ທ່ານ ຮາມິດ ກາຊາຍ ປະທານາທິບໍດີອັຟການີສຖານ ກ່າວວ່າ ບັນດາປະເທດພາຄີນາໆຊາດກໍາລັງຮ່ວມໄມ້ຮ່ວມມືກັນ ເພື່ອຊ່ວຍເຫຼືອປະເທດ ຂອງທ່ານ ຕໍ່ສູ້ກັບພວກກໍ່ການຮ້າຍ ແລະພວກຫົວຮຸນແຮງ ແລະນໍາເອົາ ສັນຕິພາບ ແລະຄວາມຈະເຣີນທາງດ້ານເສດຖະກິດມາສູ່ຂົງເຂດ.
ປະທານາທິບໍດີກາຊາຍ ກ່າວເມື່ອວັນພະຫັດມື້ນີ້ ຢູ່ທີ່ກອງປະຊຸມນຶ່ງມື້ ທີ່ ເມືອງຫຼວງກາບູລ ບ່ອນທີ່ບັນດາເຈົ້າໜ້າທີ່ໄດ້ປຶກສາຫາລືກັນກ່ຽວກັບອະ ນາຄົດຂອງອັຟການີສຖານ ຫຼັງຈາກກໍາລັງທະຫານຂອງຕ່າງປະເທດຖອນ ອອກໄປໃນປີ 2014. ການເຈລະຈາກັນດັ່ງກ່າວ ແມ່ນມີຂຶ້ນລຸນຫຼັງການປຶກສາຫາລືທີ່ຄ້າຍຄືກັນ ຢູ່ທີ່ປະເທດເທີກີ ເມື່ອເດືອນພະຈິກປີກາຍ.
ທ່ານກາຊາຍ ກ່າວອີກວ່າ ແນ່ນອນທີ່ສຸດອັຟການີສຖານຈະສໍາເລັດການໂອນຄວາມຮັບຜິດຊອບເພື່ອເຂົ້າຄວບຄຸມຄວາມໝັ້ນຄົງຂອງຕົນເອງພາຍໃນປີໜ້ານີ້ກ່ອນ ການຖອນກໍາລັງທະຫານຂອງນາໆຊາດອອກໄປ ໃນປີ 2014 ນັ້ນ.
ນອກນີ້ແລ້ວ ທ່ານກາຊາຍ ຍັງໄດ້ເນັ້ນຍໍ້າພາລະກິດຂອງສະພາສັນຕິພາບ ລະດັບສູງຂອງອັຟການີສຖານ ທີ່ຖືວ່າເປັນອົງປະກອບທີ່ສໍາຄັນທີ່ສຸດອັນ ນຶ່ງ ໃນການຫັນປ່ຽນ ໂດຍກ່າວອີກວ່າ ໃນບໍ່ຊ້ານີ້ ຫົວໜ້າສະພາດັ່ງກ່າວຈະເດີນທາງໄປເຈລະຈາກັບ Saudi Arabia ແລະ ປາກີສຖານ.
ທ່ານກາຊາຍ ໄດ້ກ່າວຂອບໃຈປະເທດຕ່າງໆທີ່ໄດ້ໃຫ້ຄໍາໝັ້ນສັນຍາໃນລະ ຫວ່າງກອງປະຊຸມສຸດຍອດຂອງເນໂຕ້ ຢູ່ນະຄອນ Chicago ທີ່ວ່າ ຈະໃຫ້ການສະໜັບສະໜຸນອຸ້ມຊູກໍາລັງຮັກສາຄວາມປອດໄພຂອງອັຟການີສ ຖານ ໄປຈົນເຖິງປີ 2024 ນັ້ນ.