ພວກຜູ້ນໍາອົງການຮ່ວມມືດ້ານເສດຖະກິດແຫ່ງຂົງເຂດເອເຊຍປາຊີຟິກ ຫລື APEC ໄດ້ໄປຮ່ວມກອງປະຊຸມສຸດຍອດ ທີ່ດຳເນີນໄປເປັນເວລາ 2 ວັນນັ້ນ ດ້ວຍຄວາມຫວັງວ່າ ຈະຂະຫຍາຍການຄ້າ ແລະຊຸກຍູ້ການຂະຫຍາຍ
ໂຕຂອງເສດຖະກິດ. ໃນວັນອາທິດແລ້ວນີ້ ພວກຜູ້ນຳດັ່ງ
ກ່າວກໍໄດ້ເອົາບາດກ້າວອັນສຳຄັນ ໂດຍໄດ້ບັນລຸຂໍ້ຕົກ
ລົງກັນສະບັບນຶ່ງ ທີ່ຜູກມັດບັນດາປະເທດ APEC ໃຫ້
ສ້າງຕັ້ງເຂດການຄ້າເສລີໃນລະດັບພາກພື້ນຂຶ້ນ ທີ່ພົວພັນ
ໝົດທັງ 21 ປະເທດໃນກຸ່ມນັ້ນ.
ນະຄອນ Yokohama ບ່ອນຈັດກອງປະຊຸມສຸດ ຍອດຂອງ APEC ໃນ ວັນທີ 13 ແລະ14 ພະຈິກ 2010.
ຄໍາປະກາດທີ່ເອີ້ນກັນວ່າ
“Yokohama Vision”
ຫລື ວິໄສທັດໂຢໂກຫາມາ
ນັ້ນ ບໍ່ໄດ້ວາງຕະລາງເວລາ
ລະອຽດ ສຳລັບການຈັດຕັ້ງປະຕິບັດ ຂໍ້ຕົກລົງດ້ານການຄ້າ
ດັ່ງກ່າວນັ້ນແຕ່ໄດ້ຮຽກຮ້ອງໃຫ້ມີການສົນທະນາກັນຕໍ່ໄປ
ໂດຍຜ່ານການພົບປະກັນໃນກອງປະຊຸມຕ່າງໆ ເຊ່ນໃນ
ກອງປະຊຸມອາຊ່ຽນບວກ 3 ຫລື ບວກ 6 ເປັນຕົ້ນ.
ສະຫະລັດເຫັນວ່າ ສັນຍາພາຄີຂ້າມປາຊີຟິກ ຫລື TPP ຂອງຕົນນັ້ນ ເປັນພາຫະນະທີ່ສຳຄັນອັນນຶ່ງ ໃນການຊຸກຍູ້ເປົ້າໝາຍທີ່ໃຫຍ່ຂຶ້ນ ກວ່າເດີມຂອງ APEC ນັ້ນ. ສັນຍາການຄ້າຂອງສະຫະລັດກັບບັນດາປະ ເທດແຄມຝັ່ງມະຫາສະມຸດປາຊີຟິກສະບັບນີ້ ສະເໜີໃຫ້ຍົກເລີກອັດຕາພາສີສິນຄ້ານຳເຂົ້າ ຈາກປະເທດທີ່ຈະເລີນແລ້ວ 9 ປະເທດ ລວມທັງ ຍີ່ປຸ່ນໍາ. ແຕ່ວ່າ ຍີ່ປຸ່ນຊຶ່ງເປັນ
ເຈົ້າພາບຈັດກອງປະຊຸມນີ້ ມີຄວາມລັ່ງເລໃຈ ທີ່ຈະໃຫ້ຄຳໝັ້ນສັນຍາຕໍ່ເລື້ອງນີ້ ຍ້ອນເປັນ
ຫ່ວງວ່າ ຈະມີປະຕິ ກິລິຍາທາງການເມືອງຕອບໂຕ້ກັບມາຢ່າງຮຸນແຮງ ຈາກບັນດາກະເສດ
ຕະກອນພາຍໃນປະເທດ ທີ່ຄັດຄ້ານຕໍ່ການຄ້າເສລີ.
ທ່ານ Naoto Kan ນາຍົກລັດຖະ ມົນຕີຍີ່ປຸ່ນ (ຂວາ) ກຳລັງຕ້ອນຮັບ ທ່ານ Barack Obama ປະທານາ ທິບໍດີສະຫະລັດ ໃນງານສະແດງ ວັດທະນາທຳທີ່ກອງປະຊຸມສຸດຍອດ APEC ທີ່ນະຄອນ Yokohama ວັນທີ 13 ພະຈິກ, 2010.
