ດາລາລອຍນ້ຳແມ່ຍິງອາເມຣິກັນ ນາງ Katie Ledecky ໄດ້ທຳລາຍສະຖິຕິໂລກ ໃນການລອຍນ້ຳທ່າ freestyle ໄລຍະ 800 ແມັດ ທີ່ການແຂ່ງຂັນກິລາໂອລິມປິກ ລະດູຮ້ອນຢູ່ນະຄອນຣິໂອ ໃນຂະນະທີ່ນັກລອຍຜູ້ຊາຍອາເມຣິກັນ ທ້າວ Micheal Phelps ໄດ້ເສຍໄຊ ແບບຄາດບໍ່ເຖິງ ໃນການແຂ່ງລອຍນ້ຳ ທ່າແມງກະເບື້ອຫຼື butterfly ໄລຍະ 100 ແມັດ ໃຫ້ແກ່ນັກລອຍນ້ຳຈາກສິງກະໂປ.
ນາງ Ledecky ເປັນນັກລອຍນ້ຳອາເມຣິກັນຄົນທຳອິດນັບແຕ່ນາງ Debbie Myer ໄດ້ເຮັດປະຫວັດໄວ້ ໃນປີ 1968 ໂດຍເອົາຊະນະການແຂ່ງລອຍນ້ຳແບບ freestyle ທັງໄລຍະ 200, 400 ແລະ 800 ແມັດ ຢູ່ກິລາໂອລິມປິກດຽວກັນ. ເວລາທີ່ນາງໄດ້ໃຊ້ ໃນວັນສຸກວານນີ້ 8 ນາທີກັບ 4.79 ວິນາທີນັ້ນ ແມ່ນໄດ້ປັບ ປຸງສະຖິຕິໂລກຂອງນາງເອງໃຫ້ດີຂຶ້ນເກືອບ 2 ວິນາທີ. ນອກນັ້ນ ນາງ Ledecky ຍັງໄດ້ຮັບຫລຽນຄຳ ແລະຫລຽນເງິນໃນການແຂ່ງລອຍນ້ຳຕໍ່ກັນຫຼາຍຄົນ.
ສ່ວນທ້າວ Phelps ໄດ້ເສຍໄຊຢ່າງບໍ່ຄາດຝັນ ໃຫ້ແກ່ນັກລອຍນ້ຳສິງກະໂປ ທ້າວ Joseph Schooling ໃນການແຂ່ງລອຍນ້ຳ ທ່າແມງກະເບື້ອ ຫຼື butterfly ໄລຍະ 100 ແມັດ ແລະກໍໃຊ້ເວລາເທົ່າກັນ 3 ຄົນ ກັບນັກກິລາອາຟຣິກາໃຕ້ ແລະຮັງກາຣີ.
ນັກກິລາຫຼຽນເງິນ 3 ຄົນ ຈາກການແຂ່ງລອຍນ້ຳ butterfly ຈາກຊ້າຍ: ທ້າວ Michael Phelps ຈາກສະຫະລັດ ທ້າວ Chad Le Clos ຈາກອາຟຣິກາໃຕ້ ແລະ Laszlo Cseh ຈາກຮັງກາຣີ.
ນອກນັ້ນ ນັກລອຍນ້ຳອາເມຣິກັນ ຍັງໄດ້ຊະນະຫຼຽນຄຳແລະທອງແດງ ໃນການແຂ່ງລອຍ ນ້ຳແບບ freestyle ໄລຍະ 50 ແມັດ ຄືທ້າວ Anthony Ervin ໄດ້ໃຊ້ເວລາແຕ່ພຽງ 21.40 ວິນາທີ ຊະນະທ້າວ Floren Manaudou ຈາກປະເທດຝຣັ່ງ ພຽງແຕ່ 1 ສ່ວນ 100 ຂອງວິນາທີເທົ່ານັ້ນ ແລະນັກລອຍນ້ຳອາເມຣິກັນອີກຄົນນຶ່ງ ຄືທ້າວ Nathan Adrian ພຽງແຕ່ 9 ສ່ວນ 100 ຂອງວິນາທີ.
ສ່ວນນັກລອຍນ້ຳແມ່ຍິງອາເມຣິກັນ ນາງ Maya DiRado ກໍໄດ້ຮັບຫຼຽນຄຳໃນການແຂ່ງລອຍນ້ຳທ່າ backstroke ໂດຍປະຕິເສດ ບໍ່ໃຫ້ນັກລອຍນ້ຳຮັງກາຣີ ນາງ Katinka Hosszu ໄດ້ຮັບຫລຽນຄຳເປັນປີທີ 4 ແຕ່ໄດ້ຮັບຫຼຽນເງິນແທນ.
ນັກແລ່ນເອທິໂອເປຍ ນາງ Almaz Ayana ຖ່າຍຮູບໃກ້ໆກະດານ ສະແດງສະຖິຕິໃໝ່ ໃນການແລ່ນ 10,000 ແມັດ ຂອງນາງ.
ໃນວັນສຸກວານນີ້ ໄດ້ມີການມອບຫລຽນ ໃຫ້ແກ່ກິລາແລ່ນແລະລານ ປີ 2016ເປັນເທື່ອທຳອິດໂດຍນັກແລ່ນເອທິໂອເປຍ ນາງ Almaz Ayana ໄດ້ຮັບຫລຽນຄຳ ແລະເຮັດສະຖິຕິໂລກໃໝ່ 29 ນາທີກັບ 17.45 ວິນາທີ ໃນການແຂ່ງແລ່ນແມ່ຍິງ 10,000 ແມັດ ໂດຍໄດ້ທຳລາຍສະຖິຕິເກົ່າຂອງນາງເກືອບ 14 ວິນາທີ.
ຂະນະດຽວກັນ ນາງ Michel Carter ຈາກສະຫະລັດ ກໍໄດ້ຊະນະຫລຽນຄຳ ໃນກິລາແກວ່ງໝາກບຸ່ນແມ່ຍິງ ຊຶ່ງພໍ່ຂອງນາງ Carter ກໍເຄີຍໄດ້ຮັບຫຼຽນເງິນ ໃນການແຂ່ງຂັນກິລາປະເພດດຽວກັນນີ້ ທີ່ນະຄອນ Los Angeles ເມື່ອປີ 1984.
ທີມເຕະບານແມ່ຍິງສະຫະລັດ ໄດ້ເສຍໄຊໃຫ້ແກ່ສະວີເດັນ ໃນຮອບ 4 ທີມໃນ ການເຕະລູກໂທດ. ທີມສະຫະລັດແມ່ນໄດ້ພະຍາຍາມປ້ອງກັນຕຳແໜ່ງຫຼຽນຄຳຂອງຕົນເມື່ອສີ່ປີກ່ອນ.