ປະທານາທິບໍດີ ສະຫະລັດ ທ່ານບາຣັກ ໂອບາມາ ຈະປະເຊີນໜ້າກັບບັນຫາທີ່ສຳຄັນໆໃນຂອບເຂດກວ້າງຂວາງ ໃນການເດີນທາງໄປຍັງເອເຊຍ ຄັ້ງທີ່ 11 ຂອງທ່ານ ໃນຖານະ ປະທານາທິບໍດີ ໂດຍທີ່ອະນາຄົດ ກ່ຽວກັບແຜນຍຸດທະສາດ ໃນການສ້າງຄວາມກ້ຳເກິ່ງ ຄືນໃໝ່ ໄປສູ່ເຂດເອເຊຍປາຊີຟິກ ແລະຜົນງານຂອງທ່ານທີ່ໄດ້ທຳໄວ້ ຢູ່ໃນຂົງເຂດນັ້ນ ແມ່ນຍັງບໍ່ແນ່ນອນເທື່ອ.
ໃນຂະນະທີ່ຍັງມີເວລາເຫຼືອຢູ່ ໜ້ອຍກວ່າ 5 ເດືອນ ໃນການດຳລົງຕຳແໜ່ງຂອງທ່ານນັ້ນ ທ່ານໂອບາມາຈະເດີນທາງໄປຍັງຂົງເຂດດັ່ງກ່າວ ເປັນຄັ້ງສຸດທ້າຍ ໃນຖານະເປັນ ປະທາ ນາທິບໍດີ ຫຼັງຈາກທີ່ໄດ້ເຮັດວຽກມາໄດ້ 2 ສະໄໝ ສະໄໝລະ 4 ປີ ເພື່ອທີ່ຈະເສີມຂະ ຫຍາຍອຳນາດ ແລະ ອິດທິພົນຂອງອາເມຣິກາ ໃຫ້ສູງຂຶ້ນ ຢູ່ໃນຂົງເຂດດັ່ງກ່າວ.
ປະທານາທິບໍດີ ສະຫະລັດ ຈະເຂົ້າຮ່ວມກັບບັນດາຜູ້ນຳປະເທດອື່ນໆ ໃນກອງປະຊຸມ ສຸດຍອດຂອງກຸ່ມ G20 ຢູ່ທີ່ເມືອງ Hangzhou ຂອງຈີນ ແລະ ກອງປະຊຸມສຸດຍອດ ສະມາຄົມບັນດາປະຊາຊາດ ໃນເຂດເອເຊຍຕາເວັນອອກສຽງໃຕ້ ຫຼື ASEAN ແລະ ກອງປະຊຸມສຸດຍອດ ເອເຊຍຕາເວັນອອກ ຢູ່ທີ່ນະຄອນວຽງຈັນ ສປປ ລາວ ແຕ່ວັນທີ 2 ຫາ ວັນທີ 8 ເດືອນກັນຍາ ຈະມາເຖິງນີ້.
ນະໂຍບາຍການຕ່າງປະເທດ ເພື່ອສ້າງຄວາມກ້ຳເກິ່ງຄືນໃໝ່ນັ້ນ ແມ່ນມີຄວາມສຳຄັນຍິ່ງ ຕໍ່ຄວາມໝັ້ນຄົງຂອງອາເມຣິກາ ແລະ ຄວາມຈະ ເລີນຮຸ່ງເຮືອງ ໃນອະນາຄົດ ອີງຕາມ ທ່ານໂອບາມາ.
ກຸ່ມຝ່າຍຄ້ານ ຕໍ່ສັນຍາການຄ້າ ຂ້າມມະຫາສະໝຸດ ປາຊີຟິກ ຫຼື (TPP) ພາກັນເດີນຂະບວນປະທ້ວງ ຢູ່ນອກທຳນຽບຂາວ ໃນວໍຊິງຕັນ, ວັນທີ 3 ກຸມພາ 2016.
ບັນດາເຈົ້າໜ້າທີ່ ທຳນຽບຂາວ ກ່າວວ່າ ໃນຂະນະທີ່ຢູ່ໃນເອເຊຍນັ້ນ ທ່ານຈະກົດດັນຕື່ມ ອີກ ກ່ຽວກັບການໃຫ້ສັດຕະຍາບັນ ຮັບຮອງເອົາ ພາຄີຂ້າມມະຫາສະໝຸດປາຊີຟິກ ຫຼື TPP. ຂໍ້ຕົກລົງດ້ານການຄ້ານີ້ ໄດ້ມີການລົງນາມໂດຍ 12 ປະເທດ ໃນຂົງເຂດປາຊີຟິກ ແມ່ນເປັນພື້ນ ຖານເສດຖະກິດ ຂອງອັນທີ່ເອີ້ນວ່າ ການຫັນໄປສູ່ເຂດເອເຊຍນັ້ນ.
