ສະຫະລັດໃຫ້ຄຳໝັ້ນທີ່ຈະລົງເລິກ ແລະເສີມສ້າງຄວາມເຂັ້ມແຂງກັບບັນດາປະ ເທດພາຄີທົ່ວອາຟຣິກກາ, ອີງຕາມການກ່າວຂອງລັດຖະມົນຕີການຕ່າງປະເທດ ທ່ານແອນໂທນີ ບລິງເກັນ ໃນວັນຈັນວານນີ້, ໂດຍຈະເລີ້ມການ ຢ້ຽມຢາມ 4 ປະເທດໃນທະວີບດັ່ງກ່າວ ເພື່ອໃຫ້ສັນຍານເຖິງຜົນປະໂຫຍດຂອງວໍຊິງຕັນຢູ່ທີ່ນັ້ນ ເຖິງແມ່ນວ່າຄວາມຂັດແຍ້ງຈະຍັງຄົງດໍາເນີນຢູ່ຕໍ່ໄປໃນພາກຕາເວັນອອກກາງ ແລະ ຢູເຄຣນ ກໍຕາມ.
ທ່ານ ບລິງເກັນ ເລີ່ມຕົ້ນການເດີນທາງຢ້ຽມຢາມທະວີບອາຟຣິກາຄັ້ງທີ 4 ຂອງທ່ານພາຍໃນອາທິດນີ້, ການຢ້ຽມຢາມທີ່ນໍາທ່ານໄປປະເທດເຄັບເວີດ, ກົດດີວົວ, ໄນຈີເຣຍ ແລະອັງໂກລາ. ບູລິມະສິດຕົ້ນຕໍລວມມີ ການຊຸກຍູ້ຄວາມສໍາພັນດ້ານຄວາມໝັ້ນຄົງຂອງຄູ່ຮ່ວມພາຄີ, ເພີ້ມທະວີການພັດທະນາທາງດ້ານສາທາລະ ນະສຸກ ແລະການພັດທະນາລະບົບເສດຖະກິດຢູ່ໃນພາກພື້ນ.
ລັດຖະມົນຕີການຕ່າງປະເທດຂອງໄອໂວຣີ ໂຄດທ໌ ທ່ານຄາກູ ຮົວຈາ ເລອົງ ອາດອມ (Kacou Houadja Leon Adom) ກາງ, ຕ້ອນຮັບລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ, ຂວາ, ຢູ່ທີ່ເດີນບິນສາກົນ ເຟລິກ ຮູພູເອັດ-ໂບຍນີ (Felix Houphouet-Boigny), ໃນນະຄອນອາບິດຈານ, ໄອໂວລີ ໂຄດທ໌, ວັນທີ 22 ມັງກອນ 2024.
ໃນນະຄອນຫຼວງປຣາເອ ຂອງ ເຄັບເວີດ, ທ່ານ ບລິງເກັນ ໄດ້ເຈລະຈາກັບນາຍົກລັດຖະມົນຕີ ອູລິສຊິສ ໂຄເຣອາ ອີ ຊີລວາ (Ulisses Correia e Silva) ແລະໄດ້ໄປຢ້ຽມຢາມທ່າກໍາປັ່ນ ພໍໂຕ ດາ ປຣາເອ (Porto da Praia), ເຊິ່ງໄດ້ຮັບທຶນເພື່ອປັບປຸງໃຫ້ທັນສະໄຫມຈາກບໍລິສັດ Millennium Challenge ຂອງລັດຖະບານສະຫະລັດ.
"ມັນເປັນເລື່ອງທີ່ພິເສດຫຼາຍ ທີ່ ເຄັບເວີດ ເປັນປະເທດທໍາອິດທີ່ປະສົບຜົນສໍາເລັດກັບສອງໂຄງການຈາກບໍລິສັດ Millennium Challenge, ແລະປັດຈຸບັນນີ້ ພວກທ່ານກໍກໍາລັງເລີ້ມສ້າງໂຄງການທີສາມ," ທ່ານ ບລິງເກັນ ກ່າວ.
ທ່ານຍັງໄດ້ກ່າວສະແດງຄວາມຍິນດີທີ່ ເຄັບເວີດ ໄດ້ຮັບໃບຢັ້ງຢືນຈາກອົງການອະນາໄມໂລກວ່າ ເປັນປະເທດທີ່ບໍ່ມີພະຍາດໄຂ້ມາລາເຣຍແລ້ວ.