ທ່ານສຸພະໄຊ ພານິດຊະພັກ ເລຂາທິການໃຫຍ່ຂອງສະພາວ່າດ້ວຍການຄ້າ ແລະ ການ ພັດທະນາຂອງອົງການສະຫະປະຊາຊາດ ກ່າວເມື່ອວັນສຸກຜ່ານມານີ້ວ່າ ການກົດດັນ ຂອງນາໆຊາດ ເພື່ອໃຫ້ຈີນ ປັບຄ່າເງິນຢວນຂອງຕົນຄືນໃໝ່ນັ້ນ ແມ່ນເປັນການຕ້ານກັບ
ຜົນປະໂຫຍດ.
ທ່ານ Timothy Geithner ລັດຖະມົນຕີການຄັງຂອງສະຫະລັດ ກ່າວຢູ່ສະຖາບັນ Brooking ໃນນະ ຄອນຫລວງ Washington ໃນວັນພຸດທີ 6 ຕຸລາ, 2010 ວ່າບັນດາເສດຖະກິດເອເຊຍ ຕ້ອງຫລຸດຜ່ອນ ການກາງຕໍ່ອາໃສຕະຫຼາດຕ່າງປະເທດ (AP Photo/Manuel Balce Ceneta)
ຈີນປະເຊີນກັບຄວາມກົດດັນຈາກສະຫະລັດ ຢຸໂຣບ ແລະເອເຊຍ ເພື່ອໃຫ້ປ່ອຍໃຫ້ຄ່າ
ເງິນຢວນຖີບສູງຂື້ນ. ພວກນັກວິຈານກ່າວວ່າ ລັດຖະບານຈີນ ຮັກສາຄ່າເງິນຢວນໃຫ້ຕໍ່າ
ກ່ວາຄວາມເປັນຈິງໂດຍເຈດຕະນາ ເພື່ອປົກ
ປ້ອງພວກວົງການອຸດສາຫະກໍາຕ່າງໆຂອງ
ຕົນເອົາໄວ້.
ທ່ານສຸພະໄຊກ່າວວ່າ ການບັງຄັບໃຫ້ເງິນ
ຢວນ ຫລືເງິນແຣນມິນບີ ແຂງຄ່າຂຶ້ນຢ່າງ
ໄວນັ້ນ ອາດສາມາດສ້າງຄວາມປັ່ນປ່ວນ
ໃນຕະຫລາດຕ່າງໆ ແລະເຮັດໃຫ້ການເຕີບ
ໂຕທາງເສດຖະກິດຂອງຈີນແລະການຟື້ນໂຕ
ຄືນຂອງເສດຖະກິດໂລກ ຢຸດຊະງັກລົງໄດ້ ຊຶ່ງທ່ານກ່າວວ່າ:
"ຖ້າຫາກວ່າພວກເຮົາບັງຄັບໃຫ້ເງິນສະກຸນຕ່າງໆແຂງຄ່າສູງຂື້ນຮອດ 20%
ຄືມັນບໍ່ມີການຄວບຄຸມໃດໆກ່ຽວກັບການເກັງກໍາໄລນັ້ນ ມັນກໍຈະທໍາລາຍຕະ
ຫລາດທັງໝົດ ຖ້າຫາກມັນເກີດຂື້ນຈິງ ມັນກໍຈະຜັກດັນໃຫ້ການເຕີບໂຕທາງ
ເສດຖະກິດໃນຈີນຕົກຕໍ່າລົງ ແລະມັນກໍຈະທໍາລາຍການຟື້ນໂຕຄືນຂອງເສດ
ຖະກິດໂລກ. ດັ່ງນັ້ນ ມັນບໍ່ແມ່ນກ່ຽວກັບຄ່າເງິນຢວນ ແລະສະຫະລັດ ແລະ
ຈີນ ເທົ່ານັ້ນ ແຕ່ມັນກ່ຽວກັບການເຕີບໂຕຂອງເສດຖະກິດໂລກ."
