ບັນດາອົງການຈັ້ດຕັ້ງນາໆຊາດ ກຳລັງຮຽກຮ້ອງຂໍຄວາມຊ່ອຍເຫຼືອສຳລັບພວກອົບພະຍົບມຸສລິມຫຼາຍພັນຄົນ ຈາກມຽນມາ ແລະບັງກລາເເດັສ ທີ່ຕົກຄ້າງຢູ່ໃນທະເລ ໃນເຮືອຂອງພວກຄ້າມະນຸດ ໃນອ່າວ Bengal ນັ້ນ. Steve Herman ຜູ້ສື່ຂ່າວ ວີໂອເອ ລາຍງານມາຈາກບາງກອກ ວ່າ ການປາບປາມທາງເດີນຕ່າງໆຂອງພວກຄ້າມະນຸດໃນໄທ ປ້ອງກັນບໍ່ໃຫ້ພວກເຮືອເຫຼົ່ານີ້ເຂົ້າມາຈອດໃນພະລາດຊະອານາຈັກໄທໄດ້ ຊຶ່ງຈະເຮັດໃຫ້ພວກຄົນໂດຍສານອົບພະຍົບໃນເຮືອ ຕົກຢູ່ໃນສະພາບສ່ຽງໄພອັນຕະລາຍຫຼາຍຂຶ້ນ ພຸດທະສອນມີລາຍງານເລືອງນີ້ ຈາກຜູ້ສື່ຂ່າວວີໂອເອ ມາສະເນີທ່ານຕໍ່ໄປ...
Your browser doesn’t support HTML5
ຟັງລາຍງານ ຊາວອົບພະຍົບ ເອເຊຍ ຕາເວັນອອກສຽງໃຕ້
ພວກອົບພະຍົບທີ່ໝົດຫວັງຈຳນວນຫຼາຍກວ່າ 1 ພັນຄົນຈາກມຽນມາ ແລະ ບັງກລາແດັສ ໄດ້ໄປຮອດແຄມຝັ່ງທະເລໃນມາເລເຊຍ ແລະອິນໂດເນເຊຍ ຫວ່າງບໍ່ເທົ່າໃດມື້ຜ່ານມານີ້.
ຍັງມີພວກອົບພະຍົບອີກຫຼາຍຄົນຕົກຄ້າງຢູ່ໃນທະເລ ເນື່ອງຈາກການ ປາບປາມຄັ້ງໃໝ່ ໃນບ່ອນລີ້ຊ່ອນຂອງພວກອົບພະຍົບທີ່ຖືກລັກລອບ ໄປໃນໄທ ແລະພວກລູກເຮືອປະປ່ອຍເຂົາເຈົ້າໄວ້ໃນກາງທະເລນັ້ນ.
ທ່ານ Jeffrey Labovitz ຫົວໜ້າອົງການຈັດຕັ້ງສາກົນເພື່ອການຍົກ ຍ້າຍຖິ່ນຖານ ຫຼື IOM ປະຈຳໄທ ຢາກໃຫ້ພວກລັດຖະບານຂອງປະເທດໃນຂົງເຂດເອເຊຍຕາເວັນອອກສຽງໃຕ້ ຊ່ອຍກູ້ຊີວິດພວກອົບພະ ຍົບທີ່ຕົກຄ້າງໃນທະເລ.
ທ່ານ Labovitz ກ່າວວ່າ “ພວກອົບພະຍົບ ຈະຕ້ອງໄດ້ອອກຈາກ ເຮືອເຫຼົ່ານີ້. ທຸກໆມື້ ພວກເຮົາຮູ້ຈັກວ່າ ຈະມີຜູ້ຄົນຕື່ມອີກຈະໄດ້ຮັບຄວາມສ່ຽງຫຼາຍຂຶ້ນ ແລະວ່າ ຈະມີຜູ້ຄົນຕາຍໄປ.”
ທີ່ອິນໂດເນເຊຍ ພວກອົບພະຍົບບາງຄົນໄດ້ເຂົ້າໄປຮອດຝັ່ງ ແຕ່ກອງ ທັບເຮືອຂອງປະເທດ ກ່າວວ່າ ເຮືອອີກລຳໜຶ່ງທີ່ບັນທຸກພວກອົບພະ ຍົບຈຸອື່ນ 500 ຄົນ ໄດ້ຖືກປະຕິເສດບໍ່ໃຫ້ເຂົ້າຈອດ.
ບັນດາເຈົ້າໜ້າທີ່ ກ່າວວ່າ ພວກເຂົາເຈົ້າໄດ້ເຕີມນ້ຳມັນໃຫ້ເຮືອລຳນັ້ນ ແລະໄດ້ສົ່ງອອກທະເລໄປ.
ທ່ານ Phil Robertson ຈາກອົງການປົກປ້ອງສິດທິມະນຸດ Human Rights Watch ເຫັນວ່າການກະທຳເຊັ່ນນີ້ ເປັນເລື້ອງທີ່ລົບກວນໃຈ.
ທ່ານ Phil Robertson ກ່າວວ່າ “ວິທີການແບບນີ້ ເປັນຕົ້ນເຫດຂອງ ໄພຫາຍຍະນະໃນການຮັບມືກັບກອງເຮືອຂອງຊາວໂຣຮິງຢາ ຊຶ່ງບັດນີ້ ຈະຕ້ອງມີການຊອກໃຫ້ເຫັນ ແລະໃຫ້ການຊ່ອຍເຫຼືອ.”
