ຟີລິບປິນ ແລະ ຈີນ ໄດ້ກ່າວຫາກັນ ແລະກັນ ໃນວັນຈັນມື້ນີ້ ກ່ຽວກັບການບຸກໂຈມຕີຂະບວນກຳປັ່ນ ແລະ ປະຕິບັດການຊ້ອມລົບທີ່ອັນຕະລາຍຢູ່ຂົງເຂດທະເລຈີນໃຕ້, ເຊິ່ງເປັນເຫດການຮ້ອນແຮງຄັ້ງຫຼ້າສຸດ ຫຼັງຈາກສອງປະເທດໄດ້ທໍາການຕົກລົງກັນ ເພື່ອພະຍາຍາມຄຸ້ມຄອງຄວາມຂັດແຍ້ງຢູ່ຂົງເຂດທະເລ ໃນເດືອນແລ້ວນີ້.
ໜ່ວຍຍາມຝັ່ງຂອງຈີນ ກ່າວໃນຖະແຫຼງການສະບັບນຶ່ງວ່າ ກໍາປັ່ນລໍານຶ່ງຂອງ ຟີລິບປິນ ບໍ່ໄດ້ເອົາໃຈໃສ່ຕໍ່ຄຳເຕືອນຊ້ຳແລ້ວຊ້ຳອີກຂອງຕົນ ໂດຍມີ “ເຈດຕະ ນາທີ່ຈະປະທະກັນ” ກັບກຳປັ່ນຂອງ ຈີນ ໃນລັກສະນະທີ່ “ບໍ່ເປັນວິຊາການ ແລະ ເປັນອັນຕະລາຍ” ຢູ່ບໍລິເວນເສັ້ນທາງນ້ຳທີ່ມີຂໍ້ພິພາດກັນ ໃນຕອນເຊົ້າ ວັນຈັນມື້ນີ້ (ຕາມເວລາຢູ່ໃນທ້ອງຖິ່ນ).
ຟີລິບປິນ ໄດ້ຕອບໂຕ້ຕໍ່ການສະແດງຄວາມເຫັນຂອງ ປັກກິ່ງ ແລະໄດ້ກ່າວ ໂທດປັກກິ່ງວ່າ “ຈົ່ງເອົາວິໄສທັດອັນແທ້ຈິງຂອງຕົນອອກມາ.” ພວກເຂົາກ່າວ ວ່າ ກຳປັ່ນປ້ອງກັນຊາຍຝັ່ງສອງລຳຂອງຕົນ “ໄດ້ປະເຊີນໜ້າ ແລະຖືກຮຸກຮານ ຈາກການຊ້ອມລົບທີ່ຜິດກົດໝາຍ” ຂອງຂະບວນກຳປັ່ນ ຈີນ ໃກ້ກັບ ຊາຍຫາດ ຊາບີນາ (Sabina Shoal), ໃນຂະນະທີ່ພວກເຂົາເຈົ້າກຳລັງເດີນທາງໄປ ສະໜອງ ສະບຽງໃຫ້ແກ່ພະນັກງານຟີລິບປິນ ທີ່ປະຈຳການຢູ່ໃນສອງເກາະທີ່ ພວກເຂົາຄອບຄອງຢູ່.
ທ່ານ ໂຈນາທານ ມາລາຢາ (Jonathan Malaya), ໂຄສົກຂອງສະພາ ຄວາມໝັ້ນຄົງແຫ່ງຊາດ ແລະກອງກໍາລັງພິເສດຢູ່ຂົງເຂດທະເລຈີນໃຕ້ຂອງ ມະນີລາ ກ່າວວ່າ “ການຊ້ອມລົບທີ່ເປັນອັນຕະລາຍເຫຼົ່ານີ້ ສົ່ງຜົນໃຫ້ເກີດການ ປະທະກັນ, ເຮັດໃຫ້ໂຄງສ້າງຂອງກໍາປັ່ນ PCG ເຊິ່ງເປັນກໍາປັ່ນຍາມຝັ່ງ ຟີລິບປິນສອງລໍາ ໄດ້ຮັບຄວາມເສຍຫາຍ.”
ໃນການຖະແຫຼງຂ່າວທົ່ວໄປ, ໂຄສົກກະຊວງການຕ່າງປະເທດຈີນ ທ່ານນາງ ໝາວ ໜິງ ກ່າວຕໍ່ບັນດານັກຂ່າວວ່າ ຈີນ ຍົງຄົງຈະສືບຕໍ່ດຳເນີນມາດຕະການທີ່ຖືກຕ້ອງຕາມກົດໝາຍຢ່າງເດັດຂາດ “ເພື່ອປົກປັກຮັກສາອະທິປະໄຕ ແລະ ສິດຢູ່ເທິງດິນແດນ ພ້ອມທັງຜົນປະໂຫຍດທາງທະເລຂອງຕົນ.”
ທ່ານນາງ ໝາວ ກ່າວໂດຍ “ຫວັງວ່າ ຟີລິບປິນ ຈະສາມາດຮັກສາຄຳໝັ້ນ ແລະປະຕິບັດຕາມສັນຍາຂອງຕົນຢ່າງຈິງໃຈ ຕໍ່ການຈັດຕັ້ງຊົ່ວຄາວທີ່ໄດ້ບັນລຸໄວ້ກັບ ຈີນ.”
ສະຫະລັດ ໄດ້ອອກມາປະນາມຕໍ່ການກະທຳເຫຼົ່ານັ້ນຂອງ ຈີນ, ໂດຍ ທ່ານນາງ ມາຣີເຄ ຄອລຣ໌ຊັນ (MaryKay Carlson) ເອກອັກຄະລັດຖະທູດ ສະຫະລັດປະຈຳນະຄອນຫຼວງມະນີລາກ່າວໃນສື່ສັງຄົມ X ວ່າ ສະຫະລັດ “ຢືນຢູ່ກັບ ຟີລິບປິນ ໃນການປະນາມການຊ້ອມລົບທີ່ເປັນອັນຕະລາຍຂອງກໍາປັ່ນຍາມຝັ່ງຈີນ,” ເຊິ່ງເປັນອັນຕະລາຍເຖິງຊີວິດ ແລະໄດ້ສ້າງຄວາມເສຍຫາຍໃຫ້ແກ່ຂະບວນກຳປັ່ນຍາມຝັ່ງຂອງ ຟີລິບປິນ.