ປະທານາທິບໍດີ ທຽນ ເຊນ ໄດ້ຮຽກຮ້ອງໄປຍັງພວກກອງທັບຊົນເຜົ່າ ທີ່ກໍາລັງສູ້ລັບກັບລັດ
ຖະບານມຽນມາຢູ່ໃນຂະນະນີ້ ໃຫ້ມາທໍາການເຈລະຈາກັບອໍານາດປົກຄອງຢູ່ໃນແຕ່ລະລັດ
ຂອງພວກເຂົາເຈົ້າ ເພື່ອຫາທາງຍຸຕິຂໍ້ຂັດແຍ້ງກັນ ທີ່ຍືດເຍື້ອມາເປັນເວລາຫລາຍເດືອນ ແລະ
ຍັງຜົນໃຫ້ປະຊາຊົນຕ້ອງພັດພາກຈາກຖິ່ນຢູ່ອາໃສຂອງພວກເຂົາເຈົ້າຫລາຍກວ່າ 50,000
ຄົນ ຢູ່ໃນບັນດາລັດທາງພາກຕາເວັນອອກ ແລະພາກເໜືອຂອງປະເທດນັ້ນ.
ທ່ານ ທຽນ ເຊນ ປະທານາທິບໍດີມຽນມາ
ໃນການໂອ້ລົມກັບນັກທຸລະກິດກຸ່ມນຶ່ງ ແລະພວກສະມາຊິກສະພາແຫ່ງຊາດຂອງມຽນມາເພື່ອວັນພຸດອາທິດແລ້ວນີ້ ທ່ານ ທຽນ ເຊນ ຍັງໄດ້ກ່າວຫາກອງທະຫານບ້ານຊົນເຜົ່າກະຈິນ ວ່າເປັນຜູ້ກໍ່ການຮ້າຍ ແລະຢືນຢັດວ່າ ກອງທັບລັດຖະບານມຽນມາພຽງແຕ່ປະຕິບັດການເພື່ອປ້ອງກັນຕົນເອງເທົ່ານັ້ນ.
ກອງທະຫານບ້ານຂອງຊົນເຜົ່າກະຈິນ ເປັນ
ສ່ວນນຶ່ງຂອງສໍາພັນທະມິດທາງການເມືອງ
ຂອງຫລາຍໆຊົນເຜົ່າ ທີ່ໄດ້ຈັດຕັ້ງກັນຂຶ້ນໃນ
ເດືອນກຸມພາຜ່ານມາ ທີ່ໂຮມທັງເຜົ່າ ສານ,
ກະຫລ່ຽງ, ມອນ ແລະ ກະຫລ່ຽງນີ.
ທ່ານ ອອງ ຊໍ ບັນນາທິການໜັງສືພິມອີຣາວະດີທີ່ມີສູນກາງຢູ່ຊຽງໃໝ່ ປະເທດໄທ ກ່າວ
ວ່າ ເວລານີ້ພວກກອງທັບຊົນເຜົ່າແມ່ນປຸ້ມລຸມກັນດີກ່ວາ ໃນອະດີດຜ່ານມາ ເພາະວ່າລັດ
ຖະບານໄດ້ຢືນຢັດຢູ່ກັບນະໂຍບາຍທີ່ບັງຄັບໃຫ້ພວກເຂົາເຈົ້າ ເຂົ້າຮ່ວມກໍາລັງຮັກສາຊາຍ
ແດນ. ທ່ານ ອອງ ຊໍ ເວົ້າວ່າ:
“ນີ້ເປັນຄວາມຜິດພາດຢ່າງໃຫຍ່ຂອງຝ່າຍລັດຖະບານ ຄືລັດຖະບານໄດ້ສະເໜີມັນ
ຂຶ້ນມາ ແລະພວກກຸ່ມຊົນເຜົ່າທັງໝົດກໍເວົ້າວ່າ ພວກເຂົາເຈົ້າຮັບເອົາບໍ່ໄດ້ ເພາະວ່າ
ພວກເຂົາເຈົ້າບໍ່ໄດ້ຕໍ່ສູ້ເພື່ອຈະເປັນກໍາລັງຮັກສາຊາຍແດນ ຫລືກອງທັບຊົນເຜົ່າແຕ່
ຢ່າງໃດ ພວກເຮົາຕ້ອງການຢາກປົກຄອງຕົນເອງ ພວກເຮົາຕ້ອງການຄວາມເຄົາລົບ
ນັບຖື ຈາກສະຫະພາບມຽນມາ ຊຶ່ງຂ້າພະເຈົ້າຄິດວ່າ ນີ້ຫລະຄືຕົ້ນຕໍຂອງບັນຫາ.”
