ພະແນກຄຸ້ມຄອງຊາຍແດນຂອງການາດາ ມີແຜນການທີ່ຈະເພີ້ມການເນລະເທດ ພວກຄົນເຂົ້າເມືອງຜິດກົດໝາຍ ຫຼາຍເຖິງ 10,000 ຄົນຕໍ່ປີ.
ການເນລະເທດເຫຼົ່ານີ້ ບໍ່ແມ່ນແຕ່ພວກອົບພະຍົບແລະພວກຂໍລີ້ໄພທີ່ບໍ່ໄດ້ຮັບການອະນຸມັດເທົ່ານັ້ນ ແຕ່ຍັງຈະຮວມທັງພວກທີ່ເຈົ້າໜ້າທີ່ຖືວ່າ ເປັນໄພຂົ່ມຂູ່ຕໍ່ຄວາມໝັ້ນຄົງຂອງຊາດນຳດ້ວຍ.
ໂຄສົກຂອງພະແນກຄຸ້ມຄອງຊາຍແດນຄົນນຶ່ງກ່າວຕໍ່ອົງການອອກອາກາດຂອງທາງການການາດາວ່າ “ໃນຂະນະທີ່ການາດາເປັນປະເທດມີມະນຸດສະທຳ ທີ່ໃຫ້ການຕ້ອນຮັບພວກຄົນເຂົ້າເມືອງ ແລະພວກຂໍລີ້ໄພຈຳນວນຫຼວງຫຼາຍໃນໄລຍະຫຼາຍໆປີຜ່ານມານີ້ ພວກທີ່ເຂົ້າມາໃນປະເທດຂອງພວກເຮົາແມ່ນຄາດວ່າ ຕ້ອງປະຕິບັດຕາມກົດໝາຍແລະຂັ້ນຕອນຕ່າງໆຂອງພວກເຮົາ.”
ມີລາຍຊື່ພວກຄົນເຂົ້າເມືອງປະມານ 18,000 ຄົນ ທີ່ຈະຖືກເນລະເທດຄ້າງຄາຢູ່ ພ້ອມກັບພວກທີ່ເອີ້ນວ່າ “ເອົາມາດຕະການ ທາງກົດໝາຍໄດ້” 5,300 ຄົນຊຶ່ງໝາຍຄວາມວ່າ ບໍ່ມີເງື່ອນໄຂທາງກົດໝາຍທີ່ຈະຂໍອຸທອນຫຼືເຫດຜົນອື່ນໆທີ່ພວກເຂົາຈະຕ້ອງຢູ່ໃນປະເທດຕໍ່ໄປ.
ພັກນິຍົມແນວທາງເດີມ ຊຶ່ງເປັນພັກຝ່າຍຄ້ານ ເອີ້ນພວກຂໍລີ້ໄພ ທີ່ລັກເຂົ້າໄປໃນການາດາ ຢູ່ໃນບໍລິເວນຊາຍແດນ ທີ່ບໍ່ມີເຈົ້າໜ້າທີ່ຍາມຮັກສາການນັ້ນວ່າ“ເປັນວິກິດການ.” ພວກເຂົາເຈົ້າກ່າວວ່າ ລັດຖະບານບໍ່ໄດ້ໃຫ້ຄວາມສຳຄັນກ່ຽວກັບເລື້ອງນີ້ເລີຍ ແລະກໍບໍ່ມີແຜນການແນວໃດ.
ພັກເສລີນິຍົມເອີ້ນສະຖານະການໃນເຂດຊາຍແດນວ່າ ເປັນບັນຫາ “ທ້າທາຍ.”
ນາຍົກລັດຖະມົນຕີຈັສຕິນ ທຣູໂດ ກ່າວໃນວັນພຸດວານນີ້ວ່າ “ພວກເຮົາພວມຢູ່ໃນຂັ້ນຕອນ ເພື່ອສຶກສາເບິ່ງວ່າ ພວກເຮົາຈະປັບປຸງ ລະບົບຄົນເຂົ້າເມືອງໄດ້ແນວໃດ ເພື່ອໃຫ້ຮູ້ວ່າ ພວກເຮົາຈະດຳເນີນການໄດ້ໄວສ່ຳໃດ ມັນເປັນບູລິມະສິດສຳລັບພວກເຮົາ ທີ່ຈະມີລະບົບຄົນເຂົ້າເມືອງທີ່ໃຊ້ການໄດ້ ແລະນັ້ນກໍເປັນສິ່ງທີ່ພວກເຮົາພະຍາຍາມທີ່ຈະເຮັດ.”
ຫຼາຍໆຄົນໃນຈຳນວນພວກທີ່ຂໍລີ້ໄພ ຫຼືຂໍຖານະພວກອົບພະຍົບ ຢູ່ໃນການາດານັ້ນ ແມ່ນມາຈາກໂຄລອມເບຍ ເອຣິເທຣຍ ເຮຕີ ນິກາຣາກົວ ແລະເທີກີ.