ອອສເຕຣເລຍ ຈະນຳສະເໜີກົດໝາຍໃໝ່ເພື່ອບັງຄັບໃຫ້ທຸລະກິດທັງຫຼາຍເປີດເຜີຍການຈ່າຍເງິນຕ່າງໆໃຫ້ພວກອາຊະຍາກອນທາງຄອມພິວເຕີ. ລັດຖະບານແຄນເບີຣາ ກ່າວວ່າການປະຕິບັດ ກ່ຽວກັບ ການຈ່າຍເງິນຢ່າງງຽບໆໃຫ້ພວກນັກເຈາະຂໍ້ມູນຮຽກຄ່າໄຖ່ແມ່ນໄດ້ມີຫຼາຍຂຶ້ນ. ນັກຂ່າວວີໂອເອ ຟິລ ເມີເຊີ ມີລາຍງານ, ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານໃນອັນດັບຕໍ່ໄປ.
Your browser doesn’t support HTML5
ອອສເຕຣເລຍ ຈະບັງຄັບໃຫ້ຫົວໜ່ວຍທຸລະກິດ ເປີດເຜີຍການຈ່າຍເງິນຄ່າໄຖ່ໃຫ້ພວກໂຈນທາງຄອມພິວເຕີ
ມັນໄດ້ມີການໂຈມຕີຮຽກຄ່າໄຖ່ທາງຄອມພິວເຕີທີ່ສຳຄັນຕໍ່ຂະແໜງໂທລະຄົມມະນາຄົມຂະໜາດໃຫຍ່, ປະກັນສຸຂະພາບເອກະຊົນ ແລະ ບັນດາບໍລິສັດການເງິນຕ່າງໃນປະເທດ ອອສເຕຣເລຍ ໃນປີທີ່ຜ່ານມາ. ແຕ່ບັນດາເຈົ້າໜ້າທີ່ເຊື່ອວ່າມີການຈ່າຍເງິນຄ່າໄຖ່ຈຳນວນຫຼາຍຕໍ່ພວກອາຊະຍາກອນທາງຄອມພິວເຕີທີ່ບໍ່ໄດ້ຖືກລາຍງານໂດຍອົງການອື່ນໆ ບ່ອນທີ່ເຄືອຂ່າຍຄອມພິວເຕີໄດ້ຖືກທຳລາຍ.
ລັດຖະບານ ແຄນເບີຣາ ມີຈຸດປະສົງທີ່ຈະນຳສະເໜີກົດໝາຍໃໝ່ໃນບໍ່ເທົ່າໃດອາທິດຈະມາເຖິງນີ້ ເພື່ອຊັກຊວນໃຫ້ບັນດາທຸລະກິດທັງຫຼາຍເປີດເຜີຍເວລາທີ່ເຂົາເຈົ້າທຳການຈ່າຍເງິນໃຫ້ພວກລັກເຈາະຂໍ້ມູນ.
ລັດຖະບານທີ່ມີນະໂຍບາຍກາງອຽງຊ້າຍດັ່ງກ່າວ ດັ້ງເດີມແລ້ວມີຈຸດປະສົງທີ່ຈະເຮັດໃຫ້ການຈ່າຍເງິນຄ່າໄຖ່ເປັນສິ່ງຜິດກົດໝາຍ, ແຕ່, ສຳລັບຕອນນີ້, ຈຸດເພັ່ງເລັງແມ່ນໄດ້ປ່ຽນແປງ ເພື່ອຕັ້ງຂະໜາດຂອງບັນຫາ.
ບັນດາລັດຖະມົນຕີຢືນຢັນວ່າກົດໝາຍນິຕິບັນຍັດສະບັບໃໝ່ຈະຖືກໃຊ້ເພື່ອຊ່ວຍຕິດຕາມ ແລະ ຢຸດພວກລັກເຈາະຂໍ້ມູນຈາກການສືບຕໍ່ເຮັດກິດຈະກຳທີ່ຜິດກົດໝາຍຂອງພວກເຂົາ.
ເຂົາເຈົ້າເຊື່ອວ່າໃນພັນທະມິດສືບລັບ “ຫ້າຕາ” ທີ່ມີປະເທດ ອອສເຕຣເລຍ, ອັງກິດ, ການາດາ, ນິວ ຊີແລນ ແລະ ສະຫະລັດ, ເງິນຫຼາຍຕື້ໂດລາໃນຄ່າໄຖ່ແມ່ນໄດ້ຖືກຈ່າຍໃຫ້ພວກອາຊະຍາກອນທາງຄອມພິວເຕີ.
