ບັນດາໄອຍະການ ໃນການດໍາເນີນຄະດີພວກອະດີດຜູ້ນໍາຂະເໝນແດງສາມຄົນຢູ່ກໍາປູ
ເຈຍ ທີ່ໄດ້ຮັບການໜຸນຫລັງຈາກສະຫະປະຊາຊາດ ໄດ້ກ່າວຫາຜູ້ນໍາເຫລົ່ານັ້ນວ່າ ເປັນ
ຜູ້ວາງແຜນກໍ່ນຶ່ງໃນເຫດການສະຫຍອງຂວັນປ່າເຖື່ອນທີ່ສຸດ ໃນສັດຕະວັດທີ 20.
ໃນຖ້ອຍຖະແຫລງເປີດການດໍາເນີນຄະດີໃນວັນຈັນມື້ນີ້ ໄອຍະການ Chea Leang
ກ່າວວ່າ ຫົວໜ້າກຸ່ມຂະເໝນແດງ ຂຽວ ສໍາພັນ,ຫົວໜ້ານັກທິດສະດີ Nuon Chea
ແລະອະດີດລັດຖະມົນຕີການຕ່າງປະເທດຂະເໝນແດງ ອ່ຽງຊາຣີ ເປັນຜູ້ວາງແຜນ
ການປະຕິວັດທີ່ເອີ້ນກັນວ່າ ແດນມໍລະນະ ຫລື killing fields ທີ່ໄດ້ຂ້າລ້າງເຜົ່າພັນ
ປະຊາ ຊົນຂະເໝນໄປ ໃນຈໍານວນ 1 ສ່ວນ 4 ຂອງພົນລະເມືອງທັງໝົດ ແລະທໍາລາຍ
ຊີວິດຂອງພວກທີ່ລອດຊີວິດມາໄດ້ຫລາຍລ້ານຄົນ.
ອະດີດຜູ້ນໍາທັງ 3 ຄົນນີ້ຖືກກ່າວຫາໃນຖານກໍ່ອາຊະຍາກໍາຕ້ານມະນຸດຊາດ ຮວມທັງ
ການຂ້າດັບສູນເຜົ່າພັນ ຄາດຕະກໍາ ແລະທາລຸນນະກໍາ. ພວກຂະເໝນແດງປົກຄອງ
ປະເທດຕັ້ງແຕ່ປີ 1975 ຫາປີ 1979 ອັນເປັນຊ່ວງເວລາທີ່ມີການກະປະມານກັນວ່າ
ປະຊາຊົນກໍາປູເຈຍຈໍານວນຫລາຍເຖິງ 2 ລ້ານຄົນໄດ້ເສຍຊີວິດໄປ.
ທ່ານ Navi Pillay ຂ້າຫລວງໃຫຍ່ສະຫະປະຊາຊາດວ່າດ້ວຍສິດທິມະນຸດ ໄດ້ສະແດງ
ຄວາມຍິນດີນໍາການໄຂການດໍາເນີນຄະດີນີ້ ໂດຍກ່າວວ່າ ຄໍາໃຫ້ການຕ່າງໆຕໍ່ສານຈະ
ຊ່ອຍໃຫ້ພວກຊາວຂະເໝນຮຸ້ນໃໝ່ເຂົ້າອົກເຂົ້າໃຈປະວັດສາດຂອງເຂົາເຈົ້າດີຂຶ້ນ ແລະ
ເພີ່ມແຮງກະຕຸກຊຸກຍູ້ຄວາມພະຍາຍາມຂອງປະຊາຄົມນາໆຊາດ ໃນການປ້ອງກັນບໍ່
ໃຫ້ເກີດອາຊະຍາກໍາຂ້າລ້າງຜານຜູ້ຄົນເປັນໝູ່ຕື່ມອີກໃນອະນາຄົດນັ້ນ.
ຄາດວ່າພວກໄອຍະການຈະຮ້ອງຂໍໃຫ້ສານຕັດສິນລົງໂທດໜັກທີ່ສຸດ ຄືຈໍາຄຸກຕະຫຼອດ
ຊີວິດ ສໍາລັບພວກຈໍາເລີຍທັງສາມ.
ຈໍາເລີຍຄົນທີ 4 ນາງອ່ຽງທິຣິດ ໄດ້ຖືກສານຕັດສິນໃນອາທິດແລ້ວນີ້ ວ່າ ບໍ່ມີຄວາມ
ສາມາດທີ່ຈະຕໍ່ສູ້ຄະດີໄດ້ ເພາະວ່ານາງເປັນໂຣກຄວາມຈໍາເຊື່ອມ ຫລື Alzheimer ນັ້ນ.
ນາງເປັນພັນລະຍາຂອງອ່ຽງຊາຣີ ແລະເຄີຍເປັນລັດຖະມົນຕີກະຊວງປະຊາສົງເຄາະ
ຂອງພວກຂະເໝນແດງ.
ສ່ວນໂພນປົດ ອະດີດຜູ້ນໍາສູງສຸດຂອງກຸ່ມຂະເໝນແດງໄດ້ເສຍຊີວິດໄປໃນປີ 1998
ໃນຄ້າຍໃນປ່າດົງຕຶບແຫ່ງນຶ່ງບ່ອນທີ່ຜູ້ກ່ຽວຖືກກັກຂັງເປັນຄົນໂທດ ຫລັງຈາກຖືກພວກ
ສະຫາຍເກົ່າທໍລະຍົດ ໂຕນໜີໄປ.
.