ໃນໂອກາດກ່າວຕໍ່ກອງປະຊຸມໃຫ້ສໍາພາດ
ຂ່າວນັ້ນ ທ່ານ Naoto Kan ນາຍົກລັດຖະ
ມົນຕີຍີ່ປຸ່ນ ບໍ່ໄດ້ກ່າວສະໜັບສະໜູນແຜນ
ການນີ້ແຕ່ຢ່າງໃດ.
// ສຽງທ່ານຄານ ເປັນພາສາຍີ່ປຸ່ນ //
ທ່ານ Kan ເວົ້າວ່າ TPP ໄດ້ກາຍມາເປັນ
ສັນຍາລັກຂອງການເຕີບໂຕທາງເສດຖະກິດ
ໃນເກົ້າປະເທດທີ່ກ່ຽວຂ້ອງ. ເຖິງແມ່ນວ່າຍີ່
ປຸ່ນ ຍັງບໍ່ໄດ້ລົງນາມໃນສັນຍາສະບັບນີ້ເທື່ອ
ກໍຕາມ ແຕ່ພວກເຮົາກໍມີແຜນທີ່ຈະພົບກັບ
ປະເທດພາຄີເຫລົ່ານີ້ ຢ່າງຕັ້ງໜ້າ ເພື່ອຕັດ
ສິນໃຈເລືອກເອົາແນວທາງປະຕິບັດການ
ທີ່ຖືກຕ້ອງເໝາະສົມ.
ຖະແຫລງການ APEC ຍັງໄດ້ວາງບາດກ້າວ
ຕ່າງໆ ສໍາລັບສົ່ງເສີມ ຊຸກຍູ້ບັນດາເສດຖະກິດ
ໃນຂົງເຂດ. ພວກຜູ້ນຳທັງຫລາຍ ຕ່າງກໍໄດ້
ເນັ້ນໜັກໃສ່ການຂະຫຍາຍຕົວທາງເສດຖະກິດ
ທີ່ມີຄວາມກໍ້າເກິ່ງກັນແລະມີການຮ່ວມມືກັນ
ຢ່າງເລິກເຊິ່ງກວ່າເກົ່າ ແລະພ້ອມດຽວກັນກໍ
ເນັ້ນຢໍ້າໃນເລື້ອງຂອງການຍົກຄ່າແຮງງານພາຍໃນປະເທດຂຶ້ນ ແລະເພັ່ງເລັງໃສ່ການຊຸກ ຍູ້ໃຫ້ມີຄວາມຕ້ອງການຊົມໃຊ້ສິນຄ້າຢູ່ພາຍໃນປະເທດ ຫລາຍຂຶ້ນ.
ນອກນັ້ນ ພວກປະເທດສະມາຊິກເອເປັກ ຍັງໄດ້ສະແດງຄວາມໝັ້ນໝາຍ ຕໍ່ການຕໍ່ຕ້ານກັບລະບົບປົກປ້ອງຕະຫລາດພາຍໃນ ແລະຂັດຂືນຕໍ່ການຕັ້ງສິ່ງກີດຂວາງການຄ້າໃໝ່ແບບໃດກໍຕາມ ໃນຕະຫລອດ ໄລຍະ 3 ປີຕໍ່ໜ້ານີ້. ແລະພວກເຂົາເຈົ້າໃຫ້ຄຳໝັ້ນສັນຍາວ່າ ຈະສືບຕໍ່ການເຈລະຈາ ຮອບໂດຮາ ຂອງອົງການການຄ້າໂລກ ທີ່ແນໃສ່ຊຸກຍູ້ໃຫ້ການຄ້າໂລກມີເພີ້ມຂຶ້ນນັ້ນ ໃຫ້ສຳເລັດເສັດສິ້ນລົງ.
ຄວາມມຸ້ງໝັ້ນຕໍ່ການຮ່ວມມືທາງການຄ້າ ແລະ ເສດຖະກິດ ທີ່ໄດ້ຟື້ນຟູຄືນມາໃໝ່ນີ້ໄດ້ຖືກ
ມອງເຫັນວ່າ ເປັນເຫດການຜັນຂະຫຍາຍທີ່ສໍາຄັນ ຊຶ່ງເຫດຜົນສ່ວນນຶ່ງ ກໍແມ່ນຍ້ອນວ່າ
ພວກປະເທດ APEC ລວມກັນແລ້ວ ແມ່ນມີຜົນຜະຫລິດທີ່ຫລາຍກວ່າເຄິ່ງນຶ່ງຂອງຜະ
ຫລິດຕະພັນລວມພາຍໃນ ຫລື GDP ທັງໝົດຂອງໂລກ.
