ຕາໜ່າງນຶ່ງຂອງບັນດາອົງການປົກປ້ອງສິດທິມະນຸດ ກ່າວວ່າ ກອງທັບມຽນມ້າໄດ້ຫັນປ່ຽນລະບົບເກັບພາສີຂອງຕົນ ໃຫ້ເປັນການຂູ່ເຂັນຫລືຍັກຍອກເອົາເງິນແລະເປັນເຄື່ອງມື ໃນການປາບປາມປະຊາຊົນ.
ລາຍງານສະບັບໃໝ່ ທີ່ຕາໜ່າງດັ່ງກ່າວນໍາອອກເປີດເຜີຍອອກຢູ່ບາງກອກ ເວົ້າວ່າ ລັດຖະບານແລະກອງທັບທໍາການເກັບພາສີໂດຍພະລະການໃນຮູບຂອງເງິນສົດ ທີ່ດິນ ສິນຄ້າຕ່າງໆແລະແຮງງານ.
ລາຍງານສະບັບນີ້ແມ່ນອີງໃສ່ການສໍາພາດກັບປະຊາຊົນ ຈໍານວນຫລາຍກວ່າ 340 ຄົນໃນໄລຍະ 2 ປີຜ່ານມາ.
ນອກນັ້ນ ປະຊາຊົນຍັງຖືກບັງຄບໃຫ້ເສຍຄ່າທໍານຽມຕ່າງໆໂດຍພະລະການທີ່ດ່ານກວດກາແຫ່ງຕ່າງໆແລະຖືກບັງຄັບໃຫ້ບໍລິຈາກເງິນສໍາລັບງານບຸນຕ່າງໆສໍາລັບຄ່າກໍ່ສ້າງໂຮງຮຽນ ພ້ອມທັງເສຍຄ່າລົງທະບຽນແລະອຸບປະກອນໃຊ້ໃນໂຮງຮຽນນໍາ.
ທ່ານນາງ Alison Vicary ນັກເສດຖະສາດປະຈໍາກຸ່ມສິ້ງຊອມເບິ່ງການເສດຖະກິດຂອງມຽນມ້າ ທີ່ມະຫາວິທະຍາໄລ Macquarie ກ່າວວ່າ:
ທ່ານນາງ Alison Vicary ຈາກມະຫາວິທະຍາໄລ Macquarie University
"ລະບົບການເກັບພາສີທີ່ວ່ານີ້ ແມ່ນເປັນການກົດຂີ່ແລະບໍ່ຖືກຕ້ອງຕາມກົດ ໝາຍ. ພວກກົມກອງເກັບພາສີຕ່າງໆ ນັ້ນ ໄດ້ມີການພົວພັນຢ່າງແຂງຂັນນໍາການຂູດຮີດ ຄວບຄຸມແລະປາບປາມປະຊາຊົນ ແລະພາສີທີ່ເກັບໄດ້ໃນພາກໂຕຈິງໃນລະດັບທ້ອງຖິ່ນນັ້ນ ສ່ວນໃຫຍ່ແມ່ນຈະເປັນລາຍຮັບຂອງພວກເຈົ້າໜ້າ ທີ່ທ້ອງຖິ່ນ ເເທນທີ່ຈະເປັນຂອງລັດຖະ ບານກາງ."
ພວກກຸ່ມປົກປ້ອງສິດທິມະນຸດກ່າວວ່າ ບັນດາອົງການຕ່າງໆທີ່ໄດ້ຮັບການໜຸນຫລັງຈາກກອງທັບ ໄດ້ພາກັນຂູ່ເຂັນເອົາເງິນຈາກປະຊາຄົມຕ່າງໆ ລ່ວງໜ້າການເລືອກຕັ້ງທົ່ວໄປທີ່ ຈະມີຂຶ້ນໃນວັນທີ 7 ພະຈິກປີນີ້.