ທ່ານສຸພະໄຊ ທີ່ໄດ້ໄປຮ່ວມກອງປະຊຸມວາລະນຶ່ງທີ່ບາງກອກ ທີ່ຈັດຂຶ້ນເພື່ອ ເປັນຂີດໝາຍ
ຄົບຮອບ 50 ປີຂອງສາຍການບິນແຫ່ງຊາດຂອງໄທ ຫລື Thai Airways International
ກ່າວວ່າ ເງິນຕາຂອງຂົງເຂດເອເຊຍ ແມ່ນຈະສືບຕໍ່ແຂງຄ່າຂຶ້ນ ຍ້ອນ ເງິນທຶນຂອງຕ່າງປະ
ເທດທີ່ຫລັ່ງໄຫລເຂົ້າໄປໃນຂົງເຂດ ເພື່ອສວຍເອົາປະໂຫຍດຈາກ ເສດຖະກິດຂອງຂົງເຂດ
ກຳລັງເຕີບໂຕດີນັ້ນ. ທ່ານສຸພະໄຊ ກ່າວຕື່ມວ່າ:
"ເງິນທຶນທີ່ຫລັ່ງໄຫລເຂົ້າໄປໃນຂົງເຂດເອເຊຍນັ້ນ ຈະຍັງສືບຕໍ່ເພີ່ມຂື້ນໃນອັດຕາ
ທີ່ໃຫຍ່ ຂຶ້ນນັບມື້ ແລະຈະບໍ່ລົດນ້ອຍຖອຍລົງໄປຢ່າງໄວ. ດັ່ງນັ້ນ ດຸນການຊໍາລະ
ເງິນຈຶ່ງແຂງແຮງຫລາຍຢູ່ໃນເອເຊຍ ຄືມີເງິນທຶນສໍາຮອງຫລາຍກວ່າ 5 ພັນຕື້
ໂດລາສະຫະລັດໃນຂົງເຂດເອເຊຍ. ຊຶ່ງທັງໝົດນັ້ນ ແມ່ນຊີ້ໄປໃນທິດທາງຂອງ
ການມີພື້ນຖານທີ່ແຂງແຮງ ຊຶ່ງແທ້ໆແລ້ວ ກໍແມ່ນຈະສົ່ງຜົນໃຫ້ມີເງິນຕາທີ່ແຂງ
ແຮງຕາມມາ. ນັ້ນແມ່ນກົດເກນຂອງຫລັກເສດຖະກິດ."
ເງິນຢວນຂອງຈີນ
ໃນທົ່ວຂົງເຂດເອເຊຍ ພວກອຸດ
ສາຫະກໍາສົ່ງອອກທັງຫລາຍ
ແມ່ນພາກັນວິ່ງເຕັ້ນຊຸກຍູ້ໃຫ້
ລັດຖະບານເອົາບາດກ້າວຕ່າງໆ
ເພື່ອເຮັດໃຫ້ເງິນຕາຂອງປະເທດ ອ່ອນຄ່າລົງ.
ທ່ານສຸພະໄຊກ່າວວ່າ ຄວາມ
ວິຕົກປະການນຶ່ງໃນຂົງເຂດ
ເອເຊຍນັ້ນ ກໍຄືການປ່ຽນແປງ
ຂອງການໝູນເງິນຕາຢ່າງໄວ
ທີ່ອາດກໍ່ໃຫ້ພວກຕະຫລາດ
ຂາດສະຖຽນລະພາບໄດ້. ແຕ່
ວ່າ ໃນຂະນະດຽວກັນ ທ່ານ
ສຸພະໄຊກໍໄດ້ຮຽກຮ້ອງໃຫ້ຂົງເຂດເອເຊຍ ອາໃສກາງຕໍ່ການສົ່ງອອກໜ້ອຍລົງ ແລະໃຫ້
ເອົາໃຈໃສ່ຫລາຍເພີ່ມຂື້ນ ຕໍ່ການເພີ່ມປະລິມານອຸບປະໂພກບໍລິໂພກ ແລະຄ່າແຮງງານ
ຢູ່ພາຍໃນປະເທດ ເພື່ອໃຫ້ສອດຄ່ອງກັບການເພີ່ມຂຶ້ນຂອງຜົນຜະລິດນັ້ນ.
ຄວາມຄິດເຫັນຂອງທ່ານສຸພະໄຊ ມີຂຶ້ນໃນຂະນະທີ່ພວກຜູ້ນໍາຈີນ ພາກັນຕໍາໜິຕິຕຽນ
ສະຫະລັດເມື່ອວັນສຸກຜ່ານມາ ທີ່ສະຫະລັດໄດ້ຮຽກຮ້ອງໃຫ້ຈີນປັບຄ່າເງິນຢວນໃຫ້ສູງຂຶ້ນ ຊຶ່ງພວກເຂົາເຈົ້າກ່າວວ່າ ຈີນບໍ່ຄວນຈະເປັນແພະຮັບບາບ ສໍາລັບບັນຫາເສດຖະກິດຂອງ ສະຫະລັດນັ້ນ.