ມີການຄາດຄະເນກັນວ່າ ປະມານເຄິ່ງໜຶ່ງຂອງຈຳນວນພວກອົບພະຍົບ ທີ່ກຳລັງຕົກຄ້າງຢູ່ໃນທະເລເວລານີ້ ແມ່ນພວກຊາວມຸສລິມໂຣຮິງຢາ ທີ່ເປັນພວກທີ່ໄດ້ຮັບເຄາະຮ້າຍ ຈາກຄວາມຮຸນແຮງດ້ານສາສະໜາ ແລະການຈຳແນກກີດກັນໃນມຽນມາ ແລະພາກັນລົງຄວາມເຫັນວ່າ ຂໍເປັນອົບພະຍົບທີ່ຜິດກົດໝາຍໃນແຫ່ງອື່ນຈະດີກວ່າ ຖ້າພວກເຂົາເຈົ້າໂຊກດີພໍ ສາມາດເອົາໂຕລອດໄດ້ຈາກການເດີນທາງທີ່ເຕັມໄປດ້ວຍການສ່ຽງໄພຂອງເຂົາເຈົ້ານັ້ນ.
ທ່ານ Labovitz ຈາກອົງການ IOM ກ່າວຊີ້ແຈງວ່າ “ອຸດຈາລະລົງໃສ່ນ້ຳ ພວກເຂົາເຈົ້າບໍ່ມີຫ້ອງນ້ຳ ພວກເຂົາເຈົ້າມັກຍັດໃສ່ໃນທ້ອງເຮືອ. ຖ້າຜູ້ໃດຜູ້ໜຶ່ງສະແດງຄວາມບໍ່ພໍໃຈ ພວກເຂົາເຈົ້າກໍສາມາດຖືກໂຍນຖິ້ມລົງໃນທະເລເວລາໃດກໍໄດ້ ແລະແນ່ນອນຈະຖືກທຸບຕີ.”
ສະພາບການອົບພະຍົບຈາກມຽນມາ ທ້າວ Mohammad Husin ທີ່ເຂົ້າໄປຮອດຝັ່ງທະເລໃນແຂວງ Aceh ເມື່ອອາທິດນີ້ ແມ່ນເປັນ ຕົວຢ່າງ.
ທ້າວ Mohammad Husin ກ່າວວ່າ “ມັນໃຊ້ເວລາສອງເດືອນມານຳເຮືອນ້ອຍລຳໜຶ່ງ ຈຶ່ງມາຮອດນ່ານນ້ຳຂອງໄທ ບ່ອນທີ່ພວກເຮົາພວກເຮົາຖືກຈັບກຸມ ແລະຖືກກັກໂຕໄວ້ໃນເຮືອເປັນເວລາ 20 ມື້ ຍ້ອນອັນທີ່ລາວເຊື້ອວ່າ ແມ່ນກອງທັບເຮືອໄທ. ເຖິງຢ່າງໃດກໍດີ ພວກເຮົາໄດ້ຂໍເຂົ້າປາອາຫານແລະນ້ຳດື່ມ ພວກທະຫານເຮືອເຫຼົ່ານີ້ ໃຫ້ນ້ຳພວກເຮົາພຽງໜ້ອຍດຽວ. ຖ້າພວກເຮົາຂໍຕື່ມອີກ ພວກເຂົາເຈົ້າທຸບຕີພວກເຮົາ. ພວກເຮົາໄດ້ຂໍເດີນທາງຕໍ່ໄປຍັງມາເລເຊຍ ແຕ່ພວກເຂົາເຈົ້າບໍ່ຍອມປ່ອຍພວກເຮົາໄປ.”
ທ່ານ Phil Robertson ຈາກອົງການ Human Rights Watch ກ່າວວ່າ “ຊາວໂຣຮິງຢາ ມີໝູ່ເພື່ອນໜ້ອຍ ນອກຈາກພວກທີ່ມີຄວາມເຕັມໃຈທີ່ຢາກສວຍໃຊ້ປະໂຫຍດເຂົາເຈົ້າ ແລະຂູ່ເຂັນພວກເຂົາເຈົ້າ. ແລະເປັນໜ້າເສຍໃຈ ມີເລື້ອງຕ່າງໆຫລາຍຂຶ້ນນັບມື້ ມາເລົ່າສູ່ພວກເຮົາຟັງ ກ່ຽວກັບການສົມຮູ້ຮ່ວມຄິດຂອງພວກເຈົ້າໜ້າທີ່ແລະພວກຄ້າມະນຸດທີ່ໄດ້ລະເມີດສິດທິຂອງພວກຄົນເຫຼົ່ານີ້. ມັນໄດ້ພາໃຫ້ມີການຕັ້ງຄຳຖາມຕ່າງໆຂຶ້ນມາ ກ່ຽວກັບຄວາມໝັ້ນໝາຍຂອງບັນດາລັດຖະບານເຫຼົ່ານີ້ ໃນການຕໍ່ຕ້ານການຄ້າມະນຸດ.”
ຫູງຈາກມີການພົບເຫັນຂຸມຝັງສົບຂະໜາດໃຫຍ່ໃນອັນທີ່ເອີ້ນວ່າ “ຄ້າຍ ພວກຂ້າທາດ” ໃນປ່າດົງຕຶບແຫ່ງຕ່າງໆໃນພາກໃຕ້ຂອງໄທ ຄະນະຜູ້ ນຳລັດຖະບານທະຫານໄທ ໄດ້ໃຫ້ຄຳໝັ້ນສັນຍາວ່າ ຈະຖອນຮາກເຄືອ ຂ່າຍຄ້າມະນຸດນີ້ ໃຫ້ໝົດໄປໂດຍໄວ.