ທ່ານນາງ Vicary ກ່າວວ່າ ລະບົບພາສີທີ່ເອົາຮັດເອົາປຽບປະຊາຊົນທີ່ວ່ານີ້ ໄດ້ເຮັດໃຫ້ ການເສດຖະກິດຂອງມຽນມ້າຊຸດໂຊມລົງ ແລະທ່ານນາງກ່າວຕື່ມວ່າຈະບໍ່ມີການປ່ຽນແປງຫຍັງຫລາຍຫລັງຈາກການເລືອກ ຕັ້ງໃນມຽນມ້າ ຊຶ່ງເປັນນຶ່ງໃນບັນດາປະເທດທີ່ທຸກຈົນທີ່ ສຸດໃນເອເຊຍນັ້ນ.
ໃນດ້ານທ່ານນາງ Cheery Zahau ຜູ້ປະສານງານດ້ານສິດທິມະນຸດປະຈໍາສະຖາບັນການສຶກສາວ່າດ້ວຍສິດທິມະນຸດຂອງມຽນມ້າ ກໍກ່າວວ່າ ລະບົບພາສີທີ່ຂາດຄວາມຮັບຜິດຊອບ ເຮັດໃຫ້ຊີວິດການເປັນຢູ່ມີຄວາມລໍາບາກຍາກແຄ້ນຫລາຍຂຶ້ນ ສໍາລັບປະຊາຊົນສ່ວນໃຫຍ່ ຊຶ່ງນາງກ່າວຊີ້ແຈງວ່າ :
ທ່ານນາງ Cheery Zahau, ຜູ້ປະສານງານດ້ານ ສິດທິມະນຸດ ປະຈໍາສະຖາບັນສຶກສາກ່ຽວກັບ ສິດທິມະນຸດຂອງມຽນມາ.
"ມັນໄດ້ເພີ່ມບັນຫາຕໍ່ການຢູ່ລອດໃນຂັ້ນພື້ນຖານຂອງປະຊາຊົນມຽນມາ ຄືເຂົາ ເຈົ້າບໍ່ສາມາດທ້ອນຫອມເງິນໄດ້ເລີຍ ແລະໃນຫລາຍໆກໍລະນີ ພວກເຂົາເຈົ້າ ຮອດບໍ່ສາມາດທີ່ຈະສົ່ງເສຍລູກໆ ເຂົ້າ ໂຮງຮຽນດ້ວຍຊ້ຳ. ພວກເຂົາເຈົ້າບໍ່ມີເງິນພໍທີ່ຈະຈ່າຍຄ່າໂຮງໝໍ, ຈ່າຍຄ່າຮັກສາພະຍາບານອີກຕໍ່ໄປແລ້ວ. ດັ່ງນັ້ນ ຈຶ່ງວ່າ ມັນເຮັດໃຫ້ລະບົບສະຫວັດດີການສັງຄົມ ທັງໝົດ ພັງລົງສໍາລັບປະຊາຊົນມຽນມາ ແລະມັນໄດ້ການມາເປັນພາລະແບກຫາບ ສໍາລັບເຂົາເຈົ້າ."
ລາຍງານສະບັບນີ້ກ່າວວ່າ ລະບົບພາສີນີ້ໄດ້ຂັດຂວາງບໍ່ໃຫ້ປະຊາຊົນສ່ວນໃຫຍ່ຂອງມຽນມ້າ ມີສິດໄດ້ຊົມໃຊ້ມາດຕະຖານການຄອງຊີບ ການຮັກສາສຸກຂະພາບ ການພັກອາໄສໃນບ້ານເຮືອນ ການມີເຂົ້າປາອາຫານແລະການສຶກສາ ທີ່ພຽງພໍ ແລະເຂົາເຈົ້າສົມຄວນຈະໄດ້ຮັບນັ້ນ.
ລາຍງານສະບັບນີ້ກ່າວຕື່ມວ່າ ພວກບໍລິຈາກເງິນແລະໃຫ້ການຊ່ວຍເຫລືອນາໆຊາດ ເຊ່ນພວກທະນາຄານພັດທະນາຕ່າງໆນັ້ນ ຄວນຈະໃຫ້ການຊ່ອຍເຫລືອແກ່ມຽນມ້າ ກໍຕໍ່ເມື່ອມາດຕະຖານການປົກຄອງແລະການປົກປ້ອງສິດທິມະນຸດໃນມຽນມ້າ ໄດ້ຮັບການປັບປຸງໃຫ້ ດີຂຶ້ນແລ້ວເທົ່ານັ້ນ.