ທາງການ ລາວ ທຳການກວດສຸຂະພາບແຮງງານຕ່າງຊາດທຸກຄົນທີ່ເດີນທາງມາຈາກພື້ນທີ່ໆມີການລະບາດຂອງເຊື້ອໂຣກ Covid-19 ແລະ ແຮງງານຕ່າງດ້າວດັ່ງກ່າວຍັງຈະຕ້ອງຖືກກັກບໍລິເວນເປັນເວລາ 14 ວັນ.
Your browser doesn’t support HTML5
ຟັງລາຍງານ ທາງການ ລາວ ທຳການກວດສຸຂະພາບ ແຮງງານຕ່າງຊາດທຸກຄົນ ທີ່ເດີນທາງມາຈາກ ພື້ນທີ່ໆມີການລະບາດ ຂອງເຊື້ອໂຣກ Covid-19
ທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຖະແຫຼງວ່າມາດຕະການນຶ່ງທີ່ໄດ້ມີການຈັດຕັ້ງປະຕິບັດຢ່າງເຂັ້ມງວດເພື່ອປ້ອງກັນບໍ່ໃຫ້ເຊື້ອໄວຣັສ Covid-19 ເຂົ້າມາແຜ່ລະບາດໃນ ລາວ ໃນປັດຈຸບັນກໍຄືການກວດສຸຂະພາບຂອງແຮງງານຕ່າງຊາດທຸກຄົນທີ່ເດີນທາງມາຈາກພື້ນທີ່ ຫຼື ປະເທດທີ່ມີການລະບາດຂອງເຊື້ອໂຣກ Covid-19 ໂດຍຖ້າຫາກກວດພົບວ່າມີອາການເປັນໄຂ້ກໍຈະສົ່ງຕົວໄປຍັງສະຖານທີ່ກັກກັນເພື່ອກວດອາການຢ່າງລະອຽດໃນທັນທີ ສ່ວນທີ່ຜູ້ບໍ່ມີອາການໄຂ້ນັ້ນກໍຈະຕ້ອງກັກບໍລິເວນຕົນເອງຢູ່ແຕ່ໃນທີ່ພັກເພື່ອເຝົ້າລະວັງອາການເປັນເວລາ 14 ວັນ ໂດຍນາຍຈ້າງຕ້ອງຮັບຜິດຊອບໃນການເບິ່ງແຍງລູກຈ້າງຂອງຕົນ ແລະ ຈະຕ້ອງໃຫ້ການຮ່ວມມືກັບເຈົ້າໜ້າທີ່ສາທາລະນະສຸກທີ່ໄປກວດເບິ່ງອາການຂອງລູກຈ້າງທີ່ຖືກກັກບໍລິເວນດັ່ງກ່າວອີກດ້ວຍ ດັ່ງທີ່ທ່ານ ລັດຕະນະໄຊ ຢືນຢັນວ່າ
"ຜູ້ປະກອບການທຸລະກິດຕ່າງໆທີ່ມີກຳມະກອນຈາກປະເທດທີ່ມີການລະບາດເມື່ອກັບເຂົ້າມາແລ້ວຈະຕ້ອງໄດ້ຜ່ານມາດຕະການວັດແທກອຸນຫະພູມຖ້າວ່າບໍ່ພົບພາກສ່ວນດັ່ງກ່າວນີ້ຕ້ອງໄດ້ກັກກັນ 14 ວັນ ອາດຈະຢູ່ໃນຫໍພັກທີ່ຖືກຈັດສັນໃຫ້ຈາກບໍລິສັດ ແລ້ວໃຫ້ບໍລິສັດສະໜອງເຄື່ອງແທກອິນຟາເຣດພົກພາຫັ້ນ ສະບູ່, ແກ້ວລ້າງມື, ຜ້າປິດປາກປິດດັງນີ້ໃຫ້ແກ່ຄົນງານ ແລ້ວກະພະແນກສາທາລະນະສຸກຂອງພວກເຮົາຈະສົ່ງທີມແພດໄປອົບຮົມໃຫ້ ແລ້ວກະໄປຕິດຕາມກວດກາຈົນກວ່າໄລຍະ 14 ວັນນີ້ຜ່ານພົ້ນໄປ."
ໃນປັດຈຸບັນນີ້ມີແຮງງານຕ່າງຊາດ 29,825 ຄົນທີ່ໄດ້ຮັບອະນຸຍາດ ແລະ ຊຳລະຄ່າທຳນຽມເພື່ອທຳງານໃນ ລາວ ຢ່າງຖືກຕ້ອງຕາມກົດໝາຍ ຫາກແຕ່ສະຫະພັນກຳມະບານ ລາວ ລາຍງານວ່າມີແຮງງານຕ່າງຊາດ 34,928 ຄົນທີ່ຍັງບໍ່ຊຳລະຄ່າທຳນຽມໃນການອອກບັດອະນຸຍາດທຳງານຢ່າງຖືກຕ້ອງ ຊຶ່ງມີອັດຕາຄ່າທຳນຽມຄົນລະ 3.6 ລ້ານກີບຕໍ່ປີ ຈຶ່ງບໍ່ພຽງຈະເຮັດໃຫ້ລັດຖະບານ ລາວ ຕ້ອງສູນເສຍລາຍຮັບໄປຫຼາຍກວ່າ 125 ຕື້ກີບໃນແຕ່ລະປີເທົ່ານັ້ນ ຫາກແຕ່ການທີ່ຍັງປາກົດມີແຮງງານຕ່າງດ້າວທີ່ລັກລອບເຂົ້າເມືອງ ແລະ ທຳງານໃນ ລາວ ໂດຍຜິດກົດໝາຍຈຳນວນເຖິງ 34,928 ຄົນທີ່ສ່ວນໃຫຍ່ກໍແມ່ນແຮງງານທີ່ມາຈາກ ຈີນ ແລະ ຫວຽດນາມ ທີ່ມີການລະບາດຂອງເຊື້ອໂຣກ Covid-19 ດ້ວຍນັ້ນ ຈຶ່ງນັບເປັນປັດໄຈສ່ຽງທີ່ເຊື້ອໂຣກ Covid-19 ຈະເລັດລອດເຂົ້າມາລະບາດໃນ ລາວ ໄດ້ໃນໄລຍະຕໍ່ໄປ.
