດວ່າ ລາວເປັນຄົນເຮັດໜັງສືຮ້ອງທຸກ.
ອົງການຂ່າວຊິນຫົວລາຍງານວ່າ ທ້າວ Zhao Zhipei ນັກທ່ອງທ່ຽວຈາກເມືອງ Luo-
yang ໃນແຂວງ Henan ໄດ້ໄປພັກເຊົາຢູ່ທີ່ໂຮງແຮມແຫ່ງນຶ່ງ ເມື່ອຕົ້ນເດືອນນີ້ ໃກ້ໆ
ກັບຫ້ອງການຮັບຈົດໝາຍແລະໂທລະສັບຮ້ອງຮຽນຕ່າງໆຂອງຈີນ ບ່ອນທີ່ພວກຮ້ອງທຸກ
ພາກັນຍື່ນຄຳຮ້ອງໄປນັ້ນ. ມີຜູ້ຊາຍຫຼາຍຄົນໄດ້ບຸກເຂົ້າໄປໃນຫ້ອງຂອງລາວ ຫຼັງຈາກນັ້ນ
ລາວແລະພວກຮ້ອງທຸກອີກ 3 ຄົນກໍຖືກລາກຂຶ້ນລົດຕູ້ໄປບ່ອນທີ່ທ້າວ Zhao ໄດ້ຖືກທຸບ
ຕີຢ່າງໜັກແລະຖືກນຳໄປໂຍນລົງທີ່ເຮືອນຂອງລາວ.
ອົງການຂ່າວຊິນຫົວອ້າງຄຳເວົ້າຂອງພວກເຈົ້າໜ້າທີ່ທ້ອງຖິ່ນທີ່ກ່າວວ່າ ພະນັກງານຂອງ
ບໍລິສັດຮັກສາຄວາມປອດໄພແຫ່ງນຶ່ງໃນນະຄອນຫຼວງປັກກິ່ງ ທີ່ຖືກວ່າຈ້າງໂດຍພະແນກ
ຮັບຈົດໝາຍ ແລະໂທລະສັບຮ້ອງທຸກຂອງເມືອງ Luoyang ເປັນຜູ້ຮັບຜິດຊອບໃນການ
ທຸບຕີທີ່ວ່ານີ້.