ລັດຖະມົນຕີການຕ່າງປະເທດ ສະຫະລັດ ທ່ານ ແອນໂທນີ ບລິງເຄັນ ຈະເດີນທາງໄປ ອິສຣາແອລ ໃນວັນສຸກມື້ນີ້ ໃນຄວາມພະຍາຍາມທີ່ມີການເດີມພັນສູງເພື່ອເຮັດຂໍ້ຕົກລົງຢຸດຍິງ ລະຫວ່າງ ອິສຣາແອລ ແລະ ກຸ່ມຫົວຮຸນແຮງ ຮາມາສ ໃນຂະນະທີ່ສະພາຄວາມໝັ້ນຄົງສະຫະປະຊາຊາດ ກະກຽມທີ່ຈະລົງຄະແນນສຽງ ກ່ຽວກັບ ຮ່າງຍັດຕິຂອງ ສະຫະລັດ ທີ່ຮຽກຮ້ອງ “ການສະຫງົບເສິກໃນທັນທີ.”
ໃນ ອິສຣາແອລ, ທ່ານ ບລິງເຄັນ ຈະ “ປຶກສາຫາລືເຖິງຄວາມຈຳເປັນທີ່ຈະຮັບປະກັນຄວາມຜ່າຍແພ້ຂອງກຸ່ມ ຮາມາສ, ລວມທັງໃນເມືອງຣາຟາ, ໃນວິທີທີ່ຈະປົກປ້ອງປະຊາກອນພົນລະເຮືອນ, ຈະບໍ່ຂັດຂວາງການນຳສົ່ງການຊ່ວຍເຫຼືອດ້ານມະນຸດສະທຳ, ແລະ ພັດທະນາການຮັກສາຄວາມປອດໄພຂອງ ອິສຣາແອລ ໂດຍລວມ,” ອີງຕາມຖະແຫຼງການສະບັບນຶ່ງຂອງກະຊວງການຕ່າງປະເທດ.
ສະຫະລັດ ໄດ້ຍົກການຄັດຄ້ານຕໍ່ແຜນການຂອງ ອິສຣາແອລ ທີ່ຈະດຳເນີນການໂຈມຕີທາງພາກພື້ນດິນ ໃນເມືອງ ຣາຟາ, ທີ່ຕັ້ງຢູ່ຕາມເຂດຊາຍແດນ ລະຫວ່າງ ກາຊາ ແລະ ອີຈິບ, ເຊິ່ງ ອິສຣາແອລ ເວົ້າວ່າ ແມ່ນມີຄວາມຈຳເປັນທີ່ຈະບັນລຸເປົ້າໝາຍຂອງເຂົາເຈົ້າ ໃນການເອົາຊະນະກຸ່ມ ຮາມາສ ແລະ ຮັບປະກັນກຸ່ມທີ່ ສະຫະລັດ ກຳນົດວ່າ ເປັນພວກກໍ່ການຮ້າຍນັ້ນ ຈະບໍ່ສາມາດດຳເນີນການໂຈມຕີອີກຄັ້ງນຶ່ງ ຄືກັບການໂຈມຕີໃນວັນທີ 7 ຕຸລາຕໍ່ ອິສຣາແອລ.
ສະຫະລັດ ແມ່ນຄາດວ່າ ຈະມອບຮ່າງຍັດຕິດັ່ງກ່າວ ຕໍ່ສະພາຄວາມໝັ້ນຄົງສະຫະປະຊາຊາດ ໃນວັນສຸກມື້ນີ້ ທີ່ຈະ “ສະໜັບສະໜູນຢ່າງຊັດເຈນຕໍ່ຄວາມພະຍາຍາມທາງການທູດທີ່ດຳເນີນຢູ່ ທີ່ແນໃສ່ການສ້າງຂໍ້ຕົກລົງຢຸດຍິງໃນທັນທີ ໃນເຂດ ກາຊາ ດັ່ງກັບສ່ວນນຶ່ງຂອງຂໍ້ຕົກລົງແລກປ່ຽນຕົວປະກັນ,” ໂຄສົກສຳລັບເອກອັກຄະລັດຖະທູດ ສະຫະລັດ ທ່ານນາງ ລິນດາ ທອມມັສ-ກຣີນຟີລດ໌ ໄດ້ກ່າວໃນຖະແຫຼງການສະບັບນຶ່ງ.
ບັນດາເຈົ້າໜ້າທີ່ ສະຫະລັດ ແມ່ນກຳລັງທຳການເຈລະຈາຂໍ້ຄວາມທີ່ຈະເພັ່ງເລັງໃສ່ການຢຸດຍິງ 6 ອາທິດ ແລະ ປ່ອຍຕົວປະກັນທີ່ຖືກຈັບໄປໂດຍພວກຫົວຮຸນແຮງຮາມາສ ເພື່ອແລກປ່ຽນກັບນັກໂທດ ປາແລັສໄຕນ໌ ທີ່ຖືກຈັບໂດຍ
ອິສຣາແອລ.