ພະແນກແຜນການແລະການລົງທຶນນະຄອນຫລວງວຽງຈັນ
ໄດ້ອະນຸມັດສຳປະທານທີ່ດິນ ໃຫ້ແກ່ບໍລິສັດເອກະຊົນລາວ
ແລະ ຕ່າງຊາດໄປແລ້ວ 25 ໂຄງການຄິດເປັນມູນຄ່າລົງທຶນ
ເຖິງ 1,660 ລ້ານດອນລາ ໃນຊ່ວງ 6 ປີທີ່ຜ່ານມາ.
Your browser doesn’t support HTML5
ຟັງລາຍງານເລື້ອງ ທາງການລາວ ອະນຸມັດສຳປະທານທີ່ດິນ 25 ໂຄງການ ໃຫ້ກຸ່ມບໍລິສັດລົງທຶນ ໃນໂຄງການບຶງທາດຫລວງ.
ພະແນກແຜນການແລະການລົງທຶນນະຄອນຫລວງວຽງຈັນ ລາຍງານວ່າ ໃນລະຍະແຕ່ປີ
2008 ເຖິງໄຕມາດທຳອິດຂອງປີ 2014 ນີ້ ທາງພະແນກ ໄດ້ອະນຸມັດສຳປະທານທີ່ດິນ ໃຫ້ແກ່ບໍລິສັດເອກະຊົນລາວ ແລະຕ່າງຊາດ ໄປແລ້ວຈຳນວນ 25 ໂຄງການ ຄິດເປັນມູນຄ່າການລົງທຶນລວມກັນເຖິງ 13,280 ຕື້ກີບ ຫຼື ປະມານ 1,660 ລ້ານດອນລາ.
ແຕ່ຢ່າງໃດກໍຕາມ ພະແນກແຜນການແລະການລົງທຶນນະຄອນຫລວງວຽງຈັນ ກໍບໍ່ໄດ້ໃຫ້
ລາຍລະອຽດວ່າ ໃນຈຳນວນທັງ 25 ໂຄງການດັ່ງກ່າວ ມີເນື້ອທີ່ສຳປະທານລວມກັນເທົ່າ
ໃດແທ້ ທັງກໍຍັງບໍ່ໄດ້ໃຫ້ລາຍລະອຽດ ກ່ຽວກັບການລົງທຶນຂອງໂຄງການເຫຼົ່ານັ້ນອີກດ້ວຍ ຫາກແຕ່ກໍເຊື່ອວ່າລາຍງານດັ່ງກ່າວບໍ່ໄດ້ລວມເຖິງໂຄງການພັດທະນາເຂດເສດຖະກິດ ສະເພາະບຶງທາດຫລວງທີ່ເປັນການລົງທຶນຂອງກຸ່ມທຸລະກິດຈີນແຕ່ຢ່າງໃດ ເນື່ອງຈາກວ່າສະເພາະໂຄງການດັ່ງກ່າວນີ້ ກໍມີມູນຄ່າການລົງທຶນເຖິງ 1,600 ລ້ານດອນລາ ແລ້ວນັ້ນເອງ.
ທັງນີ້ໂດຍໂຄງການພັດທະນາເຂດເສດຖະກິດສະເພາະ ບຶງທາດຫລວງ ມີເນື້ອທີ່ສຳປະ
ທານ ເຖິງ 365 ເຮັກຕາ ຊຶ່ງເຮັດໃຫ້ຕ້ອງມີການເວນຄືນທີ່ດິນ ຂອງປະຊາຊົນລາວຈຳນວນ 480 ຕອນ ໂດຍທີ່ຜ່ານມາ ກຸ່ມບໍລິສັດຈາກຈີນກໍສາມາດຕົກລົງ ແລະຈ່າຍເງິນຊົດເຊຍຄ່າ
ທີ່ດິນ ໃຫ້ປະຊາຊົນລາວໄປແລ້ວ 361 ຕອນ ແລະຄິດເປັນມູນຄ່າຫຼາຍກວ່າ 8 ລ້ານດອນລາ ຈຶ່ງຍັງຄົງເຫລືອອີກເຖິງ 119 ຕອນທີ່ຍັງບໍ່ສາມາດຕົກລົງກັນໄດ້ ເນື່ອງຈາກວ່າກຸ່ມບໍລິ
ສັດຈີນ ຈະຊົດເຊຍຄ່າທີ່ດິນໃນອັດຕາ ທີ່ຕ່ຳກວ່າຄວາມເປັນຈິງ ດັ່ງທີ່ເຈົ້າໜ້າທີ່ຂັ້ນສູງຂອງລາວທີ່ ຢູ່ອຳນາດການປົກຄອງນະຄອນຫລວງວຽງຈັນ ໄດ້ໃຫ້ການຢືນຢັນວ່າ:
ໂຄງການພັດທະນາ ເຂດເສດຖະກິດສະເພາະ ບຶງທາດຫລວງ ຢູ່ນະຄອນຫລວງວຽງຈັນ ມີເນື້ອທີ່ ສຳປະທານເຖິງ 365 ເຮັກຕາ.
“ຜ່ານມານີ້ ກະຖືວ່າມັນບໍ່ໄປຕາມລະບົບ ເລີຍເກີດມີບັນຫາ
ຄວາມຫຍຸ້ງຍາກເພາະວ່າ ບໍລິສັດນີ້ ໄປກວມເອົາດິນປະຊາ
ຊົນ ໂຕນີ້ນິ ຄັນວ່າ ມັນໄປກວມດິນປະຊາຊົນແລ້ວ ກໍຕ້ອງ
ໄດ້ແກ້ ໃຫ້ບໍລິສັດເປັນຜູ້ທົດແທນ ຫຼືວ່າຄັນປະຊາຊົນບໍ່ໃຫ້
ບາງເທື່ອນີ້ກະບໍ່ໄດ້ ເພາະວ່າມັນບ່ອນທຳມາຫາກິນຂອງ
ເຂົາເດ້.”
