ຢາວັກຊີນອີກ 500 ລ້ານໂດສ ແມ່ນໄດ້ນຳອອກຈາກສະຫະລັດ ໄປສູ່ທົ່ວໂລກ - ຫຼື ດັ່ງທີ່ປະທານາທິບໍດີໂຈ ໄບເດັນໄດ້ເວົ້າໃນວັນພຸດວານນີ້ ຂະນະທີ່ທ່ານມີການປະຊຸມສຸດຍອດ ເພື່ອແກ້ໄຂການແຜ່ລະບາດຂອງພະຍາດໃນໂລກນັ້ນວ່າ: ສຳລັບຢາວັກຊີນທຸກໆເຂັມທີ່ຊາວອາເມຣິກັນໄດ້ສັກ, ຊາວອາເມຣິກັນແມ່ນກຳລັງສົ່ງຢານັ້ນ 3 ເຂັມ ໄປໃຫ້ຄົນໃນໂລກສັກ.
"ຂ້າພະເຈົ້າຮັກສາຄຳໝັ້ນສັນຍາວ່າ ອາເມຣິກາຈະກາຍເປັນຄັງອາວຸດວັກຊີນ, ດັ່ງທີ່ພວກເຮົາເປັນຄັງອາວຸດສຳລັບປະຊາທິປະໄຕໃນລະຫວ່າງສົງຄາມໂລກຄັ້ງທີສອງ," ນັ້ນຄືຄໍາເວົ້າຂອງທ່ານໄບເດັນທີ່ກ່າວໃນວັນອັງຄານຜ່ານມາໃນຂະນະທີ່ທ່ານໄດ້ພົບປະກັບບັນດາຜູ້ນໍາຂອງປະເທດອາຟຣິກາໃຕ້, ອິນໂດເນເຊຍ, ການາດາ, ອັງກິດ ແລະສະຫະພາບຢູໂຣບ ແລະຫົວໜ້າອົງການອະນາໄມໂລກ, ທ່ານເຕດຣົສ ອາດານອມ ເກເບຣເຢສຊຸສ (Tedros Adhanom Ghebreyesus).
ຢູ່ໃນຄຳປາໄສທີ່ກ່າວໃນວັນອັງຄານຜ່ານມາ ຢູ່ທີ່ອົງການສະຫະປະຊາຊາດນັ້ນ, ທ່ານໄບເດັນໄດ້ກ່າວອ້າງເຖິງວັກຊີນຫຼາຍກ່ວາ 160 ລ້ານໂດສ ທີ່ສະຫະລັດໄດ້ແຈກຢາຍໄປແລ້ວໃຫ້ແກ່ຫຼາຍກວ່າ 100 ປະເທດ, ເຊິ່ງແມ່ນປະລິມານທີ່ຫຼາຍກວ່າວັກຊີນຂອງປະເທດອື່ນທັງໝົດມາລວມເຂົ້າກັນ. ການປະກາດໃນວັນພຸດວານນີ້ ເຮັດໃຫ້ມີຈໍານວນວັກຊີນເພີ່ມຂຶ້ນເປັນ 1 ຕື້ 100 ລ້ານໂດສທີ່ສະ ຫະລັດໄດ້ໃຫ້ຄໍາໝັ້ນສັນຍາວ່າ ຈະຊື້ໄປໃຫ້ປະເທດອື່ນ. ການບໍລິຈາກຄັ້ງຫລ້າສຸດແມ່ນວັກຊີນໄຟເຊີ (Pfizer) ທີ່ສັກສອງເຂັມນັ້ນ.
ທ່ານໄບເດັນຍັງໄດ້ປະກາດອີກໃນວັນພຸດວານນີ້ວ່າ ຈະໃຫ້ເງິນອີກ 370 ລ້ານໂດລາ ເພື່ອຈະນໍາເອົາວັກຊີນເຫຼົ່ານັ້ນໄປສັກໃສ່ແຂນຂອງຄົນຢູ່ທົ່ວໂລກໄດ້, ແລະ 380 ລ້ານໂດລາ ໃຫ້ແກ່ພັນທະມິດຢາວັກຊີນທົ່ວໂລກ ຫລື GAVI, ເພື່ອອຳນວຍຄວາມສະດວກໃນການແຈກຢາຍວັກຊີນໃຫ້ຄົນທົ່ວໂລກເພີ້ມອີກ. ສະຫະລັດຍັງໃຫ້ການຊ່ວຍເຫຼືອ 1 ຕື້ 400 ລ້ານໂດລາ ເພື່ອຫຼຸດຜ່ອນການເສຍຊີວິດຍ້ອນໂຄວິດ-19 ແລະຫຼຸດຜ່ອນການຕິດຕໍ່ຂອງພະຍາດນີ້.
ພ້ອມກັນນັ້ນ ໃນວັນພຸດວານນີ້ ຮອງປະທານາທິບໍດີຄາມາລາ ແຮຣີສ ໄດ້ປະກາດຄຳໝັ້ນສັນຍາຂອງສະຫະລັດວ່າ ຈະໃຫ້ເງິນຈຳນວນ 250 ລ້ານໂດລາ ແກ່ກົນໄກການສະໜອງທຶນໃໝ່ຂອງໂລກຢູ່ທີ່ທະນາຄານໂລກ ເພື່ອປ້ອງກັນການລະບາດຢ່າງໜັກຂອງພະຍາດໃນອະນາຄົດ, ໂດຍທີ່ມີເປົ້າໝາຍລວມທັງ ໝົດຢູ່ 10 ຕື້ໂດລາ.
Your browser doesn’t support HTML5
US Donates an Additional 500 Million Doses of Pfizer Vaccine
ທ່ານນາງກ່າວວ່າ "ໂຣກລະບາດນີ້ໂຈມຕີເຮົາໄດ້ກໍຍ້ອນພວກເຮົາບໍ່ລະມັດລະວັງ, ແລະມັນບໍ່ຄວນເປັນແນວນັ້ນ," "ພວກເຮົາໄດ້ຮຽນຮູ້ຜົນເສຍຫາຍຕາມມາຂອງການທີ່ບໍ່ໄດ້ກະກຽມ. ໂດຍທີ່ມີການຕາຍເກີດຂຶ້ນທຸກໆຄັ້ງ, ພວກເຮົາໄດ້ຮຽນຮູ້ເຖິງຄວາມຮ້າຍແຮງຂອງຜົນຕາມມາທີ່ບໍ່ມີການກະກຽມນັ້ນຫຼາຍເກີນໄປໂພດ. ແລະເພາະສະນັ້ນຫລະ ມັນເຖິງເວລາແລ້ວທີ່ຈະຕ້ອງໄດ້ເຮັດ."