ລັດຖະບານອອສເຕຣເລຍໄດ້ກ່າວຫານາຍ Sayeed Abbas Azad ວ່າ ໄດ້ຊ່ວຍເອົາ
ພວກຂໍລີ້ໄພຂື້ນເຮືອແລະພາໄປສົ່ງຮອດເຂດນ່ານນໍ້າຂອງອອສເຕຣເລຍ ແລະຢາກໃຫ້
ທາງການອິນໂດເນເຊຍສົ່ງໂຕຜູ້ກ່ຽວໄປໃຫ້ຕົນ. ນາຍ Sayeed ທີ່ຖືກກ່າວຫາວ່າຄ້າ
ມະນຸດນັ້ນ ໄດ້ຖືກໜ່ວຍສະເພາະກິດຕໍ່ຕ້ານການລັກລອບຄ້າມະນຸດຂອງອິນໂດເນເຊຍ
ຈັບແລະກັກໂຕໄວ້ ຕາມຄໍາຮ້ອງຂໍຂອງອອສເຕຣເລຍ.
ພວກເຈົ້າໜ້າທີ່ກວດຄົນເມືອງເຊື່ອວ່າ ຜູ້ກ່ຽວໄດ້ເປັນຜູ້ວາງແຜນຢູ່ເບື້ອງຫລັງການເດີນ
ທາງຂອງກໍ່າປັ່ນຫລາຍໆລໍາ ຈາກໝູ່ເກາະອິນໂດເນເຊຍ ໄປຍັງອອສເຕຣເລຍ ໂຮມທັງ
ກໍ່າປັ່ນລໍາທີ່ຖືກສະກັດກັ້ນແລະຍຶດໄວ້ໃນຕົ້ນເດືອນນີ້ ຢູ່ໃກ້ໆເກາະ Chrismas ຊຶ່ງເປັນ
ດິນດອນຂອງອອສເຕຣເລຍ ໃນມະຫາສະມຸດອິນເດຍນັ້ນ.
ນາຍ Sayeed ໄດ້ປະຕິເສດຕໍ່ຂໍ້ກ່າວຫາ ແລະໄດ້ກ່າວຕໍ່ບໍລິສັດກະຈາຍສຽງຂອງອອສ
ເຕຣເລຍ ຫລື ABC ວ່າ ແຜນການຂອງອອສເຕຣເລຍ ທີ່ຈະເນລະເທດພວກຂໍລີ້ໄພໄປ
ຍັງປະເທດອື່ນນັ້ນ ຈະບໍ່ສໍາເລັດຜົນຕາມຈຸດປະສົງ ເນຶ່ອງຈາກວ່າພວກທີ່ເດີນທາງໄປຍັງ
ອອສເຕຣເລຍໂດຍທາງເຮືອນັ້ນ ແມ່ນຕ້ອງການ ການພິທັກຄຸ້ມຄອງຢ່າງແທ້ຈິງ ແລະກໍ
ຍັງຈະສ່ຽງຕໍ່ການເດີນທາງນັ້ນ ຢູ່ຕໍ່ໄປ. ນາຍ ຊາຢີດ ເວົ້າວ່າ:
“ພວກເຂົາເຈົ້າຢາກໄປຂໍລີ້ໄພຢູ່ທີ່ນັ້ນ ກໍເພາະວ່າອອສເຕຣເລຍເປັນປະເທດທີ່ດີ ແລະ
ພວກເຂົາເຈົ້າຈະໄດ້ຮັບການປົກປ້ອງຄຸ້ມຄອງ ແລະນອກຈາກນີ້ແລ້ວ ເຂົາເຈົ້າເປັນ
ພວກຊອກຂໍລີ້ໄພ ບໍ່ແມ່ນເປັນພວກກໍ່ການຮ້າຍ ຫລືທໍານອງນັ້ນ.”
ທີ່ນະຄອນຫລວງແຄນເບີຣາຂອງອອສເຕຣເລຍ ພວກລັດຖະມົນຕີເຊື່ອວ່າ ການເນລະ
ເທດພວກຂໍລີ້ໄພການເມືອງນັ້ນ ຈະເປັນການຍັບຍັ້ງພວກອື່ນໆທີ່ຄິດວ່າຈະພາກັນເດີນ
ທາງໄປຍັງອອສເຕຣເລຍໂດຍທາງເຮືອ. ເຊື່ອກັນວ່າ ພວກຂໍລີ້ໄພຫລາຍໆຄົນແມ່ນໄປ
ຈາກອັຟການີສຖານ ແລະ ປາກີສຖານ.
