ອັງກິດໄດ້ຮ່ວມກັບສະຫະປະຊາຊາດແລະລັດຖະບານກຸງວໍຊິງຕັນ ໃນການຮຽກຮ້ອງໃຫ້ ພວກຜູ້ນໍາທະຫານມຽນມາປ່ອຍໃຫ້ມີການເລືອກຕັ້ງທີ່ເສລີແລະຍຸຕິທໍາ ໃນທ້າຍປີນີ້.
ທ່ານ Jeremy Browne ລັດຖະມຸນຕີຕ່າງປະເທດອັງກິດໄດ້ອອກຖະແຫລງການ ຕອບຄໍາປະກາດຂອງລັດຖະບານມຽນມາ ໃນວັນສຸກຜ່ານມານີ້ ທີ່ວ່າການປ່ອນບັດເລືອກຕັ້ງທີ່ລໍຖ້າ ກັນມາເປັນເວລາດົນນານ ຈະມີຂຶ້ນໃນວັນທີ 7 ພະຈິກນັ້ນ.
ທ່ານ Browne ກ່າວວ່າ ການເລືອກຕັ້ງຈະບໍ່ມີຄວາມຖືກຕ້ອງຕາມກົດໝາຍ ຫລືໄດ້ຮັບການເຊື່ອຖືຈາກນາໆຊາດ ນອກຈາກວ່າຈະມີການປ່ອຍໂຕພວກນັກໂທດການເມືອງຂອງມຽນມາທັງໝົດ ແລະອະນຸຍາດໃຫ້ເຂົາເຈົ້າເຂົ້າປະກອບສ່ວນໂດຍເຕັມ ໃນຂັ້ນຕອນການໂຄສະນາຫາສຽງເລືອກຕັ້ງ ແລະການປ່ອນບັດເທົ່ານັ້ນ.
ທ່ານນາງອອງຊານຊູຈີ ຜູ້ນໍາພັກຝ່າຍຄ້ານທີ່ກໍາລັງຖືກກັກຢູ່ໃນບໍລິເວນບ້ານເຮືອນ ຢູ່ໃນປັດຈຸບັນ ມີກໍາໜົດຈະຖືກປ່ອຍໂຕໃນເວລາ 1 ສັບປະດາຫລັງຈາກການປ່ອນບັດເລືອກຕັ້ງ ດັ່ງນັ້ນ ທ່ານນາງຈະບໍ່ມີໂອກາດໄດ້ໄປລົງຄະແນນສຽງເລືອກຕັ້ງ.ບັນດາກຸ່ມປົກປ້ອງສິດທິມະນຸດ ກ່າວວ່າ ກໍາໜົດເວລາການປ່ອນບັດເລືອກຕັ້ງນີ້ ປາກົດວ່າ ເປັນຄວາມພະຍາຍາມ ໂດຍເຈດຕະນາເພື່ອບໍ່ໃຫ້ທ່ານນາງອອງຊານ ໄດ້ເຂົ້າປະກອບສ່ວນນໍາ.
ທ່ານພັນກິມູນ ເລຂາທິການໃຫຍ່ສະຫະປະຊາຊາດໄດ້ຮຽກຮ້ອງໄປຍັງ ທາງການມຽນມາ ໃນວັນສຸກຜ່ານມານີ້ ໃຫ້ປ່ອຍພວກນັກໂທດການເມືອງທັງໝົດໂດຍບໍ່ມີການຊັກຊ້າ ເພື່ອວ່າ ພວກນັກໂທດເຫລົ່ານີ້ຈະສາມາດເຂົ້າປະກອບສ່ວນໃນຊີວິດການເມືອງຂອງປະເທດໄດ້.
ກະຊວງການຕ່າງປະເທດສະຫະລັດກໍໄດ້ທໍາການຮຽກຮ້ອງໃຫ້ປ່ອຍ ພວກນັກໂທດການເມືອງມຽນມາເຊັ່ນກັນ ໂດຍກ່າວວ່າ ການເລືອກຕັ້ງຈະບໍ່ຄົບຖ້ວນຫລືໜ້າເຊື່ອຖືໄດ້ ພາຍ ໃຕ້ສະຖານະການໃນປັດຈຸບັນ.