ຜູ້ຊາຍຄົນນຶ່ງທີ່ເກີດຢູ່ໂຣມາເນຍ ໄດ້ຖືກຕັດສິນໂທດຢູ່ໃນສະຫະລັດ ໃຫ້ຈຳຄຸກ 10 ປີ ຍ້ອນສົມຮູ້ຮ່ວມຄິດ ຂາຍອາວຸດທະຫານ ໃນຢູໂຣບ.
ທ້າວ Virgil Georgescu ຄົນອາເມຣິກັນເຊື້ອສາຍໂຣມາເນຍ ໄດ້ຖືກຕັດສິນໂທດໃນ ວັນສຸກວານນີ້ທີ່ເກາະ Manhattan ຫລັງຈາກຖືກພົບເຫັນວ່າມີຄວາມຜິດໂດຍຄະນະຕຸລາການໃນຕົ້ນປີນີ້.
ທ້າວ Georgescu ຖືກຈັບທີ່ Montenegro ໃນປີ 2014 ໃນການປະຕິບັດງານຂອງອົງການຕໍ່ຕ້ານຢາເສບຕິດສະຫະລັດຫຼື DEA. ຄະນະໄອຍະການໄດ້ກ່າວຫາລາວວ່າ ສົມຮູ້ຮ່ວມຄິດກັບອະດີດເຈົ້າໜ້າທີ່ລັດຖະບານໂຣມາເນຍ ແລະອະດີດສະມາຊິກສະ ພາອີຕາລີຄົນນຶ່ງ ເພື່ອຂາຍອາວຸດຊະນິດຕ່າງໆ.
ສາຍລັບນອກເຄື່ອງແບບຂອງອົງການ DEA ທີ່ປອມຕົວເປັນຜູ້ຕາງໜ້າຂອງກຸ່ມກະບົດ FARC ໃນໂຄລອມເບຍ ກ່າວວ່າ ພວກເຂົາເຈົ້າຢາກຊື້ອາວຸດເພື່ອຍິງເຮຣີຄອບເຕີ້ສະ ຫະລັດ.
ພວກທະນາຍຄວາມຂອງຈຳເລີຍກ່າວວ່າ ທ້າວ Georgescu ໄດ້ໂທລະສັບໄປຫາອົງການສືບລັບຊີໄອເອ ໃນປີ 2012 ເພື່ອແຈ້ງໃຫ້ຊາບ ກ່ຽວກັບແຜນການຂາຍອາ ວຸດດັ່ງກ່າວ. ໄອຍະການຖົກຖຽງວ່າທ້າວ Georgescu ໃນເວລາຕໍ່ມາໄດ້ປ່ຽນໃຈ.
ລັດຖະມົນຕີຊ່ອຍວ່າການ ກະຊວງຍຸຕິທຳຂອງສະຫະລັດ ທ່ານ Andrea Surratt ກ່າວຕໍ່ຜູ້ພິພາກສາວ່າ ຈຸດປະສົງຂອງທ້າວ Georgescu ແມ່ນເພື່ອຫວັງຢາກໄດ້ ກຳໄລ “ຢູ່ເທິງຫລັງຂອງຊາວອາເມຣິກັນທີ່ຕາຍໄປ.” ທ່ານກ່າວຕື່ມວ່າ ທ້າວ Georgescu ໄດ້ຮັບການຈູງໃຈຈາກຄວາມໂລບມາກໂລພາ.
ພວກທີ່ສົມຮູ້ຮ່ວມຄິດກັບທ້າວ Georgescu ໄດ້ພາກັນຍອມຮັບຜິດໃນຂໍ້ຫາທີ່ພົວພັນ ກັບການກໍ່ການຮ້າຍແລະຕົກລົງທີ່ຈະໃຫ້ການກ່ຽວກັບທ້າວ Georgescu ພວກເຂົາເຈົ້າຕ່າງກໍໄດ້ຮັບໂທດຕິດຄຸກຜູ້ລະ 4 ປີ.