ຫົວໜ້າທະນາຄານກາງຂອງອັຟການີສຖານກ່າວວ່າ ທ່ານໄດ້ລາອອກຈາກຕໍາແໜ່ງແລະ
ຫລົບໜີອອກຈາກປະເທດເພາະວ່າ ທ່ານມີຄວາມຢ້ານກົວກ່ຽວກັບຊີວິດຂອງທ່ານຫລັງ
ຈາກທ່ານໄດ້ມີບົດບາດໃນການສືບສວນສອບສວນຂ່າວນອງນັນກ່ຽວກັບການສໍ້ລາດບັງ
ຫຼວງທີ່ພົວພັນກັບທະນາຄານກຸງຄາບູລ ຫລື Kabul Bank ຊຶ່ງເປັນສະຖາບັນໃຫ້ເງິນກູ້
ຢືມລາຍໃຫຍ່ທີ່ສຸດຂອງປະເທດນັ້ນ.
ໃນການໃຫ້ສໍາພາດໃນວັນຈັນວານນີ້ຢູ່ນອກກຸງວໍຊິງຕັນ ທ່ານ Abdul Qadir Fitrat ຜູ້
ອໍານວຍການທະນາຄານແຫ່ງຊາດອັຟການິສຖານ ກ່າວວ່າທ່ານຫລົບໜີຈາກປະເທດກໍ
ເພາະວ່າ ຊີວິດຂອງທ່ານພວມຕົກຢູ່ໃນອັນຕະລາຍຮ້າຍແຮງ ແລະກ່າວຕື່ມວ່າ ອັນນີ້ເປັນ
ຄວາມຈິງໂດຍສະເພາະຫລັງຈາກທ່ານເປີດເຜີຍຊື່ພວກຮັບຜິດຊອບບາງຄົນໃນວິກິດການ
ກ່ຽວກັບທະນາຄານກຸງຄາບູລ ໃຫ້ລັດຖະສະພາຊາບໃນເດືອນເມສາຜ່ານມາ.
ທ່ານ Waheed Omar ໂຄສົກປະຈໍາປະທານາທິບໍດີ Hamid Karzai ກ່າວໃນແລງວັນ
ຈັນວານນີ້ວ່າ ທ່ານ Fitrat ບໍ່ໄດ້ແຈ້ງໃຫ້ທາງການຊາບກ່ຽວກັບການລາອອກຈາກຕໍາ
ແໜ່ງຂອງທ່ານແລະອາດມີທາງເປັນໄປໄດ້ວ່າເປັນຜູ້ຮັບຜິດຊອບກ່ຽວກັບຂ່າວນອງນັນ
ທີ່ພາໃຫ້ທະນາຄານກຸງຄາບູລລົ້ມແຫລວໄປນັ້ນ.
ທະນາຄານກຸງຄາບູລໄດ້ສູນເສຍເງິນໄປຫລາຍກວ່າ 900 ລ້ານໂດລາແລະເກືອບລົ້ມລະ
ລາຍໃນປີແລ້ວນີ້ ເນື່ອງຈາກການກ່າວຫາທີ່ວ່າ ມີການບໍລິຫານຜິດພາດ ຫລິ້ນພັກຫລິ້ນ
ພວກເຫັນແກ່ພີ່ນ້ອງແລະເພື່ອນມິດ ແລະການໃຫ້ເງິນກູ້ຢືມແບບທີ່ມີຂໍ້ສົງໄສນັ້ນ.