ພະຊັ້ນນໍາອົງນຶ່ງທີ່ຕໍ່ຕ້ານລັດຖະບານ ກໍາລັງປະເຊີນໜ້າກັບບັນຫາດ້ານກົດໝາຍໃໝ່ ໃນ
ເວລາພຽງບໍ່ເທົ່າໃດສັບປະດາຫລັງຈາກຜູ້ກ່ຽວຖືກປ່ອຍໂຕອອກມາຈາກຄຸກ.
ສື່ຂອງລັດມຽນມາ ໜັງສືພິມ New Light ກ່າວວ່າ ພະ Shin Gambira ຖືກກ່າວຫາ
ຖານເຂົ້ານັ່ງຄອບຄອງພື້ນທີ່ຢ່າງຜິດກົດໝາຍຢູ່ໃນວັດແຫ່ງນຶ່ງໃນນະຄອນຢ້າງກຸ້ງ ເມືອງ
ໃຫຍ່ສຸດຂອງມຽນມາ ທີ່ທາງການໄດ້ປິດລ້ອມໄວ້ ແລະຫລັງຈາກນັ້ນ ໄດ້ເຂົ້າໄປໃນບ່ອນ
ຫວງຫ້າມອີກ 2 ບ່ອນ.
ພະ Gambira ໄດ້ມີບົດບາດສໍາຄັນໃນການປະທ້ວງຄັ້ງໃຫຍ່ຂອງມະຫາຊົນໃນປີ 2007
ທີ່ເອີ້ນກັນວ່າ ການປະຕິວັດຜ້າເຫລືອງ ຫລື Saffron Revolution ນັ້ນ. ກອງທັບມຽນ
ມາໄດ້ທໍາການປາບປາມຢ່າງແຂງແຮງຕໍ່ການປະທ້ວງ ທີ່ເອີ້ນຊື່ຕາມສີຜ້າສະບົງຂອງພວກ
ພະສົງທີ່ເປັນຜູ້ນໍາພາການປະທ້ວງຄັ້ງນັ້ນ.
ພະ Gambira ຖືກຕັດສິນລົງໂທດຈໍາຄຸກ 68 ປີ ຊຶ່ງໄດ້ຖືກຜ່ອນໂທດລົງ ຕາມການ
ຕັດສິນໃຈຂອງລັດຖະບານມຽນມາໃນການປ່ອຍໂຕພວກນັກໂທດການເມືອງຫລາຍຮ້ອຍ
ຄົນເມື່ອໄວໆມານີ້.
ພະ Gambira ໄດ້ຮັບອິດສະລະພາບໃນເດືອນມັງກອນຜ່ານມາ ແຕ່ຕົກມາເມື່ອຕົ້ນເດືອນ
ກຸມພານີ້ ພະ Gambira ໄດ້ຖືກຈັບໄປຄຸມຂັງໄວ້ອີກເປັນເວລາສັ້ນໆຕາມຄໍາສັ່ງຂອງອົງ
ການສັງຄະນາຍົກແຫ່ງລັດ. ການຈັບກຸມຄຸມຂັງດັ່ງກ່າວໄດ້ຮັບການປະທ້ວງຢ່າງແຂງແຮງ
ຈາກສະຫະລັດ.
ເບິ່ງພາບກ່ຽວກັບພວກນັກໂທດທີ່ຖືກປ່ອຍໂຕເມື່ອເດືອນມັງກອນ: