ອະດີດລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ແລະຄູ່ແຂ່ງເພື່ອເປັນຕົວແທນຂອງພັກ ໃນການເລືອກຕັ້ງເປັນປະທານາທິບໍດີ ຄົນສຳຄັນຂອງທ່ານນາງ ທີ່ສັງກັດພັກ Democratic ດຽວກັນນັ້ນ ກໍແມ່ນທ່ານ Bernie Sanders ສະມາຊິກສະພາສູງສະຫະລັດ ໄດ້ແບ່ງກັນ ໃນການເລືອກຕັ້ງຢູ່ໃນສອງລັດ ໃນວັນອັງຄານຜ່ານມານີ້ ທີ່ພາໃຫ້ທ່ານນາງຫຍັບໃກ້ເຂົ້າໄປຕື່ມອີກ ໃນການທີ່ຈະໄດ້ຮັບການສະເໜີຊື່ແຕ່ງຕັ້ງ ໃຫ້ເປັນຕົວແທນຂອງພັກ ໃນອີກສາມສັບປະດາຂ້າງໜ້ານີ້.
ທ່ານນາງ Clinton ໄດ້ຄະແນນລື່ນທ່ານທ່ານ Sanders ໃນລັດ Kentcky ຊຶ່ງເປັນລັດທີ່ຜະລິດຖ່ານຫີນ ປະມານ 2 ພັນຄະແນນເທົ່ານັ້ນ ຊຶ່ງເປັນໄຊຊະນະທີ່ໜິ່ນສຸດ ທີ່ພາໃຫ້ເຈົ້າໜ້າທີ່ເລືອກຕັ້ງກ່າວວ່າ ເຂົາເຈົ້າບໍ່ສາມາດປະກາດຢ່າງເປັນທາງການເທື່ອວ່າ ຜູ້ໃດແມ່ນຜູ້ທີ່ຊະນະ ແຕ່ວ່າທ່ານນາງ Hillary ໄດ້ອອກມາອ້າງເອົາໄຊຊະນະແລ້ວຊຶ່ງເປັນໄຊຊະນະຄັ້ງທຳອິດໃນເດືອນພຶດສະພາຂອງທ່ານນາງ. ໃນຂະນະດຽວກັນນັ້ນ ທ່ານ Sanders ກໍໄດ້ຊະນະ ທ່ານນາງ ໃນການເລືອກຕັ້ງຂັ້ນຕົ້ນທີ່ລັດ Oregon ທາງຝັ່ງທະເລ ພາກຕາເວັນຕົກ ຂອງປະເທດ.
ຜູ້ສະມັກພັກເດໂມແຄຣັດ ທ່ານ Bernie Sanders ສະມາຊິກສະພາສູງລັດ Vermont, ຖະແຫຼງຕໍ່ກອງປະຊຸມນຸມ ວັນທີ 17 ພຶດສະພາ, 2016, ໃນເມືອງ Carson, Calif.
ໃນຜົນສະຫຼຸບຂອງສອງລັດ ທ່ານນາງ Clinton ພະຍາຍາມຊອກຫາທາງໃຫ້ໄດ້ຮັບເລືອກ ເປັນປະທານາທິບໍດີສະຕີຜູ້ທຳອິດ ອາດສາມາດໄດ້ຮັບການສະເໜີແຕ່ງຕັ້ງໃຫ້ເປັນຕົວແທນຂອງພັກ ໃນວັນທີ 7 ມິຖຸນາ ທີ່ຈະມາເຖິງນີ້ ເວລາ 6 ລັດ ຈັດການລົງຄະແນນເລືອກຕັ້ງນັ້ນ. ພໍເຖິງຕອນນັ້ນ ພັກ Democratic ຈະປະກາດໃຫ້ທ່ານນາງເປັນຕົວແທນຂອງພັກ ໃນກອງປະຊຸມໃຫຍ່ຂອງພັກ ໃນເດືອນກໍລະກົດ.