ຝ່າຍກອງທະຫານບ້ານຊົນເຜົ່າໄດ້ຮຽກຮ້ອງວ່າ ການເຈລະຈາສັນຕິພາບໃດໆນັ້ນ ແມ່ນ
ຈະຕ້ອງໂຮມເອົາກຸ່ມພັນທະມິດຂອງເຂົາເຈົ້າທັງໝົດ ແລະຈະຕ້ອງເປັນການເຈລະຈາກັບ
ລັດຖະບານກາງເທົ່ານັ້ນ ຊຶ່ງພວກເຈົ້າໜ້າທີ່ອາວຸໂສ ບໍ່ໄດ້ໃຫ້ຄວາມສົນໃຈ.
ໃນຂະນະທີ່ສະພາບການບໍ່ໄປບໍ່ມາ ກ່ຽວກັບການເຈລະຈາສັນຕິພາບຍັງສືບຕໍ່ດໍາເນີນໄປ
ຢູ່ນີ້ ທັງລັດຖະບານແລະພວກກຸ່ມສິດທິມະນຸດເຜົ່າກະຈິນກໍໄດ້ກ່າວຫາກັນແລະກັນວ່າ
ເປັນຝ່າຍທໍາການໂຈມຕີ ແລະລະເມີດສິດທິມະນຸດ.
ເມື່ອຕົ້ນເດືອນນີ້ ສະມາຊິກສະພາສູງຍິງຂອງສະຫະລັດກຸ່ມນຶ່ງ ກ່າວວ່າ ກອງທັບມຽນມາ
ກໍາລັງໃຊ້ວິທີການຂົ່ມຂືນຊໍາເລົາເປັນເຄຶ່ອງມືຢ່າງນຶ່ງ ໃນການສູ້ລົບກັບກອງທະຫານບ້ານ
ເຜົ່າກະຈິນ ຕະຫລອດທັງໃນການສູ້ລົບກັນໃນລັດສານ ທີ່ຢູ່ຕິດກັບລັດກະຈິນນັ້ນ. ນາງ
ມູນ ໄນ ລີ ໂຄສົກຍິງຂອງສະມາຄົມແມ່ຍິງກະຈິນ ຊຶ່ງເປັນກຸ່ມສິດທິມະນຸດໃນລັດກະຈິນ ກ່າວວ່າ:
“ໄດ້ມີການກະທໍາຮຸນແຮງສາລະພັດຢ່າງໂດຍກອງທັບມຽນມາ - ຢ່າງນຶ່ງກໍຄື ໃຫ້ເປັນ
ຄົນແບບຫາບ ຢ່າງນຶ່ງອີກ ແມ່ນຂົ່ມຂືນລຽນຄິວພວກເດັກສາວ ພວກແມ່ຍິງ ແລະພວກ
ໃດທີ່ກ່ຽວພັນກັບກອງທັບເອກະລາດກະຈິນ ພວກທະຫານລັດຖະບານມຽນມາ ແມ່ນບໍ່
ຖາມຫຍັງທັງໝົດ ມີແຕ່ຈັບໄປຢ່າງດຽວ ຊຶ່ງເປັນການຈັບກຸມທີ່ຜິດກົດໝາຍ. ພວກຊາວ
ບ້ານສ່ວນໃຫຍ່ ພາກັນຢ້ານກົວພຶດຕິກໍາຝ່າຝືນສິດທິມະນຸດທີ່ຊົ່ວຮ້າຍແບບນັ້ນຂອງ
ພວກທະຫານລັດຖະບານ ເຂົາເຈົ້າກໍເລີຍພາກັນຫລົບໜີເອົາຕົວລອດ.”