ທ່ານໂອບາມາ ຈະເປັນປະທານາທິບໍດີ ສະຫະລັດຄົນທຳອິດ ທີ່ຈະເດີນທາງໄປຢ້ຽມຢາມ ສປປ ລາວ ໃນເວລາທີ່ທ່ານເດີນທາງໄປນະ ຄອນວຽງຈັນ ເພື່ອເຂົ້າຮ່ວມກອງປະຊຸມ ສຸດຍອດ ອາຊຽນ ແລະ ເອເຊຍຕາເວັນອອກ ໃນວັນທີ 5 ສິງຫາ ຈະມາເຖິງນີ້.
ທ່ານຈະເຂົ້າຮ່ວມການເຈລະຈາ ກັບບັນດາຜູ້ນຳຂອງປະເທດດັ່ງກ່າວ ອັນເປັນສ່ວນໜຶ່ງ ຂອງຄວາມພະຍາຍາມ ເພື່ອສ້າງສາຍສຳພັນກັບປະຊາຊົນ ແລະ ເສີມຂະຫຍາຍການຄ້າ ແລະ ການລົງທຶນ. ຫຼັງຈາກການພົບປະກັນແລ້ວ ຜູ້ນຳສະຫະລັດ ຈະກ່າວຄຳປາໄສ ກ່ຽວ ກັບນະໂຍບາຍຕໍ່ເຂດເອເຊຍ ແລະ ວິໄສທັດຂອງທ່ານ ສຳລັບອະນາຄົດຂອງສະຫະລັດ ຢູ່ໃນເຂດເອເຊຍປາຊີຟິກ.
ພາບຖ່າຍຈາກດາວທຽມ ທີ່ໄດ້ຖືກເຜີຍແພ່ໂດຍ ກຸ່ມ ການເດີນເຮືອທາງທະເລ ຂອງເອເຊຍ ເພື່ອຄວາມໂປ່ງໄສ ຈາກສູນກາງ ດ້ານຍຸດທະສາດ ແລະ ການສຶກສາລະຫວ່າງປະເທດຂອງວໍຊິງຕັນ ສະແດງໃຫ້ເຮັນການກໍ່ສ້າງ ທີ່ອາດເປັນໄປໄດ້ວ່າ ເປັນສະຖາທີ່ຕັ້ງຂອງເຣດາ ຢູ່ທີ່ໝູ່ເກາະ Spratly Islands ໃນເຂດທະເລຈີນໃຕ້ ທີ່ມີການຂັດແຍ້ງກັນນັ້ນ.
ທ່ານ Benjamin Rhodes ຮອງທີ່ປຶກສາດ້ານຄວາມໝັ້ນຄົງແຫ່ງຊາດ ຈາກທຳນຽບຂາວ ກ່າວວ່າ “ຂ້າພະເຈົ້າຄິດວ່າ ທ່ານໂອບາມາ ຈະກ່າວຖະແຫລງ ເຖິງຄວາມຈິງ ທີ່ພວກ ເຮົາໄດ້ປັບປຸງຢ່າງຫຼວງຫຼາຍ ໃນດ້ານການຄ້າ ແລະ ເສດຖະກິດ ໂດຍຜ່ານທາງ ການທູດຂອງພວກເຮົາ ຢູ່ໃນຂົງເຂດ, ການຮ່ວມມືໃນດ້ານຄວາມໝັ້ນຄົງ ໂດຍການ ມີໜ້າແບບເປັນພາຄີພວກເຮົາ ທີ່ພວກເຮົາກຳລັງຈັດຕັ້ງຂຶ້ນ, ຮ່ວມກັບບັນດາ ພັນທະມິດທັງຫຼາຍ ພ້ອມດ້ວຍບັນດາພາຄີ ທີ່ກຳລັງພຸ່ງພົ້ນໃໝ່ ເພື່ອແກ້ໄຂບັນຫາ ຕ່າງໆ ເຊັ່ນວ່າຄວາມໝັ້ນຄົງໃນການເດີນເຮືອທາງທະເລ ແລະ ການຮັບມືກັບ ໄພພິບັດ.”
ທ່ານ ຈະເລັ່ງລັດອີກເທື່ອໜຶ່ງ ໃຫ້ສະຫະລັດ ລົງນາມຮັບຮອງເອົາ ຂໍ້ຕົກລົງ TTP ໃນລະຫວ່າງ ການກ່າວຄຳປາໄສນັ້ນ.