ຊາວອາເມຣິກັນ ເລີ້ມພາກັນສະເຫຼີມສະຫຼອງວັນແຮງງານ ໃນທ້າຍສັບປະດານີ້ແລະຈະມ້ວນທ້າຍການສະຫຼອງ ໃນວັນຈັນ ຊຶ່ງເປັນມື້ວັນພັກ ເພື່ອເປັນກຽດ ໃຫ້ແກ່ພວກກຳມະ ກອນໃນສະຫະລັດແລະການປະກອບສ່ວນຂອງພວກເຂົາເຈົ້າ ເຂົ້າໃນເສດຖະກິດຂອງ ປະເທດ.
ວັນພັກດັ່ງກ່າວນີ້ ຍັງເປັນສັນຍານຂອງການສິ້ນສຸດລົງແບບບໍ່ເປັນທາງການຂອງລະດູຮ້ອນຢູ່ໃນສະຫະລັດ. ພວກກຳມະກອນສ່ວນໃຫຍ່ຈະໄດ້ພັກວຽກພັກການ ໃນວັນແຮງງານ ແລະມັກຈະພາກັນສະເຫຼີມສະຫຼອງໃນວັນທ້າຍສັບປະດາ ກັບຄອບຄົວຂອງພວກເຂົາເຈົ້າດ້ວຍການໄປກິນເຂົ້າປ່າປິກນິກແລະໄປພັກຮ້ອນ. ຢູ່ໃນປະຊາຄົມບາງແຫ່ງວັນແຮງງານນີ້ ແມ່ນມື້ສຸດທ້າຍກ່ອນທີ່ສົກການສຶກສາຈະເລີ້ມຂຶ້ນສຳລັບພວກເດັກນ້ອຍ.
ຊາວອາເມຣິກັນຈຳນວນຫຼວງຫຼາຍ ໃນເຂດແຄມຝັ່ງທະເລກ້ຳຕາເວັນອອກຂອງປະເທດ ອາດຈະພົບວ່າແຜນການຂອງພວກເຂົາເຈົ້າໄດ້ຖືກລົບກວນໂດຍເຮີຣິເຄນ Hamine ຊຶ່ງໄດ້ພັດຜ່ານລັດຟລໍຣິດາຈາກອ່າວເມັກຊິໂກໃນວັນສຸກວານນີ້ແລະພວມເຄື່ອນໄຫວເຂົ້າສູ່ລັດຈໍເຈຍແລະລັດຄາໂຣໄລນາທັງສອງ.
ລົມພາຍຸດັ່ງກ່າວນີ້ໄດ້ພາກັນມີການປະກາດປິດແລະອອກຄຳເຕືອນກ່ຽວກັບສະພາບອາ ກາດ ເລາະຕາມບໍລິເວນສ່ວນໃຫຍ່ ຂອງເຂດແຄມຝັ່ງມະຫາສະມຸດອັດລັນຕິກ ຮວມທັງນະຄອນນິວຢອກ ບ່ອນທີ່ເຈົ້າຄອງນະຄອນ Bill de Blasio ກ່າວວ່າຈະມີການປິດຫາດຊາຍໃນນະຄອນດັ່ງກ່າວແລະຫ້າມບໍ່ໃຫ້ຜູ້ຄົນລົງລອຍນ້ຳໃນວັນອາທິດມື້ອື່ນ ແລະອາດຈະປິດໄປຈົນຮອດວັນອັງຄານ ຍ້ອນໄພອັນຕະລາຍ ທີ່ອາດເກີດຂຶ້ນຄື້ນຟອງຕັດ. ທ່ານກ່າວວ່າ “ສິ່ງສຳຄັນອັນທີນຶ່ງທີ່ຂ້າພະເຈົ້າຢາກເວົ້າຕໍ່ຊາວນິວຢອກກໍຄືວ່າ ຄື້ນຟອງຕັດນີ້ ແມ່ນເປັນອັນຕະລາຍຫລາຍ ນີ້ແມ່ນຄຳເຕືອນນ້ຳເບີນຶ່ງຂອງຂ້າພະເຈົ້າ.”
ວັນແຮງງານຢູ່ໃນສະຫະລັດສະຫຼອງກັນໃນວັນຈັນອາທິດທຳອິດຂອງເດືອນກັນຍາແລະໄດ້ກາຍມາເປັນວັນພັກຢ່າງເປັນທາງການ ໃນປີ 1894 ຫລັງຈາກໄດ້ຮັບການຊຸກຍູ້ໂດຍ ບັນດາສະຫະພັນກຳມະບານແຫ່ງຊາດ. ນັບເປັນເວລາຫຼາຍໆທົດສະວັດຜ່ານມາແລ້ວທີ່ຫົວເມືອງຕ່າງໆໃຊ້ໂອກາດນີ້ສວນສະໜາມແລະແຫ່ພາເຣດເພື່ອເປັນກຽດໃຫ້ແກ່ກຳມະ ກອນໃນສະຫະພັນແຮງງານຕ່າງໆ.