ກົດໝາຍໃໝ່ຂອງ ອອສເຕຣເລຍ ຖືກຮ່າງຂຶ້ນເວລາທີ່ທ່ານນາງ ແຄຼ ໂອນຽລ ເປັນລັດຖະມົນຕີຄວາມປອດໄພທາງຄອມພິວເຕີ ແລະ ລັດຖະມົນຕີກະຊວງພາຍໃນ, ຜູ້ທີ່ຕອນນີ້ເປັນລັດຖະມົນຕີອາຄານສົງເຄາະ ຫຼັງຈາກການສັບປ່ຽນຄະນະລັດຖະມົນຕີເມື່ອທ້າຍອາທິດທີ່ຜ່ານມາ.
ທ່ານນາງໄດ້ກ່າວຕໍ່ໂທລະພາບ ABC ວ່າຂະໜາດຂອງບັນຫາແມ່ນບໍ່ເປັນທີີ່ຮູ້ຈັກ.
ທ່ານນາງ ໂອນຽລ ກ່າວວ່າ “ແທ້ຈິງແລ້ວພວກເຮົາມີສະຖານະການທີ່ປະຊາຊົນໄດ້ຈ່າຍເງິນໃຫ້ພວກອາຊະຍາກອນ ແລະ ມັນກໍາລັງເກີດຂຶ້ນໃນຄວາມມືດ. ມັນກຳລັງເກີດຂຶ້ນຢ່າງລັບໆ. ມັນແມ່ນກົນໄກທີ່ບໍ່ຮຽກຮ້ອງການພິສູດຄວາມຜິດ. ພວກເຮົາບໍ່ໄດ້ຖິ້ມໂທດໃສ່ທຸລະກິດທັງຫຼາຍເວລາທີ່ເຂົາເຈົ້າປະເຊີນກັບບັນຫາອາຊະຍາກຳ. ລັດຖະບານບໍ່ສາມາດຊະນະສົງຄາມນີ້ໄດ້ຜູ້ດຽວ. ພວກເຮົາຕ້ອງການຄວາມພະຍາຍາມທົ່ວປະເທດ.”
ກົດໝາຍຄວາມປອດໄພທາງຄອມພິວເຕີ ຈະບັງຄັບທຸລະກິດຕ່າງໆໃນ ອອສເຕຣເລຍ ທີ່ມີລາຍຮັບປະຈຳປີຫຼາຍກວ່າ 1,960,000 ໂດລາ ໃຫ້ເປີດເຜີຍການຈ່າຍເງິນໃຫ້ພວກລັກເຈາະຂໍ້ມູນ ຫຼື ປະເຊີນກັບການຖືກປັບໃໝ.
ບັນດາກຸ່ມອຸດສາຫະກຳສ່ວນຫຼາຍໄດ້ສະແດງຄວາມຍິນດີກັບມາດຕະການໃໝ່ດັ່ງກ່າວ, ແຕ່ໄດ້ກ່າວວ່າກົດລະບຽບທີ່ວ່ານັ້ນຄວນຖືກໃຊ້ຕໍ່ບັນດາບໍລິສັດທີ່ມີລາຍໄດ້ປະຈຳປີຫຼາຍກວ່າ 6.5 ລ້ານໂດລາ.
ໃນລາຍງານໄພຂົ່ມຂູ່ທາງຄອມພິວເຕີປະຈຳປີ 2022-2023 ຂອງເຂົາເຈົ້ານັ້ນ, ສູນກາງຄວາມປອດໄພທາງຄອມພິວເຕີ ອອສເຕຣເລຍ ໄດ້ກ່າວວ່າເຂົາເຈົ້າຖືກແຈ້ງເຫດການທາງຄອມພິວເຕີສະເລ່ຍນຶ່ງຄັ້ງໃນທຸກໆ 6 ນາທີ.
ເຂົາເຈົ້າຍັງໄດ້ກ່າວວ່າການໂຈມຕີຮຽກຄ່າໄຖ່ທາງຄອມພິວເຕີໄດ້ເພີ່ມຂຶ້ນປະມານ 5 ເທົ່ານັບຕັ້ງແຕ່ໂຣກລະບາດໂຄວິດ-19 ເປັນຕົ້ນມາ.