ແຕ່ຢ່າງໃດກໍຕາມ ກຸ່ມບໍລິສັດ Shanghai Wan Feng ຜູ້ລົງທຶນ
ໃນໂຄງການດັ່ງກ່າວ ກໍໄດ້ມີການໃຊ້ຈ່າຍເງິນທຶນໄປແລ້ວ ຫຼາຍ
ກວ່າ 43 ລ້ານດອນລາ ເພື່ອກໍ່ສ້າງຖະໜົນ ທີ່ກວ້າງເຖິງ 36 ແມັດ
ຍາວ 360 ແມັດ ທີ່ເຊື່ອມຕໍ່ຈາກຖະໜົນ T4 ເຂົ້າໄປໃນໂຄງການ
ພ້ອມດ້ວຍການກໍ່ສ້າງສຳນັກງານກັບຫໍພັກສຳຫລັບຄົນງານ ແລະ
ການວາງພື້ນຖານໃຫ້ກັບລະບົບສາທາລະນຸປະໂພກຕ່າງໆ.
ໂດຍກຸ່ມລົງທຶນຈາກຈີນ ໄດ້ເລີ້ມການພັດທະນາເຂດດັ່ງກ່າວນີ້ ນັບແຕ່ປີ 2012 ເປັນຕົ້ນ
ມາ ແລະໄດ້ວາງເປົ້າໝາຍຈະດຳເນີນການໃຫ້ສຳເລັດສົມບູນພາຍໃນປີ 2030 ດ້ວຍເງິນ
ລົງທຶນລວມ 1,600 ລ້ານດອນລາ ຊຶ່ງໃນປັດຈຸບັນນີ້ ເປັນການວາງພື້ນຖານໂຄງລ່າງຕ່າງໆ ເຊັ່ນການກໍ່ສ້າງທາງເຂົ້າ-ອອກ ໂຄງການກໍ່ສ້າງຖະໜົນຢູ່ພາຍໃນໂຄງການ
ການວາງລະບົບລະບາຍນ້ຳ ການຂຸດໜອງນ້ຳສາທາລະນະ ແລະສ້າງຕຶກສູງ 18 ຊັ້ນ
ຈຳນວນ 10 ຕຶກ ສຳຫລັບການພັກອາໄສ ທີ່ກຳນົດຈະໃຫ້ແລ້ວສຳເລັດພາຍໃນປີ 2016.
ໂຄງການດັ່ງກ່າວນີ້ຖືເປັນການພັດທະນາເມືອງແຫ່ງການທ່ອງທ່ຽວ ທີ່ຕິດພັນກັບການພັດ
ທະນາໃນດ້ານອະສັງຫາລິມະຊັບ ທີ່ຄຽງຄູ່ກັບການຮັກສາວັດທະນະທຳ ແລະຮ່ອງຮອຍ
ປະຫວັດສາດ ເພື່ອໃຫ້ເປັນຕົວແບບຂອງການພັດທະນາເມືອງໃໝ່ທີ່ທັນສະໄໝ ທີ່ຮອງ
ຮັບ ທັງການດຳເນີນທຸລະກິດການຄ້າ ແລະການຢູ່ອາໄສ ທີ່ມີສິ່ງອຳນວຍຄວາມສະດວກ ຕ່າງໆ ຢ່າງຄົບຊຸດ ໂດຍຈະຮອງຮັບນັກທຸລະກິດຕ່າງຊາດໄດ້ເຖິງ 5 ໝື່ນລາຍ ເມື່ອການພັດທະນາໂຄງການສຳເລັດສົມບູນ.
ກ່ອນໜ້ານີ້ ຄະນະກຳມາທິການກົດໝາຍ ກັບ ຄະນະກຳມາທິການເສດຖະກິດແຜນການແລະການເງິນປະຈຳສະພາແຫ່ງຊາດລາວ ກໍໄດ້ຮ່ວມກັນພິຈາລະນາກ່ຽວກັບການໃຫ້ສິດ
ທິພິເສດແກ່ກຸ່ມບໍລິສັດຈີນ ທີ່ລົງທຶນພັດທະນາເຂດເສດຖະກິດສະເພາະບຶງທາດຫລວງ
ເພີ້ມຂຶ້ນອີກ.
ກໍຄືສິດທິພິເສດດ້ານການລົງທຶນ ໃນການພັດທະນາທຸລະກິດອະສັງຫາລິມະຊັບ ການອຳ ນວຍຄວາມສະດວກ ໃຫ້ແກ່ນັກລົງທຶນລາຍຍ່ອຍໃນເຂດດັ່ງກ່າວ ການໃຫ້ສິດທິພິເສດໃນການປ້ອງກັນຄວາມສະຫງົບພາຍໃນເຂດເສດຖະກິດສະເພາະ ສິດທິພິເສດໃນການຄຸ້ມຄອງ Apartments ຫຼືທີ່ພັກອາໄສ ແລະ ການອອກ Visa ລະຍະຍາວໃຫ້ແກ່ນັກທຸລະກິດ ຈີນທຸກຄົນ ທີ່ຢູ່ໃນເຂດເສດທະກິດສະເພາະບຶງທາດຫລວງ ເປັນຕົ້ນ.