ປະທານາທິບໍດີສະຫະລັດ ທ່ານໂຈ ໄບເດັນ ກ່າວໃນຕອນແລງຂອງວັນອັງຄານວານນີ້ວ່າ: ທ່ານ “ໂສກເສົ້າ ແລະເສຍໃຈ” ຫຼັງຈາກການໂຈມຕີທາງອາກາດຂອງອິສຣາແອລໃສ່ຂົງເຂດກາຊາ ໄດ້ສັງຫານພະນັກງານ 7 ຄົນຈາກກຸ່ມຊ່ວຍເຫຼືອ World Central Kitchen.
ທ່ານ ໄບເດັນ ກ່າວໃນຖະແຫຼງການວ່າ: “ພວກເຂົາເຈົ້າກໍາລັງສະໜອງອາຫານໃຫ້ແກ່ພົນລະເຮືອນທີ່ອຶດຫິວທ່າມກາງສົງຄາມ. ພວກເຂົາເຈົ້າກ້າຫານ ແລະບໍ່ເຫັນແກ່ໂຕ. ການເສຍຊີວິດຂອງພວກເຂົາເຈົ້າ ແມ່ນເຫດການທີ່ເສົ້າໂສກທີ່ສຸດ.”
ຜູ້ນຳສະຫະລັດກ່າວວ່າ: ການໂຈມຕີໃນວັນອັງຄານວານນີ້ ບໍ່ແມ່ນເຫດການອັນດຽວ, ແລະອິສຣາແອລ “ບໍ່ໄດ້ດໍາເນີນງານພຽງພໍເພື່ອປົກປ້ອງພວກພະນັກງານຊ່ວຍເຫຼືອ ທີ່ພະຍາຍາມນໍາສົ່ງຄວາມຊ່ວຍເຫຼືອທີ່ຈຳເປັນຢ່າງຍິ່ງໃຫ້ແກ່ພົນລະເຮືອນ.”
Your browser doesn’t support HTML5
US ‘outraged’ over Israeli strike that killed 7 aid workers
ທ່ານ ໄບເດັນ ກ່າວວ່າ: “ສະຫະລັດຈະສືບຕໍ່ດໍາເນີນການທຸກຢ່າງເທົ່າທີ່ພວກເຮົາສາມາດກະທໍາໄດ້ ເພື່ອນໍາສົ່ງການຊ່ວຍເຫລືອດ້ານມະນຸດສະທຳໃຫ້ແກ່ພົນລະເຮືອນຊາວປາແລັສໄຕນ໌ທີ່ອາໄສຢູ່ໃນເຂດກາຊາ ໂດຍຜ່ານທຸກວິທີທາງທີ່ມີຢູ່, ຂ້າພະເຈົ້າຈະສືບຕໍ່ກົດດັນອິສຣາແອລໃຫ້ດໍາເນີນງານຫຼາຍຂຶ້ນ ເພື່ອອໍານວຍຄວາມສະດວກໃຫ້ແກ່ການຊ່ວຍເຫຼືອ. ແລະພວກເຮົາກຳລັງຜັກດັນໃຫ້ມີການຢຸດຍິງໃນທັນທີ ເຊິ່ງເປັນສ່ວນນຶ່ງຂອງຂໍ້ຕົກລົງກ່ຽວກັບໂຕປະກັນ.”
World Central Kitchen ກ່າວວ່າ: ເຫດການດັ່ງກ່າວ ໄດ້ຜັກດັນໃຫ້ຕົນຍຸຕິຄວາມພະຍາຍາມທາງດ້ານມະນຸດສະທຳຢູ່ໃນພາກພື້ນແຫ່ງນັ້ນໃນທັນທີ ລຸນຫຼັງການໂຈມຕີ.
ອົງການເພື່ອການກຸສົນກ່າວໃນຖະແຫຼງການວ່າ: ຕົນໄດ້ສຳເລັດການຈັດສົ່ງເຄື່ອງຊ່ວຍເຫຼືອທີ່ເປັນສະບຽງອາຫານຈໍານວນ 100 ໂຕນ ໃຫ້ແກ່ສາງແຫ່ງນຶ່ງ ທີ່ຕັ້ງຢູ່ໃນເມືອງ ເດຍ ອາລ-ບາລະ, ແລະ ຂະບວນລົດຫຸ້ມເກາະ 2 ຄັນ ທີ່ມີເຄື່ອງໝາຍຂອງກຸ່ມ ກໍໄດ້ເດີນທາງອອກຈາກສະຖານທີ່ດັ່ງກ່າວເມື່ອຖືກໂຈມຕີ.