ອົບພະຍົບກະຫລ່ຽງກຸ່ມນຶ່ງຫລົບໜີການສູ້ລົບກັນ ຢູ່ໃນລັດກະຫລ່ຽງ ເມື່ອເດືອນມັງກອນ ປີ 2010. (file photo)
ເວລານີ້ ມີຊາວເຜົ່າກະຈິນ
ປະມານ 20,000 ຄົນ ໄດ້ຫລົບ
ໜີຈາກບ້ານຢູ່ ອາໃສໄປພັກເຊົາ
ຢູ່ຕາມຄ້າຍອົບພະຍົບ 15 ແຫ່ງ
ເລາະຕາມຊາຍແດນຈີນ-ມຽນ
ມານັ້ນ. ໃນຖະແຫລງການສະ
ບັບນຶ່ງ ກຸ່ມສິດທິຊົນເຜົ່າສານ
ທີ່ຊື່ວ່າ ກຸ່ມສະຫະພາບປະຊາ
ທິປະໄຕສານ ເວົ້າວ່າ ມີຄົນຖືກ
ພັດພາກຖິ່ນຢູ່ອາໃສຫລາຍກວ່າ
30,000 ຄົນແລ້ວ ນັບຕັ້ງແຕ່
ການສູ້ລົບກັນໄດ້ເລີ່ມຕົ້ນຂຶ້ນ
ໃນເດືອນມີນາຜ່ານມາ.
ນາງ ຊາລລີ ທອມສັນ ຮອງຜູ້ອໍານວຍການສະມາຄົມຊາຍແດນໄທ-ມຽນມາ ຫລື TBBC
ທີ່ໃຫ້ການຊ່ວຍເຫລືອແກ່ຊາວມຽນມາຫລາຍກວ່າ 140,000 ຄົນ ໃນສູນອົພະຍົບແຫ່ງ
ຕ່າງໆໃນໄທ ກ່າວວ່າ ການຮ້ອງຂໍຈາກນານາຊາດ ເພື່ອນໍາເອົາການຊ່ວຍເຫລືອໄປໃຫ້
ພວກຊົນເຜົ່າ ໃນເຂດສອກຫລີກຕ່າງໆ ແມ່ນໄດ້ຖືກປະຕິເສດໂດຍລັດຖະບານມຽນມາ
ຊຶ່ງນາງກ່າວຕື່ມວ່າ ການແຕກຫັກລົງຂອງການຍຸດຍິງທີ່ມີມາດົນນານຫລາຍປີກັບພວກ
ກຸ່ມຊົນເຜົ່ານັ້ນ ເປັນຮ່ອງຮອຍໃຫ້ຮູ້ວ່າ ຄວາມຫວັງສໍາລັບການເຈລະຈາສັນຕິພາບນັ້ນ
ແມ່ນມີໜ້ອຍຫລາຍ. ນາງ ຊາລລີ ທອມສັນ ເວົ້າວ່າ:
“ພວກຂົງເຂດຕ່າງໆເຫລົ່ານີ້ເຄີຍຢູ່ເຢັນເປັນສຸກມາຕະຫລອດ ແຕ່ມາບັດນີ້ ຍ້ອນວ່າ
ພວກກຸ່ມຊົນເຜົ່າບໍ່ຍອມຕົກລົງຕໍ່ຄວາມຮຽກຮ້ອງຕ້ອງການຂອງຝ່າຍລັດຖະບານ ທີ່
ຢາກໃຫ້ພວກເຂົາເຈົ້າປ່ຽນມາເປັນກໍາລັງຮັກສາຊາຍແດນນັ້ນ ກໍເລີຍບໍ່ມີການໂອ້ລົມ
ສົນທະກັນ ມີແຕ່ການໃຊ້ກໍາລັງເທົ່ານັ້ນ.”
ທ່ານໂຕມັສ ຄວິນຕານາ ທູດພິເສດຂອງ ສະຫະປະຊາຊາດ ຢ້ຽມຢາມມຽນມາ ໃນອາທິດນີ້.
ອາທິດນີ້ ທ່ານ Tomas Quintana ຜູ້
ສືບສວນສອບສວນດ້ານສິດທິມະນຸດຂອງ
ອົງການປະຫະປະຊາຊາດ ໄດ້ໄປຢ້ຽມ
ຢາມມຽນມາ ແລະທໍາການປຶກສາຫາລືກັບ
ພວກເຈົ້າໜ້າທີ່ອາວຸໂສຂອງລັດຖະບານມຽນມາ ເພື່ອສັ່ງຊາຕີລາຄາສະຖານະການດ້ານສິດທິມະນຸດ ທີ່ພົວພັນກັບລັດຖະບານມຽນມາຊຸດໃໝ່ນີ້ ຊຶ່ງນັບວ່າເປັນຄັ້ງທໍາອິດໃນຮອບຫລາຍກວ່ານຶ່ງປີ ທີ່ພວກເຈົ້າໜ້າທີ່ລັດຖະບານມຽນມາໄດ້ອອກວິຊາຢ້ຽມຢາມ ໃຫ້ແກ່ທ່ານ Quintana.