ລັດຖະບານແຄນເບີຣາ ມີແຜນການຈະສົ່ງພວກຖືກກັກຕົວທັງຫລາຍ ໄປຍັງມາເລເຊຍ ແລະຍັງໄດ້ເກ້ຍກ່ອມໃຫ້ປາປົວ ນິວກີນີ ເປີດສູນຮອງຮັບເອົາພວກຂໍລີ້ໄພແຫ່ງນຶ່ງຄືນໃໝ່
ທີ່ເກາະ Manus. ສູນດັ່ງກ່າວແມ່ນເປັນພາກສ່ວນນຶ່ງຂອງວິທີການແກ້ໄຂບັນຫາໃນຂົງ
ເຂດປາຊິຟິກຫລື “Pacific Solution” ຂອງທ່ານ John Howard ອະດີດນາຍົກລັດຖະ
ມົນຕີຫົວອະນຸລັກນິຍົມ ທີ່ໍໄດ້ຂົນສົ່ງພວກຂໍລີ້ໄພ ໄປໄວ້ທີ່ຄ້າຍຮອງຮັບ ຫ່າງຈາກຝັ່ງທະເລ
ຂອງປະເທດອອກໄປໄກໆ ໃນກາງມະຫາສະມຸດປາຊີຟິກນັ້ນ. ນະໂຍບາຍດັ່ງກ່າວໄດ້ຖືກ
ປະນາມຢ່າງກວ້າງຂວາງວ່າ ໄຮ້ມະນຸດສະທໍາ ແລະໄດ້ຖືກລົບລ້າງ ຫລັງຈາກພັກກໍາມະ
ກອນຫລືພັກແຮງງານ ເຂົ້າມາມີອໍານາດ ໃນປີ 2007 ນັ້ນ.
ແຕ່ຄວາມເປັນຈິງຕ່າງໆທາງການເມືອງ ໂດຍສະເພາະການຫລັ່ງໄຫລເຂົ້າມາຢ່າງບໍ່ລົດລະ
ຂອງພວກອົບພະຍົບທາງເຮືອ ແລະຄວາມຮຽກຮ້ອງຕ້ອງການຂອງປະຊາຊົນຜູ້ເລືອກຕັ້ງ
ທີ່ຢາກໃຫ້ມີການຄວບຄຸມເຂດຊາຍແດນຢ່າງເຂັ້ມງວດຂຶ້ນກວ່າເກົ່ານັ້ນ ໄດ້ບັງຄັບໃຫ້ນາຍົກ
ລັດຖະມົນຕີ Julia Gillard ຕ້ອງຊອກຫາວິທີແກ້ໄຂບັນຫາ ຢູ່ຕ່າງປະເທດ. ທ່ານນາງ
Gillard ກ່າວວ່າ:
“ພວກເຮົາໄດ້ຕັດສິນໃຈແລ້ວວ່າ ມັນເໝາະສົມ ໝາຍເຖິງການຈັດແຈງກັບມາເລເຊຍນັ້ນ
ແລະມັນກໍເປັນການສົ່ງສານ ທີ່ໜັກແໜ້ນທີ່ສຸດ ໄປຍັງພວກລັກລອບຂົນສົ່ງມະນຸດ ການ
ຈັດໃຫ້ມີສູນກາງນຶ່ງຢູ່ໃນປະເທດປາປົວນີວກີນີນໍານັ້ນ.”
ທ່ານນາງ Julia Gillard ນາຍົກລັດຖະມົນຕີ ອອສເຕຣເລຍ.
ທ່ານນາງ Gillard ກ່າວຕື່ມວ່າ
ເຖິງແມ່ນຈະມີແຜນການເນລະ
ເທດຊຸດໃໝ່ກໍຕາມ ແຕ່ລັດຖະ
ບານຂອງທ່ານນາງກໍນໍາໃຊ້ຕົວ
ແບບທີ່ແຕກຕ່າງໄປຈາກຂອງ
ລັດຖະບານຂອງທ່ານ Howard
ບົນພື້ນຖານຂອງໂຄງຮ່າງປະຕິ
ບັດງານບາຫລີ ວ່າດ້ວຍການ
ຄ້າມະນຸດ ທີ່ 41 ປະເທດໃນ
ຂົງເຂດເອເຊຍປາຊິຟິກໄດ້ຕົກ
ລົງຮັບເອົາເມື່ອເດືອນມີນາຜ່ານ
ມາ ຊຶ່ງທ່ານນາງອະທິບາຍວ່າ:
“ສິ່ງທີ່ພວກເຮົາໄດ້ເຮັດໃນທາງ
ກົງກັນຂ້າມນັ້ນ ກໍຄືປະຕິບັດ
ງານໃນລະດັບພາກພື້ນ ເພື່ອ
ໃຫ້ມີການຮັບຮອງເອົາໂຄງຮ່າງບາຫລີ. ພວກເຮົາຈະມີການຈັດແຈງແບບສອງຝ່າຍກັນ
ກັບປະເທດປາປົວນີວກີນີ ແຕ່ພວກເຮົາກໍຈະຍັງຄົງພົວພັນກັບປະເທດອື່ນໆໃນຂົງເຂດ
ຂອງພວກເຮົາຢູ່ຕໍ່ໄປ ໃນເລື່ອງສູນກາງສັ່ງຊາຕີລາຄາສະຖານນະການຂອງຂົງເຂດນັ້ນ
ເພາະວ່າພວກເຮົາກໍເຂົ້າໃຈຢູ່ສະເໝີວ່າ ນີ້ແມ່ນບັນຫາຂອງຂົງເຂດຂອງພວກເຮົາທັງໝົດ.”
