ເບິ່ງວີດີໂອລາຍງານພາສາລາວ:
ຖ້າວ່າ ການວິນິດໄສໂຣກມະເຮັງປອດ ງ່າຍຄືກັນກັບການຫາຍໃຈອອກ ກໍຄົງຈະດີດອກ
ແຕ່ອີກຈັກໜ້ອຍ ມັນກໍອາດຈະເປັນເຊັ່ນນັ້ນແທ້. ເຄື່ອງຈັກອັນນີ້ ວິໄຈລົມຫາຍໃຈຂອງຄົນ
ແລະຊອກຫາສ່ວນປະກອບ ທີ່ແນ່ນອນຂອງສານປະກອບອິນຊີ ຢູ່ໃນລົມຫາຍໃຈນັ້ນ.
Dr. Peter Mazzone ແຫ່ງຄລີນິກ Cleveland ກ່າວວ່າ:
“ຄົນເຮົາລ້ວນແຕ່ ມີທາດເຄມີຢູ່ໃນລົມຫາຍໃຈຂອງຕົນ ແລະພວກເຮົາຄິດວ່າ
ທາດເຄມີຢູ່ໃນລົມຫາຍໃຈຂອງຄົນ ທີ່ເປັນໂຣກມະເຮັງ ແມ່ນຈະແຕກຕ່າງກັນ
ກັບຂອງພວກທີ່ບໍ່ເປັນໂຣກມະເຮັງນັ້ນໜ້ອຍນຶ່ງ."
Dr. Peter Mazzone ເປັນຜູ້ນໍາພາການສຶກສາຄົ້ນຄວ້າ ທີ່ໃຊ້ການວິໄຈລົມຫາຍໃຈເປັນ
ເຄື່ອງມືໃນການວິນິດໄສໂຣກມະເຮັງປອດ. ທ່ານແລະທີມນັກຄົ້ນຄວ້າຂອງທ່ານ ໄດ້ກວດ
ເບິ່ງລົມຫາຍໃຈຂອງຄົນເຈັບ 229 ຄົນ ຈາກຄລີນິກ Cleveland. ໃນນັ້ນ 92 ຄົນໄດ້ຖືກ
ຢືນຢັນວ່າ ເປັນໂຣກມະເຮັງປອດ ແລະພວກທີ່ເຫລືອ ກໍມີຄວາມສ່ຽງສູງໃນການເລີ້ມທີ່
ຈະເປັນໂຣກດັ່ງກ່າວ ໂດຍທີ່ມີການເຕີບໂຕຂອງພະຍາດທີ່ອາດເປັນມະເຮັງກໍໄດ້ ຢູ່ໃນ
ປອດຂອງພວກເຂົາເຈົ້າ. Dr. Mazzone ກ່າວວ່າ:
“ພວກເຮົາໄດ້ພົບວ່າ ພວກເຮົາສາມາດ ໄດ້ຮັບຄວາມແມ່ນຢໍາ ໃນລະຫວ່າງ
80-85% ໃນການກວດຫາໂຣກມະເຮັງປອດ ຈາກການເບິ່ງລັກສະນະຂອງ
ລົມຫາຍໃຈ. ມັນແມ່ນຢໍາກວ່ານັ້ນອີກ ຖ້າຫາກພວກເຮົາກວດຫາໂຣກມະ
ເຮັງປອດຊະນິດໃດຊະນິດນຶ່ງໂດຍສະເພາະ ແທນທີ່ຈະເບິ່ງມະເຮັງປອດແບບ
ລວມໆ. ພວກເຮົາໄດ້ພົບວ່າ ເຮົາສາມາດ ທີ່ຈະບອກຊະນິດຂອງໂຣກມະເຮັງ
ປອດຂອງຄົນເຈັບ ທີ່ຢູ່ໃນຂັ້ນກ້າວໜ້າຫລືຮ້າຍແຮງນັ້ນ ຫລາຍກ່ວາຢູ່ໃນຂັ້ນ
ຕົ້ນໆ."
