ປະທານາທິບໍດີ ສະຫະລັດ ທ່ານ ໂຈ ໄບເດັນ ໄດ້ພົບປະກັບທີມຄວາມໝັ້ນຄົງແຫ່ງຊາດໃນວັນຈັນທີ່ຜ່ານມາ ແລະ ໄດ້ລົມກັບກະສັດແຫ່ງປະເທດ ຈໍແດນ ເພື່ອຫຼຸດຜ່ອນຄວາມເຄັ່ງຕຶງທີ່ໄດ້ເພີ່ມສູງຂຶ້ນໃນເຂດຕາເວັນອອກກາງ ຫຼັງຈາກການລອບສັງຫານທີ່ໄດ້ຮັບຄວາມສົນໃຈເປັນຢ່າງສູງສອງຄັ້ງ. ຜູ້ນຳຂອງ ອິສຣາແອລ ໄດ້ເຕືອນວ່າປະເທດຈະຕອບໂຕ້ຢ່າງໜັກໜ່ວງຖ້າຖືກໂຈມຕີໂດຍ ອີຣ່ານ ຫຼື ພວກຕົວແທນຂອງເຂົາເຈົ້າຢູ່ໃນພາກພື້ນ. ນັກຂ່າວວີໂອເອ ອານິຕາ ພາວ ລາຍງານຈາກທຳນຽບຂາວ.
Your browser doesn’t support HTML5
ທ່ານ ໄບເດັນ ແນເປົ້າເພື່ອຫຼຸດຜ່ອນຄວາມເຄັ່ງຕຶງໃນເຂດຕາເວັນອອກກາງ
ຄວາມເຄັ່ງຕຶງແມ່ນການຳລັງສູງຂຶ້ນຢູ່ໃນບັນດາປະເທດທີ່ຕັ້ງຢູ່ແຄມຝັ່ງທະເລເມດີເທີເຣນຽນ, ດ້ວຍ ອິສຣາແອລ ປະເຊີນກັບໄພຂົ່ມຂູ່ຈາກ ອີຣ່ານ ແລະ ຢູ່ຕາມເຂດຊາຍແດນພາກເໜືອຂອງເຂົາເຈົ້າ.
ໃນຂະນະທີ່ເຂົາເຈົ້າກຳລັງພະຍາຍາມຈະປາບປາມກຸ່ມ ຮາມາສ ຢູ່ໃນເຂດກາຊາ ຫຼັງຈາກຄວາມຂັດແຍ້ງເກືອບ 10 ເດືອນ.
ໃນນະຄອນຫຼວງ ວໍຊິງຕັນ, ປະທານາທິບໍດີ ໂຈ ໄບເດັນ ແມ່ນກຳລັງພະຍາຍາມທີ່ຈະຜ່ອນຄາຍຄວາມເຄັ່ງຕຶງລົງ ຫຼັງຈາກການລອບສັງຫານບຸກຄົນລະດັບສູງສອງຄົນທີ່ຕໍ່ຕ້ານ ອິສຣາແອລ ໃນອາທິດທີ່ຜ່ານມາ.
ທຳນຽບຂາວໄດ້ກ່າວໃນທ້າຍອາທິດທີ່ຜ່ານມາວ່າ ເຂົາເຈົ້າມີຄວາມມຸ່ງໝັ້ນຕໍ່ການປ່ອຍຕົວປະກັນ ແລະ ຂໍ້ຕົກລົງຢຸດຍິງ ທີ່ປັດຈຸບັນນີ້ຍາກຈະອະທິບາຍ ແຕ່ໄດ້ກ່າວຢ້ຳວ່າ ວໍຊິງຕັນ ຈະຢືນພ້ອມເພື່ອບຕອບສະໜອງ ແລະ ໄດ້ຂະຫຍາຍແຫຼ່ງຊັບພະຍາກອນທາງທະຫານຕໍ່ພາກພື້ນດັ່ງກ່າວ.
ໂຄສົກດ້ານຄວາມໝັ້ນຄົງຂອງທຳນຽບຂາວ ທ່ານ ຈອນ ເຄີບີ ໄດ້ກ່າວຕໍ່ໂທລະພາບ Fox News ໃນອາທິດທີ່ຜ່ານມາ.
