ເຮືອບິນລົບຂອງອັງກິດ ໄດ້ເລີ້ມປະຕິບັດການໂຈມຕີທາງອາກາດ
ໃນຊີເຣຍ ບໍ່ເທົ່າໃດຊົ່ວໂມງ ຫຼັງຈາກສະມາຊິກສະພາ ໄດ້ໃຫ້
ການອະນຸມັດ ຕໍ່ການຂະຫຍາຍຍຸດທະສາດເພື່ອເອົາຊະນະກຸ່ມ
ລັດອິສລາມ.
ເຈົ້າໜ້າທີ່ກະຊວງປ້ອງກັນປະເທດຂອງອັງກິດໄດ້ກ່າວວ່າ ເຮືອ
ບິນລົບ Tornado ຂອງກອງທັບອາກາດອັງກິດໄດ້ບິນຂຶ້ນຈາກ
ຖານອາກາດແຫ່ງນຶ່ງ ໃນ Cyprus ແລ້ວກໍໂຈມຕີເປົ້າໝາຍ ໃນ
ຊີເຣຍ ແລະບິນກັບຄືນຖານທັບຢ່າງປອດໄພ.
ກະຊວງປ້ອງກັນປະເທດຂອງອັງກິດ ໄດ້ກ່າວຜ່ານທາງ Twitter ວ່າ ເປົ້າໝາຍຂອງການ
ຖິ້ມລະເບີດດັ່ງກ່າວແມ່ນ ເຂດບໍ່ນ້ຳມັນ Omar ທີ່ກຸ່ມລັດອິສລາມຄວບຄຸມໄວ້ນັ້ນ ແຕ່ວ່າບໍ່ໄດ້ໃຫ້ລາຍລະອຽດກ່ຽວກັບຜົນຂອງການໂຈມຕີແຕ່ຢ່າງໃດ.
ນຍ. David Cameron ຖະແຫຼງຕໍ່ລັດຖະສະພາອັງກິດ ໃນການສົນທະນາກັນ ໃນການໂຈມຕີທາງອາກາດ ຕໍຕ້ານກຸ່ມກໍ່ການຮ້າຍ ໃນ ຊີເຣບ, 2 ທັນວາ 2015.
ກະຊວງປ້ອງກັນປະເທດ ຍັງໄດ້ລະບຸອີກວ່າ ຕົນໄດ້ສົ່ງເຮືອບິນລົບຕື່ມອີກ 8 ລຳ ໄປຍັງ ຖານທັບອາກາດ Akrotiri ບ່ອນ ທີ່ການປະຕິບັດການໂຈມຕີໄດ້ເລີ້ມຂຶ້ນ ໂດຍເພີ້ມຈຳນວນເຮືອ
ບິນລົບຂອງອັງກິດ ທີ່ປະຈຳການຢູ່ທີ່ນັ້ນ ຂຶ້ນເປັນສອງເທົ່າ.
ຫຼັງຈາກ 10 ຊົ່ວໂມງ ຂອງການອະພິປາຍກັນແລ້ວ ສະມາຊິກສະພາອັງກິດ ກໍໄດ້ໃຫ້ການ ອະນຸມັດຕໍ່ການປະຕິບັດການໃນວັນພຸດວານນີ້ ດ້ວຍຄະແນນສຽງ 397 ຕໍ່ 223 ທີ່ໄດ້ຮ້ອງຂໍໂດຍນາຍົກລັດຖະມົນຕີ ທ່ານ David Cameron ສຳລັບເຂົ້າຮ່ວມ ການປະຕິບັດການໂຈມຕີທາງອາກກາດ ເພື່ອເອົາຊະນະກຸ່ມລັດອິສລາມ ໃນຊີເຣຍ.
ທ່ານ Cameron ໄດ້ປະກົດຕົວໃນລັດຖະສະພາ ເພື່ອສະເໜີເລື້ອງການໂຈມຕີທີ່ວ່ານີ້ ໂດຍກ່າວວ່າ “ການປະຕິບັດງານໂຈມຕີທາງອາກາດແມ່ນສ່ວນນຶ່ງຂອງຍຸດທະສາດທີ່ກ້ວາງຂວາງ” ເພື່ອເອົາຊະນະ ພວກຫົວຮຸນແຮງ. ອັງກິດ ຊຶ່ງໄດ້ທຳການຖິ້ມລະເບີດໃນອີຣັກ
ມາໄດ້ປີກວ່າແລ້ວ ແລະທ່ານ Cameron ໄດ້ຮຽກຮ້ອງໃຫ້ຄະນະສະພາ ສະໜັບສະໜຸນການໂຈມຕີທາງອາກາດໃນຊີເຣຍ ທີ່ແນເປົ້າໝາຍໃສ່ກຸ່ມຫົວຮຸນແຮງ ຊຶ່ງທ່ານໄດ້ກ່າວວ່າ ພວກເຂົາໄດ້ວາງແຜນໂຈມຕີປະເທດຕາເວັນຕົກ.