ຕາມທີ່ຜູ້ສີ່ຂ່າວຂອງເຮົາລາຍງານມາ ກໍແມ່ນວ່າ ຈໍານວນຜູ້ເສຍຊີວິດແມ່ນເພີ່ມຂຶ້ນເລື້ອຍໆ ໃນຄືນວານນີ້. ໃນຕອນນື່ງນັ້ນ ແມ່ນມີສົບລຽນຢາຍກັນຢູ່ຫລາຍກ່ວາ 30 ສົບ ຢູ່ເທິງຂົວໃນນະຄອນຫລວງພະນົມເປັນນັ້ນ ແລະຕໍ່ມາບໍ່ດົນ ພະນັກງານສະພາກາແດງກໍາປູເຈຍຄົນນຶ່ງ ເວົ້າວ່າ ມີອີກຢ່າງນ້ອຍ 70 ຄົນສີ້ນຊີວິດ.
ຫລັງເວລາທ່ຽງຄືນເລັກນ້ອຍ ນາຍົກລັດຖະມົນຕີກໍາປູເຈຍ ທ່ານຮຸນ ເຊນ ໄດ້ອອກປາກົດໂຕທາງໂທລະພາບ ປະກາດຂ່າວໃຫ້ປະເທດຊາດທີ່ຮັບຟັງດ້ວຍຄວາມຕື່ນຕົກໃຈວ່າ ຫລາຍກ່ວາ 339 ຄົນໄດ້ເສຍ ຊີວິດໄປ ຢູ່ບົນສະພານສໍາລັບໃຫ້ຄົນຍ່າງ ທີ່ເຊື່ອມຕໍ່ລະຫວ່າງເກາະເພັດຢູ່ກາງທະເລສາບ ກັບແຜ່ນດິນໃຫຍ່ນະຄອນຫລວງພະນົມເປັນນັ້ນ ແລະມີອີກ 329 ຄົນໄດ້ຮັບບາດເຈັບ.
ທ່ານຮຸນເຊນກ່າວວ່າ ມັນເປັນເຫດການສູນເສຍຊີວິດ ທີ່ຮ້າຍແຮງໃຫຍ່ຫລວງທີ່ສຸດ ນັບຕັ້ງແຕ່ການໂຄ່ນລົ້ມພວກຂະເໝນແດງລົງຈາກອໍານາດ ເມື່ອປີ 1979.
ຜູ້ເຄາະຮ້າຍຄົນນຶ່ງ ໄດ້ຮັບການຊ່ວຍເຫລືອ ອຸ້ມອອກມາຈາກບ່ອນເກີດເຫດ.
ພວກເຄາະຮ້າຍສ່ວນໃຫຍ່ ແມ່ນ
ເປັນຊາວໜຸ່ມໄວລຸ້ນແລະໄວ 20
ປີຂຶ້ນໄປ ຊຶ່ງເປັນສ່ວນນື່ງຂອງ
ປະຊາຊົນ ຈໍານວນປະມານ 2
ລ້ານຄົນ ທີ່ໄດ້ພາກັນລຸຫລັ່ງໄປ
ຍັງນະຄອນຫລວງພະນົມເປັນ
ເພື່ອສະຫລອງບຸນ Water
Festival ຫລືບຸນຊ່ວງເຮືອປະ
ຈໍາປີ ທີ່ເປັນຂີດໝາຍການສີ້ນ ສຸດລົງຂອງລະດູຝົນ.
ພວກເຄາະຮ້າຍສ່ວນໃຫຍ່ແມ່ນ
ຕາຍຍ້ອນຫາຍໃຈບໍ່ໄດ້ ລົ້ມແລະ
ຖືກຢຽບແລະລົ້ມທັບຢູ່ເທິງຂົວ
ບ່ອນທີ່ຜູ້ຄົນຫລາຍພັນຄົນພາກັນ
ແຫຍ້ແລະຍູ້ຊຸກກັນ ເພື່ອພະຍາ
ຍາມຈະໜີອອກຈາກເກາະເພັດ
ນັ້ນ. ຄົນອື່ນໆອີກຫລາຍຄົນພາກັນກະໂດດລົງນໍ້າແລະຈົມນໍ້າຕາຍ. ມີລາຍງານຂ່າວວ່າ
ຈໍານວນນຶ່ງຖືກໄປຟ້າຊອ໊ດຕາຍ ຍ້ອນມີສາຍໄຟຟ້າຢູ່ໃນນໍ້າ ທີ່ໃຊ້ປະດັບປະດາຂົວນັ້ນ.
ນາງ Ly Vuthy ຂາຍເຄື່ອງດື່ມຢູ່ໄກ້ໆຂົວ ທາງຟາກເກາະເພັດໃນເວລານັ້ນ.
// ສຽງພາສາຂະເໝນ //
ນາງເວົ້າວ່າ ຢູ່ເທິງຂົວແມ່ນແໜ້ນໄປດ້ວຍຜູ້ຄົນ ທີ່ພະຍາຍາມຈະກັບຄືນໄປຍັງແຜ່ນດິນໃຫຍ່ຫລືຟາກນະຄອຫລວງພະນົມເປັນ ແລະຫລາຍ ຄົນໄດ້ເປັນລົມໄປ. ເມື່ອເຫັນເຊ່ນນັ້ນ ຄົນອື່ນໆພາກັນຕຶ່ນຕົກໃຈ ແລະຝຸງຊົນພາກັນຍູ້ກັນໄປມາ ເພື່ອພະຍາຍາມຈະໜີອອກຈາກ ຂົວ ແຕ່ກໍໜີອອກໄປບໍ່ໄດ້ ເລີຍຮູ້ສຶກວ່າພວກຕົນຖືກຕັນໄວ້ບໍ່ມີທາງອອກ ຫລາຍໆຄົນເລີຍພາກັນກະໂດດລົງນໍ້າໄປ.