ພັກ Democratic ຈະແບ່ງຄະແນນໃຫ້ທັງສອງຜູ້ສະໜັກ ໃນກອງກະຊຸມພັກແຫ່ງຊາດ ເທົ່າໆກັນ ອີງຕາມຜົນຂອງການລົງຄະແນນໃນແຕ່ລະລັດ. ທ່ານ Sanders ໄດ້ຊະນະພຽງແຕ່ 4 ຜູ້ຕາງໜ້າ ລື່ນທ່ານນາງ Clinton ໃນວັນອັງຄານຜ່ານມານີ້. ຮວມທັງໝົດ ແລ້ວ ທ່ານນາງ Clinton ມີ 2 ພັນ 291 ຜູ້ຕາງໜ້າ ຂອງຈຳນວນຜູ້ຕາງໜ້າທັງໝົດ 2 ພັນ 383 ຄົນທີ່ຕ້ອງການເພື່ອຈະໄດ້ຮັບການແຕ່ງຕັ້ງ ຕໍ່ຈຳນວນ 1 ພັນ 528 ຜູ້ຕາງໜ້າ ທີ່ທ່ານ Sanders ໄດ້ຮັບໃນເວລານີ້.
ທ່ານ Donald Trump ສັງກັດພັກຣີພັບບລິກັນ ຜູ້ລົງສະມັກເປັນຕົວແທນຂອງພັກ ໃນການແຂງຂັນເປັນປະທານາທິບໍດີສະຫະລັດ ຖະແຫຼງຕໍ່ການຊຸມນຸມ ທີ່ເມືອງ Charleston, ລັດ West Va., 5 ພຶດສະພາ, 2016.
ທ່ານ Sanders ຜູ້ຊຶ່ງມອງຕົວເອງວ່າເປັນນັກການເມືອງສັງກັດພັກ Democratic ທີ່ນິຍົມລະບອບສັງຄົມນິຍົມ ຜູ້ຊຶ່ງໂຈມຕີທ່ານນາງ Clinton ໃນການທີ່ທ່ານນາງສະໜັບສະໜຸນການຄ້າເສລີ ໃນອະດີດ ແລະພົວພັນກັບພວກຜູ້ນຳຕະຫຼາດຮຸ້ນ Wall Street ຊຶ່ງທ່ານເອງ ກໍຮູ້ດີວ່າ ທ່ານມີພຽງແຕ່ເສັ້ນທາງນ້ອຍໆເທົ່ານັ້ນທີ່ຈະຊະນະທ່ານນາງ Clinton ແລະຮັບເລືອກໃຫ້ເປັນຕົວແທນຂອງພັກ ແຕ່ທ່ານໄດ້ປະຕິຍານໄວ້ແລ້ວວ່າ ທີ່ຈະຢືນຢັດຢູ່ໃນການແຂ່ງຂັນ ໃນຫຼາຍໆລັດທີ່ຍັງເຫຼືອຢູ່ນັ້ນ.
ທ່ານ Sanders ໄດ້ກ່າວຕໍ່ການໂຮມຊຸມນຸມຫາສຽງທີ່ລັດ California ຊຶ່ງເປັນລັດທີ່ໃຫຍ່ ທີ່ຍັງບໍ່ທັນເລືອກຕັ້ງເທື່ອນັ້ນວ່າ “ປ່ອຍໃຫ້ຂະພະເຈົ້າ ໄດ້ເປັນໃນອັນທີ່ ແຈ້ງຂາວເທົ່າທີ ຂ້າ ພະເຈົ້າສາມາດທີ່ຈະເປັນ... ພວກເຮົາຈະຍັງຢູ່ໃນການແຂ່ງຂັນ ຈົນເຖິງການປ່ອນບັດໃບສຸດທ້າຍ”
ໃນກ້າວໄປຂ້າງໜ້າ ທ່ານ Sanders ຈຳເປັນທີ່ຈະໃຫ້ຊະນະ 85 ເປີເຊັນ ຂອງຈຳນວນ ຜູ້ຕາງໜ້າ ທີ່ຍັງເຫຼືອຢູ່ ກ່ອນກອງປະຊຸມພັກ ຈຶ່ງຈະຊະນະທ່ານນາງ Clinton. ທ່ານໄດ້ຮັບໄຊຊະນະພຽງແຕ່ລັດດຽວເທົ່ານັ້ນ ໂດຍຄະແນນສຽງແບບນີ້ ຈົນເທົ່າເຖິງປະຈຸບັນ ແລະນັ້ນ ກໍແມ່ນລັດ Vermont ຊຶ່ງເປັນລັດຂອງທ່ານເອງນັ້ນ.