ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ເນັ້ນໜັກເຖິງຄວາມຈຳເປັນຂອງ “ການພົວພັນໂດຍກົງ” ແລະ “ການພົວພັນແບບຍືນຍົງ” ລະຫວ່າງ ສະຫະລັດ ແລະ ຈີນ ໃນລະຫວ່າງການພົບປະຢ່າງເປັນທາງການຄັ້ງທຳອິດຂອງທ່ານ ຢູ່ນະຄອນຊຽງໄຮ ເຊິ່ງເປັນເມືອງທີ່ມີບໍລິສັດຕ່າງໆຂອງສະຫະລັດຫຼາຍກວ່າ 1,000 ແຫ່ງຕັ້ງຢູ່ທີ່ນັ້ນ.
ໃນຕອນເຊົ້າຂອງວັນພະຫັດມື້ນີ້, ທ່ານ ບລິງເກັນ ໄດ້ຈັດການໂອ້ລົມກັບ ທ່ານເສິນ ຈີໜິງ (Chen Jining), ເລຂາທິການພັກຄອມມູນິສຈີນປະຈໍານະຄອນ ຊຽງໄຮ. ທ່ານ ເສິນ ເປັນເຈົ້າໜ້າທີ່ລະດັບສູງສຸດຢູ່ໃນທ້ອງຖິ່ນ ແລະເປັນສະມາຊິກກົມການເມືອງສູນກາງພັກຂອງພັກຄອມມູນິສຈີນ.
ທ່ານ ບລິງເກັນ ກ່າວວ່າ ທ່ານຈະຈັດວາງແບບແຜນກ່ຽວກັບ “ຄວາມແຕກຕ່າງຂອງພວກເຮົາ, ເຊິ່ງນັ້ນຄືຄວາມຈິງ” ແຕ່ພະຍາຍາມ “ດໍາເນີນງານຜ່ານສິ່ງເຫຼົ່ານັ້ນໄປໃຫ້ໄດ້” ເຊັ່ນດຽວກັບ ພະຍາຍາມ “ສ້າງການຮ່ວມມື ໃນສິ່ງທີ່ພວກເຮົາສາມາດດໍາເນີນການໄດ້.”
ໃນການຕ້ອນຮັບທ່ານລັດຖະມົນຕີການຕ່າງປະເທດສູ່ນະຄອນຊຽງໄຮ ຢູ່ທີ່ຫໍປະຊຸມໃຫຍ່ຂອງນະຄອນແຫ່ງນີ້, ທ່ານ ເສີນ ກ່າວຜ່ານນາຍແປພາສາວ່າ ນັບຕັ້ງແຕ່ສ້າງຕັ້ງສາຍພົວພັນທາງການທູດເປັນຕົ້ນມາ ຄວາມສໍາພັນລະຫວ່າງສອງປະເທດບໍ່ໄດ້ລ່ຽນໄຫຼສະເໝີໄປ, ມັນມີ “ການບິດບ້ຽວ ແລະປີ້ນໄປມາ” ຢູ່ເລື້ອຍໆ, “ແຕ່ໂດຍລວມແລ້ວ, ແມ່ນມີຄວາມກ້າວໜ້າຕາມການພັດທະນາທາງປະຫວັດສາດ ແລະກ້າວໄປຂ້າງຫນ້າ.”
ທ່ານ ບລິງເກັນ ໄດ້ໄປນະຄອນຊຽງໄຮ້ຄັ້ງຫຼ້າສຸດໃນປີ 2015, ໃນຊ່ວງເວລາທີ່ທ່ານເປັນຮອງລັດຖະມົນຕີການຕ່າງປະເທດ.
ໂຄສົກກະຊວງການຕ່າງປະເທດ ທ່ານແມັດທິວ ມີລເລີ ກ່າວ ໂດຍເວົ້າເຖິງສາທາລະນະລັດປະຊາຊົນຈີນ ຫຼື PRC ວ່າ “ໃນການແລກປ່ຽນທີ່ມີລັກສະນະສ້າງສັນ ແລະກົງໄປກົງມາ, ທ່ານລັດຖະມົນຕີ ໄດ້ຍົກໃຫ້ເຫັນເຖິງຄວາມກັງວົນກ່ຽວກັບນະໂຍບາຍການຄ້າ ແລະການດຳເນີນງານທີ່ບໍ່ແມ່ນເສດຖະກິດຕະຫຼາດຂອງ PRC, ພ້ອມທັງເນັ້ນໜັກວ່າ ສະຫະລັດ ພະຍາຍາມສະແຫວງຫາການແຂ່ງຂັນທາງດ້ານເສດຖະກິດທີ່ມີຄວາມເຂັ້ມແຂງກັບ PRC ແລະສະໜາມແຂ່ງຂັນທີ່ເທົ່າທຽມກັນສຳລັບຄົນງານ ແລະບໍລິສັດຕ່າງໆຂອງສະຫະລັດ ທີ່ກໍາລັງດໍາເນີນງານຢູ່ໃນປະເທດຈີນ.”
ໃນລະຫວ່າງການສົນທະນາກັບນັກສຶກສາອາເມຣິກັນ ແລະນັກສຶກສາຈີນ ຈາກມະຫາວິທະຍາໄລນິວຢອກ ຊຽງໄຮ, ທ່ານ ບລິງເກັນ ໄດ້ເນັ້ນໜັກໃຫ້ເຫັນເຖິງຄວາມສໍາຄັນຂອງການຂະຫຍາຍການແລກປ່ຽນລະຫວ່າງນັກສຶກສາ, ນັກວິຊາການ, ແລະທຸລະກິດອື່ນໆ.
ທ່ານກ່າວວ່າ “ພວກເຮົາຕ້ອງເຮັດໃຫ້ໝັ້ນໃຈວ່າ ພວກເຮົາກຳລົງໂອ້ລົມກັນ, ໄດ້ຍິນກັນ, ພ້ອມທັງ ເຂົ້າໃຈກັນ.”