ລັດ California ໄດ້ປະກາດວາງຂໍ້ຈຳກັດໃນການໃຊ້ນ້ຳ ເປັນ
ເທື່ອທຳອິດໃນປະຫວັດສາດຂອງລັດ ໃນຂະນະທີ່ລັດຊຶ່ງຕັ້ງຢູ່
ໃນພາກຕາເວັນຕົກຂອງສະຫະລັດແຫ່ງນີ້ ສືບຕໍ່ໄດ້ຮັບຄວາມ
ເສຍຫາຍຈາກໄພແຫ້ງແລ້ງມາເປັນເວລາ 4 ປີ.
ທ່ານ Jerry Brown ຜູ້ວ່າການລັດ California ກ່າວວ່າ
“ ພວກເຮົາຕົກຢູ່ໃນສະພາວະແຫ້ງແລ້ງເປັນຄັ້ງປະ
ຫວັດສາດ ແລະຮຽກຮ້ອງ ໃຫ້ມີການດຳເນີນການ
ເຄື່ອນໄຫວທີ່ບໍ່ເຄີຍມີມາກ່ອນ. ຍ້ອນສາເຫດນີ້ ຂ້າ
ພະເຈົ້າຈຶ່ງອອກຄຳສັ່ງຝ່າຍບໍລິຫານໂດຍບັງຄັບໃຫ້
ມີການລົດຜ່ອນໃນການຊົມໃຊ້ນ້ຳລົງຢ່າງຫຼາຍສົມຄວນໃນທົ່ວລັດພວກເຮົາ.”
ທ່ານ Jerry Brown ໄດ້ອອກຄຳສັ່ງຝ່າຍບໍລິຫານໃນວັນພຸດວານນີ້ ສຳລັບພວກປະຊາຊົນໃນລັດແລະວົງການທຸລະກິດໃຫ້ຕັດການຊົມໃຊ້ນ້ຳຂອງຕົນລົງໃນປະລິມານ 25 ເປີເຊັນ.
ຄຳສັ່ງຂອງຜູ້ວ່າການລັດ ຮວມທັງການສັບປ່ຽນເດີ່ນຫຍ້າ ໃນເນື້ອທີ່ເກືອບ 5 ລ້ານແມັດມົນທົນໃຫ້ເປັນເດີ່ນທີ່ທົນທານຕໍ່ການແຫ້ງແລ້ງ ແລະສະໜອງເງິນຊ່ອຍເຫຼືອແກ່ປະຊາຊົນທີ່ສັບປ່ຽນເຄື່ອງໃຊ້ໃນບ້ານເຮືອນແບບເກົ່າທີ່ໃຊ້ນ້ຳຫລາຍ ແລະໃຫ້ໃຊ້ເຄື່ອງທີ່ປະຢັດພະລັງງານທີ່ມີປະສິດທິຜົນນັ້ນ.
ທ່ານ Brown ໄດ້ປະກາດເລື້ອງນີ້ໃຫ້ຊາບ ຈາກເຂດທີ່ສອກຫຼີກຫ່າງໄກ ໃນຂົງເຂດພູ Sierra ລັດເນວາດາ ຊຶ່ງຕາມທຳມະດານັ້ນ ປົກຄຸມດ້ວຍຫິມະສູງເກືອບ 2 ແມັດ.
ລັດ California ໄດ້ຮັບນ້ຳສ່ວນຫຼາຍຈາກປະລິມານຫິມະຕົກໃນລະດູໜາວເທິງພູ Sierra Nevada ແຕ່ຄວາມແຫ້ງແລ້ງໃນປັດຈຸບັນໄດ້ພາ ໃຫ້ປະລິມານຫິມະຕົກຢູ່ໃນລະດັບຕໍ່າສຸດ ທີ່ບໍ່ເຄີຍໄດ້ບັນທຶກໄວ້ມາກ່ອນ.
Your browser doesn’t support HTML5
US California Drought