ລັດຖະມົນຕີການຕ່າງປະເທດອິນເດຍບິນໄປຍັງມຽນມາໃນວັນຈັນມື້ນີ້ ເພື່ອທໍາການຢ້ຽມຢາມທີ່ຄາດກັນວ່າ ຈະສົ່ງເສີມສາຍພົວພັນລະຫວ່າງເພື່ອນບ້ານໃນເອເຊຍສອງປະເທດນີ້ ໃຫ້ອົບອຸ່ນຂຶ້ນ.
ທ່ານ S.M. Krishna ລັດຖະມົນຕີຕ່າງປະເທດອິນເດຍກ່າວກ່ອນເດີນທາງອອກຈາກກຸງນິວເດລີວ່າ ການໂອ້ລົມສົນທະນາກັນຈະເພ່ງເລັງໃສ່ການຮ່ວມມືໃນດ້ານຄວາມປອດໄພ ຕະຫລອດທັງດ້ານພະລັງງານ ໂຄ່ງລ່າງພື້ນຖານແລະເລື້ອງອື່ນໆ. ທ່ານ Krishna ເປັນເຈົ້າໜ້າທີ່ລະດັບສູງສຸດຂອງລັດຖະບານອິນເດຍທີ່ທໍາການຢ້ຽມຢາມມຽນມານັບແຕ່ລັດຖະບານໃໝ່ຂອງມຽນມາຂຶ້ນດໍາລົງຕໍາແໜ່ງ ໃນທ້າຍເດືອນມີນາແລ້ວນີ້ເປັນຕົ້ນມາ.
ໃນເວລາດຽວກັນນີ້ ມຽນມາກໍກໍາລັງເປັນເຈົ້າພາບຕ້ອນຮັບຜູ້ຕາງໜ້າຄະນະນຶ່ງຈາກສະຫະ ພາບຢູໂຣບ ຊຶ່ງກ່າວວ່າ ພວກຕົນຢາກໄປເບິ່ງ ວ່າ ຄະນະນໍາພາໃໝ່ໃນມຽນມາມີຄວາມຈິງຈັງແທ້ໆບໍ ກ່ຽວກັບການປະຕິຮູບໄປສູ່ລະບອບປະຊາທິປະໄຕນັ້ນ. ໃນເດືອນເມສາຜ່ານມາ ສະຫະພາບຢູໂຣບໄດ້ຕໍ່ອາຍຸການລົງໂທດທາງດ້ານເສດຖະກິດຂອງຕົນຕໍ່ມຽນມາແລະພວກຜູ້ນໍາສ່ວນຫລາຍຂອງມຽນມາອອກໄປອີກ ແຕ່ໄດ້ຍົກເລີກການຈໍາກັດຮັດແຄບໃນດ້ານການ
ເດີນທາງສໍາລັບພວກສະມາຊິກພົນລະເຮືອນບາງຄົນໃນຄະນະລັດຖະບານໃໝ່ຂອງມຽນມານັ້ນ.
ຄະນະຜູ້ຕາງໜ້າສະຫະພາບຢູໂຣບ ຍັງຄາດຫວັງເຊ່ນກັນວ່າ ຈະໄດ້ພົບກັບທ່ານນາງອອງຊານຊູຈີ ແຕ່ທ່ານ Krishna ລັດຖະມົນຕີຕ່າງປະເທດອິນເດຍ ກ່າວວ່າ ທ່ານບໍ່ຮູ້ວ່າ ທ່ານຈະມີໂອກາດໄດ້ພົບປະກັບນັກເຄື່ອນໄຫວເພື່ອປະຊາທິປະໄຕນັ້ນຫລືບໍ.