ທ່ານ ຈອນ ເຄີບີ, ໂຄສົກດ້ານຄວາມໝັ້ນຄົງແຫ່ງຊາດຂອງທຳນຽບຂາວກ່າວວ່າ “ພວກເຮົາຍັງເຊື່ອວ່າຂໍ້ຕົກລົງຢຸດຍິງແມ່ນວິທີທີ່ດີທີ່ສຸດ ເພື່ອເຮັດໃຫ້ສົງຄາມນີ້ສິ້ນສຸດລົງ. ສິ່ງອື່ນໆທີ່ພວກເຮົາໄດ້ເຮັດນັບຕັ້ງແຕ່ວັນທີ 7 ຕຸລາແມ່ນການຮັບປະກັນວ່າ ບໍ່ມີແຕ່ ອິສຣາແອລ ເທົ່ານັ້ນທີ່ຕ້ອງການຈະປ້ອງກັນຕົນເອງ, ແຕ່ບໍ່ໃຫ້ສົງຄາມນີ້ກາຍເປັນສິ່ງອື່ນທີ່ກວ້າງຂວາງກວ່ານີ້.”
ບັນດານັກວິເຄາະກ່າວວ່ານີ້ແມ່ນຊ່ວງເວລາທີ່ເຄັ່ງຕຶງ.
ທ່ານນາງ ນາຕາຊາ ຮອລ, ຈາກສູນກາງເພື່ອແຜນຍຸດທະສາດ ແລະ ການສຶກສາສາກົນ ກ່າວວ່າ “ຂ້າພະເຈົ້າຄິດວ່າເຫດຜົນກໍແມ່ນວ່າ ນີ້ກໍເປັນຕາຢ້ານຄືກັນ, ເວົ້າຄວາມຈິງແລ້ວ, ສຳລັບທຸກຄົນ, ກໍແມ່ນວ່າມັນບໍ່ມີຄວາມກະຈ່າງແຈ້ງວ່າ ສະຫະລັດ ສາມາດເຮັດຫຍັງໄດ້ແດ່ ເວລາທີ່ພວກເຮົາໃກ້ຈະເກີດບັນຫານີ້.”
ບັນດາຜູ້ສະໜັບສະໜູນສຳລັບຊຸມຊົນມຸສລິມ ອາເມຣິກັນ, ເຊິ່ງໄດ້ຕຳໜິວິຈານການສະໜັບສະໜູນຢ່າງແຂງແກ່ນຂອງທ່ານ ໄບເດັນ ສຳລັບ ອິສຣາແອລ ກ່າວວ່າ ວໍຊິງຕັນ ຄວນແຕ້ມເສັ້ນທີ່ແນ່ນອນ ກ່ຽວກັບ ການຮຸກຮານຂອງ ອິສຣາແອລ ໃນເຂດກາຊາ.
ທ່ານ ໂຣເບີດ ແມັກຄໍ, ຈາກສະພາສາຍພົວພັນ ອາເມຣິກັນ-ອິສລາມ ກ່າວວ່າ “ມີເຄື່ອງມືທາງການທູດ ແລະ ການເມືອງຢ່າງຫຼວງຫຼາຍໃນການເຮັດໃຫ້ ອິສຣາແອລ ຕ້ອງຮັບຜິດຊອບ ບໍ່ວ່າຈະເປັນການກັກການຊ່ວຍເຫຼືອ, ລູກປືນ, ອາວຸດ, ການສະໜັບສະໜູນທາງການເມືອງ ຫຼື ວາງມາດຕະການລົງໂທດເພີ່ມເຕີມໃສ່ພວກຕັ້ງຖິ່ນຖານຂວາຈັດຂອງ ອິສຣາແອລ ທີ່ກໍ່ເຫດຮຸນແຮງ.”
ນາຍົກລັດຖະມົນຕີ ເບັນຈາມິນ ເນຕັນຢາຮູ ໄດ້ກ່າວວ່າ ອິສຣາແອລ ມີຄວາມມຸ່ງໝັ້ນທີ່ຈະຢືນຕໍ່ສູ້ກັບ ອີຣ່ານ ແລະ ພວກຕົວແທນຂອງເຂົາເຈົ້າ “ໃນທຸກໆດ້ານ.”