ນາຍ Sem Pagnaseth ຄົນຂາຍຂອງທີ່ເຫັນເຫດການອີກຄົນນຶ່ງ ຢູ່ທາງຝັ່ງພະນົມເປັນ ເວົ້າວ່າ ມີຫລາຍພັນຄົນອັ່ງແອກັນຢູ່ເທິງຂົວ ຍາວ 100 ແມັດແຫ່ງນັ້ນ ແລະຍູ້ແຫຍ້ກັນ ພະຍາຍາມຈະໜີອອກມາ.
ນາຍເສມກ່າວວ່າ ມີສິ່ງກີດຂວາງ ກັ້ນສົ້ນຂົວຟາກເມືອງຫລວງໄວ້ເພື່ອ ກັນບໍ່ໃຫ້ຝຸງຊົນຫລັ່ງໄປສູ່ຖະໜົນ ຊຶ່ງເຮັດໃຫ້ຝຸງຊົນບໍ່ສາມາດໜີ ອອກຈາກຂົວໄປໄດ້ ກໍເລີຍເຮັດໃຫ້ເຂົາເຈົ້າຕ້ອງອັດແອແຫຍ້ກັນຢູ່ເທິງຂົວ.
ລາວເວົ້າອີກວ່າ ມີຕໍາຫລວດພຽງບໍ່ເທົ່າໃດຄົນ ພະຍາຍາມຈະຄວບຄຸມຝຸງຊົນຢູ່ເທິງຂົວ
ກ່ອນເກີດເຫດນັ້ນ ແຕ່ເວລາທີ່ການແຕກຕື່ນເລີ້ມຂຶ້ນແລ້ວ ຕໍາຫລວດກໍໄດ້ເຄື່ີອນໄຫວ
ໂດຍໄວ ເພື່ອຊ່ວຍດຶງຜູ້ຄົນອອກໄປໃຫ້ໄດ້ຫລາຍທີ່ສຸດເທົ່າທີ່ຈະເຮັດໄດ້ ຊຶ່ງລາວເວົ້າວ່າ
ການເຄື່ອນໄຫວ ຢ່າງໄວຂອງຕໍາຫລວດ ໄດ້ຊ່ວຍຊີວິດຜູ້ຄົນໄວ້ໄດ້ຫລາຍຄົນ.
ພວກໄດ້ຮັບບາດເຈັບແລະເສຍຊີວິດ ໄດ້ຖືກນໍາສົ່ງໂຮງໝໍໂດຍທາງລົດພະຍາບານ ລົດກະບະ ແລະລົດສ່ວນໂຕ.
ສະພາບການເທິງຂົວ ຫລັງຈາກເກີດ ເຫດການແຕກຕື່ນຢຽບກັນຕາຍ.
2 ຊົ່ວໂມງຫລັງຈາກເກີດເຫດ ສະພານແຫ່ງນັ້ນແມ່ນເຕັມໄປດ້ວຍເກີບ ເສື້ອຜ້າ ແລະແກ້ວນໍ້າ ຫລາຍຮ້ອຍຊີ້ນ. ມີເຮືອຫລາຍລໍາທໍາການຊອກ ຫາສົບຢູ່ກ້ອງຂົວ.
ມັນເປັນຈຸດຈົບທີ່ໜ້າສະລົດໃຈແລະເສົ້າໃຈທີ່ສຸດ ຕໍ່ອັນທີ່ຄວນໄດ້ເປັນການຢ້ຽມຢາມນະຄອນຫລວງຂອງກໍາປູເຈຍຢ່າງມ່ວນຊື່ນ ເພື່ອສະ ຫລອງບຸນປະຈໍາປີນັ້ນ ຊຶ່ງໃນໄລຍະຫລາຍໆອາທິດຕໍ່ໜ້ານີ້ ພວກຄອບ ຄົວຊາວຂະເໝນຫລາຍຮ້ອຍຄອບຄົວ ໃນທົ່ວປະເທດ ແມ່ນຈະຕ້ອງໄດ້ທໍາພິທີສົ່ງສະການ ຍາດຕິພີ່ນ້ອງທີ່ເສຍຊີວິດໄປນັ້ນ.
ໃນຕອນເຊົ້າວັນອັງຄານມື້ນີ້ ນາຍົກລັດຖະມົນຕີຮຸນເຊນ ເວົ້າວ່າ ລັດຖະບານຈະຈັດຕັ້ັງ
ຄະນະກໍາມະການ ຂຶ້ນມາສືບສວນ ຫາສາເຫດຂອງໂສກນາດຕະກໍາຄັ້ງນີ້.
ໝາຍເຫດ: ຂ່າວຫລ້າສຸດ ຫລັງຈາກລາຍງານນີ້ ແຈ້ງວ່າ ຈຳນວນຄົນຕາຍໄດ້ ເພິ່ມຂຶ້ນເປັນ 378 ຄົນແລ້ວ.