ໂຄງຮ່າງປະຕິບັດງານບາຫລີ ເປັນການຕົກລົງທີ່ບໍ່ມີຂໍ້ຜູກມັດໃດໆ ທີ່ລະບຸອອກມາໂດຍ
ສັງເຂບວ່າ ບັນດາປະເທດທັງຫລາຍຄວນຈະຈັດການແນວໃດກັບພວກລັກລອບຂົນສົ່ງ
ແລະຄ້າມະນຸດ ແລະພວກຂໍລີ້ໄພ. ເປົ້າໝາຍຂອງໂຄງຮ່າງນີ້ກໍແມ່ນ ຊອກຫາວິທີທາງສໍາ
ຫລັບໃຫ້ປະເທດຕ່າງໆປະຕິບັດງານຮ່ວມກັນ ເພື່ອບ່ອນທໍາລາຍຜົນປະໂຫຍດຕ່າງໆທີ່
ດຶງດູດໃຈພວກຄ້າມະນຸດນັ້ນ ໃນຂະນະທີ່ຮັບຮູ້ກຽດສັກສີ ແລະສິດທິຂອງພວກສະແຫວງ ຫາການລີ້ໄພ.
ກຸ່ມປົກປ້ອງອົບພະຍົບກ່າວວ່າ ຂໍ້ຕົກລົງກັບປະເທດປາປົວ ນີວກີນີ ໝາຍເຖິງການຫວນ
ກັບຄືນໄປສູ່ຍຸກທີ່ຂີ້ຮ້າຍຫລາຍ ເວລາສິດທິຂອງພວກຂໍລີ້ໄພບໍ່ໄດ້ຮັບການເອົາຫົວຊາ. ເປັນ
ທີ່ຄາດກັນວ່າ ໃນອາທິດນີ້ ຈະມີການຕັດສິນກ່ຽວກັບການທ້າທາຍຂອງສານສູງຂອງອອສ
ເຕຣເລຍ ຕໍ່ແຜນການຂອງລັດຖະບານ ທີ່ຈະສົ່ງຫລືເນລະເທດພວກເຂົ້າມາຂໍລີ້ໄພ 800 ຄົນໄປຍັງປະເທດມາເລເຊຍ ເພື່ອແລກປ່ຽນກັນພວກຊາວອົບພະຍົບ ຈໍານວນ 4000 ຄົນ
ທີ່ຖືກທາງການຮັບຮູ້ສະຖານະພາບແລ້ວນັ້ນ.
ໃນຂະນະດຽວກັນ ມາເລເຊຍກໍມີແຜນການຈະສົ່ງພວກຊົນເຜົ່າວີເກີ້ກຸ່ມນຶ່ງ ກັບຄືນໄປປະ
ເທດຈີນ ແຕ່ເວລານີ້ ກໍຍັງບໍ່ປາກົດເຫັນປະຕິກິລິຍາຈາກທາງການໃນອອສເຕຣເລຍເທື່ອ ຕໍ່ການຕັດສິນໃຈດັ່ງກ່າວຂອງມາເລເຊຍ. ແຕ່ພວກກຸ່ມສິດທິມະນຸດກໍໄດ້ຮຽກຮ້ອງໃຫ້ກົວ
ລາລໍາເປີ ຈົ່ງຍຸຕິແຜນການທີ່ຈະເນລະເທດພວກຊາວວີເກີ້ນັ້ນເສຍ ເພາະຢ້ານວ່າພວກເຂົາ
ເຈົ້າອາດຈະໄດ້ຮັບການປະຕິບັດຕໍ່ແບບບໍ່ຖືກບໍ່ຕ້ອງຫລືອາດຖືກທໍລະມານກໍໄດ້ ຖ້າຫາກ
ພວກເຂົາເຈົ້າຖືກສົ່ງກັບໄປຈີນ.