ບັນຫາທີ່ຍັງຄົງຄ້າງ ບໍ່ທັນໄດ້ຖືກແກ້ໄຂເທື່ອ ກໍຄືນະໂຍບາຍດ້ານ ເງິນຕາ ແລະຄວາມເຄັ່ງຕຶງໃນການພົວພັນສອງຝ່າຍລະຫວ່າງປະເທດສະມາຊິກຂອງກຸ່ມ APEC ເອງ.
ປະທານາທິບໍດີຣັດເຊຍ ທ່ານ Dmitry Medvedev ໄປເຖິງສະໜາມບິນ Haneda ທີ່ກຸງ Tokyo ໃນ ວັນສຸກທີ 12, 2010 ເພື່ອເຂົ້າຮ່ວມກອງປະຊຸມ ສຸດຍອດ APEC ໃນ Yokohama.
ຍີ່ປຸ່ນໄດ້ມີການຖົກຖຽງຢ່າງເຜັດ
ຮ້ອນກັບຣັດເຊຍ ນັບຕັ້ງແຕ່
ເວລາທີ່ປະທານາທິບໍດີຣັດເຊຍ
ທ່ານ Dmitry Medvedev
ໃນການເຄື່ອນໄຫວທີ່ເປັນການ
ຝ່າຝືນຕໍ່ຄວາມປາດຖະໜາຂອງ
ລັດຖະບານຍີ່ປຸ່ນ ໄດ້ໄປຢ້ຽມ
ຢາມໝູ່ເກາະທີ່ເປັນບັນຫາຂັດ
ແຍ້ງກັນນັ້ນ.
ສ່ວນສາຍສຳພັນລະຫວ່າງຈີນ
ກັບຍີ່ປຸ່ນ ກໍໄດ້ຕົກວູບລົງ ໃນ
ລະດູໃບໄມ້ລົ່ນປີນີ້ ລຸນຫລັງທີ່
ກັບຕັນເຮືອຫາປາຂອງຈີນລໍາ
ນຶ່ງໄດ້ເອົາເຮືອຂອງຕົນ ແລ່ນ
ເຂົ້າຕຳເຮືອຍາມຝັ່ງທະເລຂອງ
ຍີ່ປຸ່ນ ຢູ່ນອກຝັ່ງໝູ່ເກາະທີ່ມີການຜິດຖຽງກັນ ຊຶ່ງຢູ່ໃນການຄວບຄຸມຂອງຍີ່ປຸ່ນນັ້ນ.
ທ່ານ ຄານ ໄດ້ພົບກັບພວກຜູ້ນຳຣັດເຊຍ ແລະຈີນໃນໄລຍະກອງປະ ຊຸມສຸດຍອດບັ້ນນີ້
ແຕ່ທ່ານກ່າວວ່າ ການຖົກຖຽງກັນໃນເລື້ອງດິນແດນ ຍັງບໍ່ທັນໄດ້ຖືກແກ້ໄຂເທື່ອ.
// ສຽງທ່ານຄານ ເປັນພາສາຍີ່ປຸ່ນ //
ທ່ານຄານເວົ້າວ່າ ເຖິງແມ່ນວ່າພວກເຮົາມີຄວາມຄິດເຫັນແຕກຕ່າງກັນ, ແຕ່ຍີ່ປຸ່ນກໍສາມາດປັບປຸງສາຍພົວພັນກັບບັນດາປະເທດເຫລົ່ານີ້ໄດ້ ໂດຍເພັ່ງເລັງໃສ່ດ້ານທີ່ພວກເຮົາມີຄວາມ ເຫັນຄືກັນ ແລະ ການຮ່ວມມື ທາງດ້ານເສດຖະກິດ ແມ່ນດ້ານນຶ່ງທີ່ສາມາດຊ່ວຍພວກເຮົາຜ່ານຜ່າ ຄວາມເຄັ່ງຕຶງເຫລົ່ານີ້ໄດ້.
ບັດນີ້ ຈຸດເພັ່ງເລັງແມ່ນຫັນປ່ຽນໄປຍັງສະຫະລັດ ທີ່ຈະເປັນເຈົ້າພາບຈັດກອງປະຊຸມສຸດຍອດ APEC ຄັ້ງຕໍ່ໄປ ທີ່ລັດຮາວາຍ ໃນປີໜ້າ.