ບິດຄອຍ ມີຍອດລາຄາກາຍ 100,000 ໂດລາໄດ້ເປັນຄັ້ງທໍາອິດໃນວັນພະຫັດວານນີ້, ຂະນະທີ່ບັນດານັກລົງທຶນ ເດີມພັນກັບຄະນະປະຕິບັດງານຊຸດໃໝ່ຂອງວ່າທີ່ປະທານາທິບໍດີສະຫະລັດ ທ່ານ ດໍໂນລ ທຣໍາ ທີ່ຄາດວ່າ ຈະທໍາການສະໜັບສະໜູນສະກຸນເງິນຄຣິບໂຕ ໃນຕະຫຼາດເງິນອາເມຣິກາ.
ລາຄາສະກຸນເງິນບິດຄອຍ ເພີ້ມຂຶ້ນຮອດລະດັບ 100,000 ໂດລາ ໃນການຊື້ຂາຍຢູ່ຄະຫຼາດເອເຊຍໃນຊ່ວງຕອນເຊົ້າຂອງວັນພະຫັດວານນີ້ ດ້ວຍອານິສົງໃນການສະເໜີຊື່ ທ່ານ ພອລ ແອທຄິນສ໌ ຜູ້ສະໜັບສະໜູນສະກຸນເງິນຄຣິບໂຕຂະໜາດໃຫຍ່, ໃຫ້ມາເປັນປະທານຄະນະກໍາມາທິການກໍາກັບຕະຫຼາດຫຼັກຊັບຂອງສະຫະລັດ ຫຼື SEC ກ່ອນທີ່ສະກຸນເງິນບິດຄອຍຈະສ້າງສະຖິຕິສູງສຸດເປັນປະຫວັດການຢູ່ທີ່ 103,619 ໂດລາ ຫຼືເພີ້ມຂຶ້ນປະມານ 6 ເປີເຊັນ ແລະປິດຕະຫຼາດໃນການຊື້ຂາຍຂອງເອເຊຍໃນວັນພະຫັດຢູ່ທີ່ 102,650 ໂດລາ.
ມູນຄ່າຕະຫຼາດຄຣິບໂຕທັງໝົດເພີ້ມຂຶ້ນເກືອບທົບເຄິ່ງໃນຊ່ວງ 1 ປີທີ່ຜ່ານມາ ມາເປັນ 3.8 ພັນຕື້ໂດລາ, ອີງຕາມການອ້າງອີງຈາກຜູ້ໃຫ້ບໍລິການຂໍ້ມູນດ້ານສະກຸນເງິນດິຈິຕອລ ຄອນເກັກໂກ (CoinGecko), ຂະນະທີ່ລາຄາສະກຸນເງິນບິດຄອຍ ປັບໂຕເພີ້ມຂຶ້ນຫຼາຍກວ່າທົບເຄິ່ງໃນປີນີ້ ແລະເພີ້ມຂຶ້ນຫຼາຍກວ່າ 50 ເປີເຊັນ ໃນຊ່ວງໄລຍະນຶ່ງເດືອນທີ່ຜ່ານມາ ນັບຕັ້ງແຕ່ ທ່ານ ທຣໍາ ໄດ້ຮັບໄຊຊະນະຈາກການເລືອກຕັ້ງສະຫະລັດ ເຊັ່ນດຽວກັບນັບດານັກການເມືອງທີ່ສະໜັບສະໜູນສະກຸນເງິນຄຣິບໂຕ ທີ່ໄດ້ຮັບເລືອກເຂົ້າໃນສະພາອາເມຣິກາ ຈາກການເລືອກຕັ້ງໃນປີນີ້.
ທ່ານ ໄມຄ໌ ໂນໂວແກຣທສ໌ ຜູ້ກໍ່ຕັ້ງບໍລິສັດຄຣິບໂຕ Galaxy Digital ກ່າວຕໍ່ອົງການຂ່າວ Reuters ວ່າ “ບິດຄອຍ ແລະຊັບສິນດິຈິຕອລ ກໍາລັງກາຍເປັນຮູບແບບທາງການເງິນທີ່ເປັນກະແສອັນສໍາຄັນ ດ້ວຍການຍອມຮັບຈາກສະຖາບັນ, ຄວາມກ້າວໜ້າໃນການປ່ຽນແປງ ໂທກເກັນ ເຊິ່ງເປັນຮູບແບບຂອງການຊໍາລະເງິນ ແລະເສັ້ນທາງຂອງກົດລະບຽບທີ່ຈະແຈ້ງຫຼາຍຂຶ້ນ.”
ທ່ານ ທຣໍາ ເປີດກ້ວາງຮັບສະກຸນເງິນດິຈິຕອລໃນຊ່ວງການຫາສຽງເລືອກຕັ້ງ ໂດຍສັນຍາວ່າ ຈະເຮັດໃຫ້ ອາເມຣິກາ ກາຍມາເປັນ “ເມືອງຫຼວງດ້ານສະກຸນເງິນຄຣິບໂຕຂອງໂລກ,” ແລະບັນດາຜູ້ສະໜັບສະໜູນສະກຸນເງິນບິດຄອຍ ຕ່າງກໍພາກັນຍິນດີໃນການສະເໜີຊື່ ທ່ານ ແອທຄິນສ໌ ເຂົ້າກໍາຕໍາແໜ່ງປະທານ SEC.
ທ່ານ ພອລ ແອທຄິນສ໌ ເຄີຍເປັນອະດີດກໍາມາທິການ SEC ເຊິ່ງມີສ່ວນຮ່ວມກ່ຽວກັບນະໂຍບາຍສະກຸນເງິນຄຣິບໂຕ ໃນຖານະປະທານຮ່ວມຂອງ Token Alliance ເຊິ່ງດໍາເນີນງານເພື່ອ “ພັດທະນາແນວທາງປະຕິບັດທີ່ດີທີ່ສຸດສໍາລັບການອອກສິນຊັບດິຈິຕອລ ພ້ອມທັງ ແພລດຟອມໃນການຊື້ຂາຍ,” ແລະຫໍການຄ້າດິຈິຕອລ.
ນອກຈາກນີ້, ຍັງມີບໍລິສັດຄຣິບໂຕຕ່າງໆ ລວມທັງ Ripple, Kraken ແລະ Circle ທີ່ຍາດແຍ່ງຕໍາແໜ່ງໃນສະພາສໍາລັບທີ່ປຶກສາດ້ານສະກຸນເງິນຄຣິບໂຕຂອງ ທ່ານ ທຣໍາ.