ບັນດາຜູ້ນໍາຂອງໂລກໄດ້ພາກັນສະແດງປະຕິກິລິຍາຕໍ່ຂ່າວການເສຍຊີວິດຂອງນາຍໂອຊາມາບິນລາເດັນ ຫົວໜ້າເຄືອຂ່າຍ al-Qaida.
ທ່ານ George W. Bush ອະດີດປະທານາທິບໍດີສະຫະ
ລັດເອີ້ນການຕາຍຂອງນາຍ ບິນລາເດັນວ່າ ເປັນຄວາມ
ສໍາເລັດທີ່ຍິ່ງໃຫຍ່ອັນນຶ່ງ. ທ່ານ Bush ໄດ້ເປັນປະທານາ
ທິບໍດີ ເວລາເຄືອຂ່າຍal-Qaida ທໍາການໂຈມຕີສະຫະລັດ
ໃນວັນທີ 11 ເດືອນກັນຍາໃນປີ 2001.
ສ່ວນອະດີດປະທານາທິບໍດີ Bill Clinton ໄດ້ເອີ້ນການ
ເສຍຊີວິດຂອງນາຍບິນລາເດັນເປັນເວລາທີ່ສໍາຄັນຢ່າງ
ເລິກເຊິ່ງ.
ປະທານາທິບໍດີ Hamid Karzai ແຫ່ງອັຟການີສຖານກ່າວວ່າ ການເສຍຊີວິດຂອງນາຍບິນລາເດັນໃນປະເທດເພື່ອນບ້ານ ປາກີສຖານນັ້ນ ພິສູດໃຫ້ເຫັນທ່າທີຂອງກຸງຄາບູລມາຕັ້ງແຕ່ດົນນານ ທີ່ວ່າສົງຄາມພວກ ກໍ່ການຮ້າຍບໍ່ໄດ້ມີຮາກເຫງົ້າຢູ່ໃນອັຟການີສຖານ ແລະທ່ານໄດ້ຮຽກຮ້ອງໃຫ້ພວກຕາລີບັນໃນອັຟການີສຖານ ຢຸດເຊົາການຕໍ່ສູ້ຂອງພວກເຂົາ.
ໃນຂະນະດຽວກັນ ລັດຖະມົນຕີກະຊວງພາຍໃນຂອງອິນເດຍ ທ່ານ P. Chidambaram ກ່າວວ່າ ຂ່າວການເສຍຊີວິດຂອງນາຍບິນລາເດັນໄດ້ເນ້ນເຖິງຄວາມເປັນຫ່ວງທີ່ສໍາຄັນທີ່ສຸດຂອງອິນເດຍ ທີ່ວ່າພວກກໍ່ການຮ້າຍຫາບ່ອນລີ້ໄພຫລືລີ້ຊ່ອນໄດ້ໃນປາກີສຖານ.
ທ່ານ David Cameron ນາຍົກລັດຖະມົນຕີອັງກິດກ່າວວ່າ ຂ່າວ ການເສຍຊີວິດຂອງຜູ້ນໍາເຄືອຂ່າຍ al-Qaida ສ້າງຄວາມໂລ່ງໃຈຢ່າງໃຫຍ່ຫລວງ ໃຫ້ແກ່ປະຊາຊົນໃນທົ່ວໂລກ.
ປະທານາທິບໍດີຝຣັ່ງ ທ່ານ Nicolas Sarkozy ເອີ້ນການຕາຍຂອງ ນາຍບິນລາເດັນວ່າ ເປັນຄວາມສໍາເລັດຄັ້ງສໍາຄັນໃນການຕໍ່ຕ້ານກັບພວກກໍ່ການຮ້າຍ.
ປະຊາຊົນໄປໂຮມຊຸມນຸມ ສະແດງຄວາມດີໃຈ ຢູ່ຈະຕຸລັດ Times Square ທີ່ນະຄອນນິວຢອກ ໃນຕອນເຊົ້າມືດຂອງວັນທີ 2 ພຶດສະພາ 2011 ຫລັງຈາກປະທານາທິບໍດີໂອບາມາປະກາດຂ່າວວ່າ ນາຍບິນລາເດັນ ຕາຍແລ້ວ.
ໃນສະຫະລັດ ພວກຝູງຊົນທີ່ມີຄວາມດີອົກດີໃຈຢ່າງຟົດຟື້ນພາກັນໄປເຕົ້າໂຮມກັນຢູ່ຂ້າງນອກທໍານຽບຂາວໃນກຸງວໍຊິງຕັນ ແລະທີ່ຈະຕຸລັດ Times Square ທີ່ນະຄອນນີວຢອກ ຕະຫລອດທັງຢູ່ທີ່ຈຸດໂຈມຕີຂອງພວກກໍ່ການຮ້າຍທີ່ເອີ້ນກັນວ່າ Ground Zero ນັ້ນ ເພື່ອສະຫລອງການເສຍຊີວິດຂອງນາຍ ບິນລາເດັນ.