ທ່ານ ເບັນຈາມິນ ເນຕັນຢາຮູ ນາຍົກລັດຖະມົນຕີ ອິສຣາແອລ ກ່າວວ່າ “ທຸກຄົນຜູ້ທີ່ຄາດຕະກຳປະຊາຊົນຂອງພວກເຮົາ, ຄົນໃດກໍຕາມທີ່ທຳຮ້າຍປະເທດຂອງພວກເຮົາຈະຖືກນຳມາຮັບຜິດຊອບ. ລາວຈະຕ້ອງຊົດໃຊ້ຢ່າງໜັກ.”
ລັດຖະມົນຕີການຕ່າງປະເທດຂອງ ຈໍແດນ ເມື່ອບໍ່ດົນມານີ້ໄດ້ທຳການຢ້ຽມຢາມນະຄອນຫຼວງ ເຕຫະຣ່ານ ຂອງ ອີຣ່ານ, ແລະ ທ່ານ ໄບເດັນ ເມື່ອວັນຈັນທີ່ຜ່ານມາໄດ້ລົມກັບກະສັດ ອັບດຸລລາ ທີສອງຂອງ ຈໍແດນ ກ່ຽວກັບ ການຫຼຸດຜ່ອນຄວາມເຄັ່ງຕຶງໃນພາກພື້ນ. ທ່ານນາງ ຮອລ ກ່າວວ່າການທູດ ສະຫະລັດ ກັບ ອີຣ່ານ ຜ່ານຜູ້ໄກ່ເກ່ຍໃນພາກພື້ນເຊັ່ນ ກາຕ້າ ຫຼື ຈໍແດນ ອາດເປັນວິທີທີ່ດີທີ່ສຸດ.
ທ່ານນາງ ນາຕາຊາ ຮອລ ກ່າວວ່າ “ພຽງແຕ່ລົມກັບ ອີຣ່ານ, ພະຍາຍາມແກ້ໄຂຄວາມເປັນຫ່ວງຂອງເຂົາເຈົ້າ, ແຕ່ກໍຕ້ອງເປັນຊ່ອງທາງໃຫ້ ສະຫະລັດ ໝັ້ນໃຈໄດ້ວ່າຈະມີຊ່ອງທາງເປີດໃນຊ່ວງເວລາທີ່ເປັນຕາຢ້ານເຊັ່ນນີ້ ແລະ ຂ້າພະເຈົ້າຄິດວ່າສິ່ງນີ້ມີຄວາມຈຳເປັນຫຼາຍກວ່າທີ່ເຄີຍເປັນ ເນື່ອງຈາກ ສະຫະລັດ ບໍ່ໄດ້ລົມກັບເຈົ້າໜ້າທີ່ລະດັບສູງຂອງ ອີຣ່ານ ໂດຍກົງ.”
ສະນັ້ນດ້ວຍປະຊາຊົນເກືອບ 40,000 ຄົນໄດ້ເສຍຊີວິດ, ເຂດກາຊາ ພັງທະລາຍ, ແລະ ເລບານອນ ແລະ ອີຣ່ານ ມີຄວາມຕື່ນຕົວສູງ, ໂລກແມ່ນກຳລັງລໍຖ້າເບິ່ງສິ່ງທີ່ຈະເກີດຂຶ້ນຕໍ່ໄປ.
ນັກຂ່າວຄົນນຶ່ງໄດ້ຖາມທ່ານ ໄບເດັນ ກ່ຽວກັບ ສິ່ງທີ່ສຳຄັນອັນນຶ່ງໃນຄວາມຂັດແຍ້ງ ໃນຂະນະທີ່ທ່ານໄດ້ເດີນທາງອອກຈາກໂບດໃນວັນອາທິດທີ່ຜ່ານມາ.
ນັກຂ່າວຖາມວ່າ: ທ່ານຄິດວ່າ ອີຣ່ານ ຈະຍອມແພ້ຫຼືບໍ່?
ທ່ານ ໄບເດັນ ກ່າວວ່າ: ຂ້ອຍຫວັງວ່າ. ຂ້ອຍກໍບໍ່ຮູ້.