ດຣ. Mazzone ກ່າວຕື່ມວ່າ ການກວດເບິ່ງລົມຫາຍໃຈ ຍັງບອກໃຫ້ຮູ້ອີກວ່າ ໂຣກມະເຮັງ
ນັ້ນມີການເຄື່ອນໄຫວແນວໃດ. ຕົວຢ່າງເຊັ່ນ ການສຶກສາຄົ້ນຄວ້າສະແດງໃຫ້ເຫັນວ່າ ຄົນທີ່
ເປັນໂຣກມະເຮັງປອດທີ່ຂະຫຍາຍໂຕໄວ ມີລົມຫາຍໃຈທີ່ມີລັກສະນະທາງຊີວະພາບແຕກ
ຕ່າງຈາກໂຣກມະເຮັງ ທີ່ຂະຫຍາຍໂຕຊ້າ.
Dr. Steven Birnbaum ໃຊ້ CT-Scan ເພື່ອກວດເບິ່ງໂຣກມະເຮັງ ຢູ່ສູນການແພດໃນພາກໃຕ້ຂອງລັດ New Hampshire (03/06/10)
ແຕ່ວ່າ ວິທີການກວດລົມຫາຍ
ໃຈທີ່ວ່ານີ້ຈະຕ້ອງໄດ້ຮັບການ
ປັບປຸງໃຫ້ລະອຽດດີກວ່ານີ້ກ່ອນ
ຈຶ່ງຈະສາມາດເອົາໄປນໍາໃຊ້ຢ່າງ
ກວ້າງຂວາງໄດ້. Dr. Mazzone
ກ່າວວ່າ:
“ອັນນີ້ຍັງເປັນເຄື່ອງມືທີ່ຫຍາບໆ
ຢູ່ ຊຶ່ງຍັງມີຫລາຍຢ່າງຕ້ອງໄດ້
ປັບປຸງໃຫ້ດີຂຶ້ນ. ສະນັ້ນ ຄວາມ
ຫວັງຂອງພວກເຮົາກໍຄືວ່າ ລະ
ບົບກວດແບບນີ້ລຸ້ນໃໝ່ ຈະສາ
ມາດເພີ້ມຄວາມແມ່ນຢໍາຂຶ້ນໄດ້
ກາຍລະດັບ 80-85% ຂຶ້ນຈົນ
ເຖິງຂັ້ນທີ່ມັນສາມາດ ໃຊ້ປະໂຫຍດໄດ້ ໃນທາງການແພດ.”
ເມື່ອໄປເຖິງຈຸດນັ້ນແລ້ວ ການກວດແບບນີ້ກໍຈະສາມາດນໍາເອົາໄປໃຊ້ ໃນການກວດຮ່າງ
ກາຍເປັນປະຈໍາ ເພື່ອກວດຫາພະຍາດນີ້ແຕ່ຫົວທີ. ມັນຈະເປັນວິທີທີ່ເຮັດໄດ້ງ່າຍໆ ບໍ່ມີ
ການກວດເລິກເຂົ້າໄປໃນຮ່າງກາຍ ແລະກໍບໍ່ແພງເທົ່າກັບວິທີການກວດໃນປັດຈຸບັນ ຄື
ການກວດເນື້ອເຍື່ອ ແລະການກວດແບບສະແກນ.
ພວກນັກຊ່ຽວຊານຍັງຫວັງອີກວ່າ ການກວດລົມຫາຍໃຈ ພ້ອມກັບການກວດໂດຍໃຊ້ຄອມ
ພີວເຕີສະແກນ ຫລື CAT scan ເພີ້ມເຕີມອີກ ຈະສາມາດຊ່ວຍໃຫ້ທ່ານໝໍເບິ່ງອອກໄດ້ວ່າ
ເນື້ອງອກອັນໃດ ເປັນເນື້ອງອກທີ່ບໍ່ອັນຕະລາຍ ແລະອັນໃດເປັນເນື້ອງອກທີ່ເປັນໂຣກມະ
ເຮັງ ເພື່ອວ່າຈະສາມາດເລີ້ມຕົ້ນປິ່ນປົວພະຍາດດັ່ງກ່າວໄດ້ໄວຂຶ້ນ.
ເບິ່ງວີດີໂອລາຍງານພາສາອັງກິດ: