ຂົງເຂດເອເຊຍຕາເວັນອອກສຽງໃຕ້ ທີ່ກຳລັງຊອກຫາຊ່ອງທາງ ເພື່ອໃຫ້ມີການບັນລຸ
ຂໍ້ຕົກລົງໄລຍະຍາວ ສຳລັບແກ້ໄຂການຂັດແຍ່ງ ຢູ່ທະເລຈີນໃຕ້ນັ້ນ ພວມ ປະເຊີນກັບ
ບັນຫາທ້າທາຍໃໝ່ ໃນຂະນະທີ່ຈີນ ທຳການເຄື່ອນໄຫວຂະຫຍາຍອິດທິພົນຂອງຕົນ
ຢູ່ໃນຂົງເຂດ ດ້ວຍແຜນການກໍ່ສ້າງສະຖານີວິທະຍາສາດ ທີ່ເກາະນ້ອຍໆເກາະນຶ່ງ
ບໍ່ໄກຈາກຟີລິບປິນ.
ພາບຖ່າຍຈາກດາວທຽມ ສະແດງໃຫ້ເຫັນ ອັນທີ່ ອົງການ CSIS Asia Maritime Transparency Initiative ກ່າວວ່າ ເປັນສິ່ງປຸກສ້າງດ້ວຍຄອນກີດ ທີ່ປະກອບດ້ວຍ ຫລັງຄາ ປິດເປີດໄດ້ຢູ່ທີ່ເກາະ ໂຂ້ນຫີນ Fiery Cross ທີ່ຖົມຂຶ້ນມາ ໃນທະເລຈີນໃຕ້ South, ສາມາດເຫັນໄດ້ ໃນພາບນີ້ ທີ່ໄດ້ຖືກເຜີຍແຜ່ ໃນວັນທີ 22 ກຸມພາ 2017.
ຄວາມວິຕົກກັງວົນມີຂຶ້ນ ໃນຂະນະທີ່ພວກນັກວິເຄາະກ່າວວ່າ ນະໂຍບາຍຂອງ
ສະຫະລັດ ຕໍ່ເຂດເອເຊຍໃນເວລານີ້ີ້ ແມ່ນເພັ່ງເລັງໃສ່ຄວາມເຄັ່ງຕຶງທີ່ພວມເພີ່ມ
ທະວີຂຶ້ນຢູ່ໃນແຫຼມເກົາຫຼີ.
ປະທານາທິບໍດີຟີລິບປິນ ທ່ານ Rodrigo Duterte ຊຶ່ງກຳລັງເປັນປະທານວຽນ ຂອງ
ສະມາຄົມອາຊ່ຽນໃນປັດຈຸບັນ ໄດ້ເຈລະຈາຫາລື ກັບຜູ້ນຳຂອງມຽນມາ ແລະ ປະເທດ
ໄທ ທີ່ເປັນພາຄີຢູ່ໃນພູມີພາກ.
ປະທານາທິບໍດີ ຟີລິບປິນ ທ່ານ ຣອດຣີໂກ ດູເທີເຕ, ຂວາ, ແລະ ນາຍົກລັດຖະມົນຕີຂອງໄທ ທ່ານ ປຣະຍຸດ ຈັນໂອຊາ ຍ່າງນຳກັນ ຂະນະທີ່ອອກມາຈາກ ກອງປະຊຸມຖະແຫລງຂ່າວ ຢູ່ທີ່ ສຳນັກງານ ລັດຖະບານໃນບາງກອກ ປະເທດໄທ, ວັນທີ 21 ມີນາ 2017.
ລຸນຫລັງການເຈລະຈາຢູ່ທີ່ບາງກອກ ກັບນາຍົກລັດຖະມົນຕີຂອງໄທ ທ່ານປຣະຍຸດ
ຈັນໂອຊາ ແລ້ວນັ້ນ ປະເທດທັງສອງໄດ້ຕົກລົງທີ່ຈະຊຸກຍູ້ສິດເສລີພາບໃນ ການເດີນ
ເຮືອຢູ່ທະເລຈີນໃຕ້ ຊຶ່ງເປັນ “ຫລັກຄຸນຄ່າແກນກາງ ໃນການທີ່ຈະຮັກສາໄວ້ ຊຶ່ງ
ສັນຕິພາບ ແລະ ນຳເອົາຄວາມອຸດົມຮັ່ງມີ ມາສູ່ຂົງເຂດ.”
ປະທານາທິບໍດີ Duterte ກ່າວວ່າ “ການຮັກສາໄວ້ຊຶ່ງສັນຕິພາບ ສະຖຽນລະພາບ
ແລະຄວາມໝັ້ນຄົງ ຕະຫລອດທັງການເຄົາລົບຕໍ່ອິດສະຫຼະພາບໃນການເດີນເຮືອ
ແລະ ການບິນຜ່ານຢູ່ໃນທະເລຈີນໃຕ້ ແມ່ນຜົນປະໂຫຍດຂອງທຸກໆປະເທດ ທັງຢູ່
ໃນ ແລະ ຢູ່ນອກພູມີພາກ ໃນຂະນະທີ່ຫລັກການເຫລົ່ານີ້ເປັນເງື່ອນ ໄຂພື້ນຖານ
ໃນການເຮັດໃຫ້ເສດຖະກິດເຕີບໂຕ ການພັດທະນາ ແລະ ຄວາມອຸດົມຮັ່ງມີ.”
ກອງທະຫານຂອງຟີລິບປິນ ແລະ ສະຫະລັດ ກຽມພ້ອມເພື່ອການຊ້ອມບຸກຂຶ້ນຊາຍຫາດ ຮ່ວມກັນ ທີ່ຢູ່ກົງກັນຂ້າມກັບ ໝູ່ເກາະທີ່ມີບັນຫາຂັດແຍ້ງກັນ ໃນທະເລຈີນໃຕ້ ທີ່ຮູ້ຈັກກັນຄື Scarborough Shoal ຢູ່ໃນທະເລພາກຕາເວັນຕົກຂອງຟີລິບປິນ, ວັນທີ 21 ເມສາ 2015.