ໃນວັນທີ 3 ກຸມພາ 2020 ສະຖານກົງສຸນໃຫຍ່ຂອງ ຈີນ ປະຈຳຫຼວງພະບາງ ໄດ້ສົ່ງໜັງສືເຖິງພະແນກການຕ່າງປະເທດ ແລະ ພະແນກສາທາລະນະສຸກແຂວງຫຼວງພະບາງ ເພື່ອແຈ້ງໃຫ້ຊາບວ່າມີຊາວ ຈີນ 1 ຄົນທີ່ເດີນທາງມາທ່ອງທ່ຽວໃນ ລາວ ລະຫວ່າງວັນທີ 26-31 ມັງກອນ 2020 ໄດ້ຖືກກວດພົບວ່າໄດ້ຮັບເຊື້ອໄວຣັສໂຄໂຣນາ ເມື່ອຜູ້ກ່ຽວເດີນທາງກັບຄືນໄປ ຈີນ ໃນວັນທີ 1 ກຸມພາ 2020 ຈຶ່ງເຮັດໃຫ້ຕ້ອງມີການກວດກາຄືນ ກ່ຽວກັບ ການເດີນທາງ ແລະ ກິດຈະການຕ່າງໆຂອງຜູ້ກ່ຽວຢ່າງລະອຽດໃນຂະນະທີ່ຢູ່ໃນ ລາວ ຊຶ່ງກໍເຮັດໃຫ້ທາງການ ລາວ ໄດ້ກວດວິເຄາະຜູ້ທີ່ຖືກສົງໄສວ່າອາດຈະໄດ້ຮັບເຊື້ອໂຣກ Covid-19 ໃນ ລາວ ຈຳນວນ 45 ກໍລະນີໃນໄລຍະທີ່ຜ່ານມາ ຊຶ່ງພົບວ່າບໍ່ມີກໍລະນີທີ່ໄດ້ຮັບເຊື້ອໄວ້ຣັສດັ່ງກ່າວແຕ່ຢ່າງໃດ.
ທັງນີ້ກະຊວງສາທາລະນະສຸກໄດ້ອອກໜັງສືແຈ້ງການເລກທີ 030 ລົງວັນທີ 20 ມັງກອນ 2020 ເລື່ອງການກຽມຄວາມພ້ອມຢູ່ດ່ານ ເພື່ອຮັບມືໃນການກັນ ແລະ ຄວບຄຸມພະຍາດອັກເສບປອດຈອກເຊື້ອໄວຣັສ Covid-19 ທີ່ໄດ້ຈັດສົ່ງໄປເຖິງບັນດາຫົວໜ້າກອງບັນຊາການປ້ອງກັນຄວາມສະຫງົບຂັ້ນແຂວງ ແລະ ນະຄອຫຼວງວຽງຈັນ, ຫົວໜ້າກົມການບິນພົນລະເຮືອນ, ຫົວໜ້າພະແນກສາທາລະນະສຸກນະຄອນຫຼວງວຽງຈັນ ແລະ ແຂວງໃນທົ່ວປະເທດເພື່ອຂໍການຮ່ວມມື ແລະ ການສະໜັບສະໜູນເຂົ້າໃນການກັນ ແລະ ຄວບຄຸມພະຍາດດັ່ງກ່າວ.
ຫົວໜ້າດ່ານສາກົນທາງບົກ ແລະ ດ່ານສະໜາມບິນຕ້ອງອຳນວຍຄວາມສະດວກໃຫ້ແກ່ທີມງານຈາກກະຊວງສາທາລະນະສຸກໃນການເຄື່ອນໄຫວຕິດຕາມຊຸກຍູ້ ແລະ ສ້າງຄວາມເຂັ້ມແຂງຂອງວຽກການກັນ ແລະ ຄວບຄຸມພະຍາດຕິດຕໍ່ ໃຫ້ເອົາໃຈໃສ່ການປັບປຸງວຽກງານສາທາລະນະສຸກປະຈຳດ່ານ ແລະ ນຳໃຊ້ເຄື່ອງວັດແທກອຸນຫະພູມຮ່າງກາຍ ເພື່ອຕິດຕາມເຝົ້າລະວັງ ແລະ ລາຍງານກໍລະນີທີ່ສົງໄສຢ່າງໃກ້ຊິດໂດຍໃຫ້ເນັ້ນໜັກແຂວງທີ່ມີຊາຍແດນຕິດຕໍ່ກັບ ຈີນ ເຊັ່ນແຂວງຜົ້ງສາລີ, ຫຼວງນ້ຳທາ ແລະ ອຸດົມໄຊ, ລວມເຖິງສະໜາມບິນສາກົນວັດໄຕ, ສະໜາມບິນສາກົນຫຼວງພະບາງ ແລະ ດ່ານອື່ນໆທີ່ມີຜູ້ໂດຍສານເຂົ້າ-ອອກລາວ.