ຕະຫລາດເອເຊຍ ຍັງສືບຕໍ່ການຟື້ນໂຕຄືນ ຂອງຕະຫຼາດຮຸ້ນ
ໂລກ ແຕ່ຕະຫຼາດໃນຢູໂຣບປາກົດວ່າເກືອບບໍ່ມີການເໜັງຕີງ
ຫຍັງ.
ດັດຊະນີຮຸ້ນ Nikkei ຂອງຍີ່ປຸ່ນ ມີລາຄາສູງຂຶ້ນ 3 ເປີເຊັນໃນ
ຕອນອັດຕະຫຼາດ ຂະນະທີ່ຮຸ້ນຢູ່ນະຄອນຊຽງໄຮ້ ສູງຂຶ້ນ 4.8
ເປີເຊັນ ນຶ່ງມື້ຫຼັງຈາກໄດ້ມີລາຄາເພີ້ມຂຶ້ນຫຼາຍກວ່າ 5 ເປີເຊັນ.
ສ່ວນຕະຫຼາດອື່ນໆໃນເຂດປາຊີຟິກຕ່າງກໍມີລາຄາສູງຂຶ້ນ ຍົກ
ເວັ້ນແຕ່ດັດຊະນີຮຸ້ນ Hang Seng ຂອງຮົງກົງທີ່ໄດ້ຕົກລາຄາ
1 ເປີເຊັນ.
ຕະຫລາດຮຸ້ນທີ່ສຳຄັນໆຂອງຢູໂຣບ ຕ່າງກໍມີລາຄາຫລຸດລົງເລັກນ້ອຍ ໃນຕອນຕະຫຼາດ
ເປີດ ໃນວັນສຸກມື້ນີ້ ຫລັງຈາກໄດ້ມີລາຄາສູງຂຶ້ນຫລາຍກວ່າ 3 ເປີເຊັນໃນ ການຊື້ຂາຍມື້ ວານນີ້.
ການຟື້ນໂຕຄືນ ຂອງຕະຫລາດຮຸ້ນໂລກ ເລີ້ມຂຶ້ນ ໃນວັນພະຫັດວານນີ້ ຫລາຍໆມື້ ຫລັງ ຈາກໄດ້ເກີດຄວາມປັ່ນປ່ວນຍ້ອນມີຄວາມຢ້ານກົວກັນ ກ່ຽວກັບການຊັກຊ້າລົງໃນການ ເຕີບໂຕຂອງເສດຖະກິດຈີນ.
ທີ່ຕະຫລາດຮຸ້ນ ໃນນະຄອນນິວຢອກນັ້ນ ດັດຊະນີຮຸ້ນ S&P 500, Dow Jones ແລະ NASDAQ ຕ່າງກໍມີລາຄາສູງຂຶ້ນ ຫຼາຍກວ່າ 2 ເປີເຊັນ.
ຂໍ້ມູນກ່ຽວກັບການເຕີບໂຕ ຂອງເສດຖະກິດສະຫະລັດ ທີ່ເຂັ້ມແຂງກວ່າທີ່ຄາດຄະເນໄວ້ ແມ່ນພາກສ່ວນນຶ່ງ ຊຸກຍູ້ໃຫ້ພວກຄ້າຮຸ້ນຊື້ຂາຍຮຸ້ນໃນລາຄາທີ່ແພງຂຶ້ນ. ລາຍງານທີ່ໃຫ້ ຄວາມຫວັງໄປໃນທາງບວກດັ່ງກ່າວ ຍັງຊ່ອຍໃຫ້ລາຄານ້ຳມັນດິບສູງຂຶ້ນຫລາຍກວ່າ 10
ເປີເຊັນ ຊຶ່ງເປັນການຂຶ້ນລາຄາທີ່ຫຼາຍທີ່ສຸດພາຍໃນນຶ່ງມື້ໃນຮອບ 6 ປີກວ່າໆ. ການມີລາ ຄາສູງຂຶ້ນດັ່ງກ່າວສາມາດຊົດເຊີຍສ່ວນໃຫຍ່ຂອງການສູນເສຍເມື່ອໄວໆມານີ້ແລະພວກ ນັກລົງທຶນ ຄາດວ່າ ການເຕີບໂຕຂອງເສດຖະກິດ ຈະພາໃຫ້ມີຄວາມຮຽກຮ້ອງຕ້ອງການ ຫຼາຍຂຶ້ນໃນດ້ານພະລັງງານ.
ພວກນັກວິເຄາະເຕືອນວ່າ ມັນອາດຈະຍັງມີຄວາມບໍ່ແນ່ນອນຕື່ມອີກ ທັງໆທີ່ໃນປັດຈຸບັນ ນີ້ປາກົດວ່າ ຕະຫລາດໂດຍທົ່ວໄປໄດ້ກັບຄືນສູ່ສະພາບປົກກະຕິແລ້ວກໍຕາມ.
ເຈົ້າໜ້າທີ່ຈີນໄດ້ພະຍາຍາມທີ່ຈະຢັບຢັ້ງ ການຕົກລາຄາຂອງຕະຫຼາດຮຸ້ນເມື່ອໄວໆມານີ້ ໂດຍຕັດອັດຕາດອກເບ້ຍລົງ ເພື່ອຊຸກຍູ້ ໃຫ້ເສດຖະກິດເຕີບໂຕ. ເງິນຕາ ທີ່ຫລຸດຄ່າລົງ ຂອງຈີນ ອຳນວຍໃຫ້ຜະລິດຕະພັນທີ່ເຮັດໂດຍຈີນ ໄດ້ປຽບໃນດ້ານລາຄາຢູ່ໃນຕະຫຼາດ ໂລກຊຶ່ງສາມາດຊຸກຍູ້ການສົ່ງອອກແລະການເຕີບໂຕ ຂອງເສດຖະກິດໄດ້.
Your browser doesn’t support HTML5
Global Markets