ປະທານາທິບໍດີສະຫະລັດ, ທ່ານໂຈ ໄບເດັນ ໃນວັນອັງຄານວານນີ້ ໄດ້ສັນລະເສີນກຳມະກອນຜະລິດລູກສອນໄຟ ຕໍ່ຕ້ານລົດຖັງ ທີ່ກຳລັງຖືກສົ່ງໄປໃຫ້ພວກ ນັກລົບຢູເຄຣນ ໂດຍກ່າວວ່າ ພວກກຳມະກອນເຫລົ່ານີ້ໄດ້ “ເຮັດໃຫ້ປະຊາຊົນ ຢູເຄຣນສາມາດປ້ອງກັນຕົວເອງໄດ້.”
ທ່ານກ່າວວ່າ “ເວົ້າຢ່າງກົງໆ”, ຊາວຢູເຄຣນ “ໄດ້ເຮັດໃຫ້ທະຫານຣັດເຊຍຕົກໂງ່ໄດ້ໃນຫຼາຍໆກໍລະນີ. ... ອາວຸດທີ່ຜະລິດດ້ວຍມືຂອງພວກທ່ານ ແມ່ນໄປຢູ່ ໃນກໍາມືຂອງວິລະຊົນຢູເຄຣນ. ຂອບໃຈສໍາລັບສິ່ງທີ່ພວກທ່ານໄດ້ເຮັດນັ້ນ.”
ທ່ານໄບເດັນໄດ້ຍ້ອງຍໍຄົນງານ 265 ຄົນຢູ່ໂຮງງານຜະລິດອາວຸດ ລັອກຫີດ ມາຕິນ (Lockheed Martin) ໃນພາກໃຕ້ຂອງເມືອງທຣອຍ, ລັດອາລາບາມາ ໂດຍປຽບທຽບພວກເຂົາເຈົ້າໃສ່ກັບກຳມະກອນອາເມຣິກັນທີ່ຜະລິດອາວຸດ ໃນສະໄໝສົງຄາມໂລກຄັ້ງທີ 2.
ທ່ານໄບເດັນກ່າວວ່າ “ພວກເຮົາຢູ່ໃນຈຸດທີ່ມີການປ່ຽນແປງໃນປະຫວັດສາດໃນການສູ້ລົບກັນລະຫວ່າງການຜະເດັດການ ແລະປະຊາທິປະໄຕ.”
ໂດຍການອ້າງເຖິງແຕ່ບໍ່ເອີ່ຍຊື່ປະທານາທິບໍດີຣັດເຊຍ, ທ່ານວລາດິເມຍ ປູຕິນ ແລະການບຸກລຸກຢູເຄຣນຂອງທ່ານເປັນເວລາ 10 ອາທິດນັ້ນ ທ່ານໄບເດັນ ກ່າວຕື່ມວ່າ "ຖ້າທ່ານບໍ່ຕ້ານຢັນກັບພວກຜະເດັດການ, ພວກເຂົາກໍຈະສືບຕໍ່ມາ ຫາທ່ານຢູ່ເລື້ອຍ."
ຜູ້ນໍາສະຫະລັດທ່ານນີ້ກ່າວວ່າ ລູກສອນໄຟຂີປະນາວຸດທີ່ມີຄວາມຍາວ 1 ແມັດ ທີ່ຕັ້ງໃສ່ບ່າຍິງນັ້ນ ໄດ້ສ້າງຄວາມເສຍຫາຍຢ່າງໜັກໜ່ວງແກ່ລົດຖັງຣັດເຊຍ ທີ່ພໍ່ແມ່ຊາວຢູເຄຣນບາງຄົນ ໄດ້ຕັ້ງຊື່ໃຫ້ລູກຊາຍທີ່ເກີດໃໝ່ຂອງເຂົາເຈົ້າວ່າ ຈາແວລິນ (Javelin) ແລະລູກສາວວ່າ ຈາແວລີນາ (Javelina).
ພວກນັກວິເຄາະດ້ານການທະຫານກ່າວວ່າ ລົດຖັງຂອງຣັດເຊຍຫຼາຍເຖິງ 1,000 ຄັນ ຖືກທຳລາຍໃນການສູ້ລົບກັນ ຊຶ່ງໃນນັ້ນຫຼາຍຄັນຖືກຍິງໂດຍລູກສອນໄຟຈາແວລິນ (Javelin) ທີ່ຍິງຈາກໄລຍະໄກເຖິງ 2,500 ແມັດນັ້ນ.
ລູກສອນໄຟຈາແວລິນມີມູນຄ່າຫຼາຍກວ່າ 2 ແສນໂດລາຕໍ່ລູກ ແລະທ່ານໄບເດັນ ຍອມຮັບວ່າ ການສະໜັບສະໜູນຂອງສະຫະລັດທີ່ມີຢູ່ນີ້ແກ່ຢູເຄຣນໃນການຕໍ່ສູ້ກັບຣັດເຊຍ "ບໍ່ໄດ້ມີລາຄາຖືກເລີຍ."
ແຕ່ທ່ານຮຽກຮ້ອງໃຫ້ລັດຖະສະພາດຳເນີນການໂດຍໄວກ່ຽວກັບຄຳຮ້ອງຂໍຊຸດ
ໃໝ່ທີ່ມີມູນຄ່າ 33 ຕື້ໂດລາສຳລັບຊ່ວຍເຫຼືອດ້ານການທະຫານ ແລະເສດຖະ ກິດໃຫ້ແກ່ຢູເຄຣນ, ເຊິ່ງເປັນເງິນຊ່ວຍເຫລືອເພີ້ມໃຫ້ເງິນ 13 ຕື້ 600 ລ້ານໂດລາທີ່ໄດ້ອະນຸມັດ ແລະຈ່າຍໄປແລ້ວນັ້ນ.